E talitonu le afioga i le ali’i Fa’amasino ia Elvis P. Patea, e pepelo fa’amaumauga na tuu atu e le sui o le Ofisa o Femalagaaiga i luma o le Fa’amasinoga, e fa’atatau i pepa nofomau o se ali’i mai Samoa na mae’a le aoga o lona ID nofomau i le tausaga na te’a nei.

Talu ai o le tulaga e pei ona molimauina e le Fa’amasinoga, na saunoa ai Patea e fa’apea, e tatau i le loia a le malo ona fai se fuafuaga e fa’atatau i faamaumauga pepelo na tuuina atu e le sui o le Ofisa o Femalagaaiga, e aofia ai ma se faaiuga e fai fa’asaga i le tagata ofisa na tuuina atu faamaumauga pepelo nei.

O le aso Gafua o le vaiaso nei na faia ai se iloiloga faapitoa a le ali’i o Pisoma Kimo.

Na mafua ona fa’atulaga lea iloiloga, na fia malamalama le fa’amasinoga i ta’iala e mafai ai e le Ofisa o Femalagaaiga ona faafou pepa nofomau o tagata mai fafo pe a mae’a le aoga, aemaise lava i pepa nofomau o tagata mai fafo ua silia i le 30 aso talu ona mae’a le aoga.

Na taua e Patea e fa’apea, o Kimo na taofia faapagota e Leoleo i le masina o Mati ona o tu’uaiga i le fa’atupu vevesi i nofoaga faitele, ma faia ai loa le faaiuga e taofia o ia i le toese e aunoa ma se tupe e totogi, e mafua mai i le tulaga fa’aletonu i ona pepa nofomau.

Ina ua toe valaau le mataupu a Kimo i le masina na te’a nei, na fa’ailoa ai e se sui o le Ofisa o Femalagaaiga o lo o gafa ma le taulimaina o mataupu i pepa nofomau a tagata e molia atu i luma o le Fa’amasinoga Fa’aitumalo, o le ID nofomau a Kimo na mae’a lona aoga i le aso 21 o Iuni 2018, ae ua fa’ataga e le Ofisa o Femalagaaiga ona nofo pea i Amerika Samoa seia aulia le aso 22 o Aperila 2019, o le aso fo’i lea na taua e tatau ona pu’e ai le ID nofomau a Kimo.

Talu ai fa’amaumauga sa tuuina atu e le sui o le Ofisa o Femalagaaiga i luma o le Fa’amasinoga, na fa’atulaga ai loa e Patea le iloiloga faapitoa i le vaiaso nei.

O le Sui Pule o le Ofisa o Femalagaaiga ia Fagamalama Fualaau avea ma molimau. Sa i ai fo’i Kimo i le iloiiloga, fa’atasi ai ma lana loia fautua ia Ryan Anderson.

Ina ua valaau le mataupu a Kimo, na saunoa Patea ia Fualaau e fa’amalamalama i luma o le fa’amasinoga auala e faatulaga ai le faafouina o pepa nofomau a tagata mai fafo ua mae’a le aoga.

Na faamanino e Fualaau e fa’apea, afai ua mae’a le aoga o le ID nofomau a se tagata mai fafo, e tatau ona toe talosaga mo le fa’afouina o le isi ID fou. O mea e manaomia i le talosaga mo le toe faafouina o le ID e aofia ai kilia mai le Fale Faamasino, kilia mai le Falema’i i Fagaalu, faapea ai ma le form e faatumu ae saini ai le sponsor.

O le taimi e mae’a ai ona tauaao atu e le tagata mai fafo pepa e manaomia, ona iloilo loa lea e le Ofisa o Femalagaaiga le talosaga ma faatulaga ai loa le aso e fai ai le iloiloga a le tagata mai fafo.

O le iloiloga lea e oo atu ai le tagata mai fafo ma lana sponsor i luma o sui o le Ofisa o Femalagaaiga, ma maua ai fo’i le avanoa e tali ai i fesili a sui o le Ofisa o Femalagaaiga. Afai loa e pasia le fa’atalatalanoaga a le tagata mai fafo, ona fa’atulaga loa lea o le aso e pu’e ai lona ID fou.

Ae mo le tagata ua silia i le 30 aso talu ona mae’a le aoga o lona ID nofomau, e le taliaina e le Ofisa o Femalagaaiga se talosaga mo le toe faafouina o le ID nofomau, ae tu’u sa’o lava i luma o le Komiti Fa’afoe a le Ofisa o Femalagaaiga, o i latou tonu ia e gafa ma le taulimaina o mataupu a tagata mai fafo ua tele aso talu ona mae’a le aoga o latou ID nofomau ae le’i toe fa’afouina lava.

Ina ua mae’a ona faamalamalama e Fualaau tulaga uma na faatonu ai loa e Patea le Failautusi a le Fa’amasinoga e ave ia Fualaau kopi o pepa sa tuuina atu e le sui o le Ofisa o Femalagaaiga i le fa’amasinoga e fa’atatau i le mataupu a Kimo.

Na fa’aalu e Fualaau sina taimi puupuu e iloilo ai pepa sa tuuina atu ia te ia e fa’atatau i le mataupu a Kimo.

Na fesili Patea ia Fualaau pe na vaai muamua i pepa talosaga a Kimo, na tali Fualaau e tasi lava le taimi na ia vaaia ai pepa ia, o le taimi fo’i lea na ia taofia ai, ina ua ia maua le tala o Kimo o loo taofia i le falepuipui.

I luga o pepa sa tauaao atu e le fa’amasinoga ia Kimo, e le o i ai ni aso e fa’ailoa mai ai le taimi e faia ai le iloiloga, atoa ai ma le aso e ta’u mai ai le taimi e pu’e ai le ID fou.

Na fesili Patea ia Fualaau, poo o gatasi pepa a Kimo ma ta’iala e fa’agasolo ai le pu’eina o ID fou a tagata mai fafo. Na tali Fualaau, “E leai”.

“E le i oo atu lava se pepa talosaga a Kimo mo le fa’afouina o sona ID nofomau i luma o le Ofisa o Femalagaaiga. Ae ina ua ou vaai i le pepa ua faasavali atu mo le totogiina o le tau e pu’e ai le ID, na ou taofia ai loa le tulaga lea, ina ua ou iloaina o lo o taofia Kimo i le falepuipui,” o le molimau lea a Fualaau.

“Lona uiga e le i tuuina atu se talosaga a Kimo i luma o le Ofisa o Femalagaaiga mo le toe fa’afouina o lona ID nofomau,” o le fesili lea a Patea ia Fualaau. Na tali Fualaau, “E leai se talosaga a Kimo na tuuina atu i luma o le Ofisa.”

Na faailoa e Patea ia Fualaau e fa’apea, na mafua ona faatulaga le iloiloga a Kimo, ina ua masalomia e le fa’amasinoga pepa sa tuuina atu e le sui o le Ofisa o Femalagaaiga i le masina na te’a nei e fa’atatau i le avanoa ua tuuina atu e toe fa’afou ai le ID nofomau a Kimo.

Saunoa atili Patea e fa’apea, e ofo le fa’amasinoga i le mafai ona toe fa’afou le ID nofomau a Kimo, ae ua silia i le 11 masina talu ona mae’a le aoga.

O le mae’a ai ona fesiligia e Patea o le molimau, na talosaga ai loa le loia a Kimo ia Anderson i le fa’amasinoga ina ia tatala loa Kimo i lalo o le vaavaaiga a le Ofisa o Femalagaaiga, ina ia mafai ai ona faafou lona ID nofomau.

O lea talosaga na togi i fafo e Patea.

Na faailoa e Patea ia Anderson e fa’apea, e tusa ai ma le molimau a le sui o le Ofisa o Femalagaaiga, e leai se taumafaiga a Kimo poo lana sponsor e toe faaulu ai se talosaga mo le toe faafouina o le ID nofomau.

“Lona uiga la i se isi faaupuga, ua ova aso talu ona aumau Kimo i le atunu’u, ma ua le toe agava’a ona toe tatala o ia i le Ofisa o Femalagaaiga,” o le saunoaga lea a Patea.

“E faafefea la ona e finau mai e tatala i tua Kimo a o lea ua manino i le molimau a le sui o le Ofisa o Femalagaaiga, ua mae’a le taimi na aoga ai lona ID nofomau,” o le isi lea fesili a Patea i le loia ai Kimo ia Anderson.

I le faaiuga o le iloiloga, na fautuaina ai loa e Patea le loia a le malo ina ia fai se faaiuga tatau e tusa ai o pepa pepelo sa tuuina atu e le sui o le Ofisa o Femalagaaiga i luma o le fa’amasinoga e uiga i le mataupu a Kimo.