Pago Pago - AMERIKA SAMOA

Ua taoto nei i luma o le Senate, ia se pili taufaaofi a le Maota o Sui, ina ia aofia afioga Faipule, i le pasiaina, o totino o le Komiti Faafoe a le LBJ.

Ua ta’ua i faaupuga o lenei pili taufaaofi le tofiaina e le Kovana o totino o le Komiti Faafoe, ma pasiaina mai e le Fono Faitulafono, e tatau ona aofia ai le Maota o Sui.

Ua ta’ua foi e faapea, o lenei komiti faafoe e tatau ona aofia ai ni totino se to’alua e iai le tomai faapitoa i mataupu tau tupe po o pisinisi.  O seisi totino e tatau o se fomai ua litaea pe o lo’o galue i totonu o le falemai.  Atoa ai ma se totino e lava lona tomai pe agava’a i le faafoeina o ofisa faa falemai, faapea ma se totino mai I le mamalu lautele.

O lo’o ta’ua foi i faaupuga mo le filifiliga o totino o lenei komiti, e le tatau na silia ma le toalua ni sui e mafai ona filifili mai i atunu’u foi, pe faamautu i atunu’u i fafo.  E le gata i lea, e le mafai ona fa’aauau pea ona galue se fomai i le falemai, pe afai e filifilia o ia, e avea ma totino o le Komiti Faafoe.

O le afioga i le kovana sili, e gafa ma le filifiliga o le umi po o tausaga ( i le va o le 1 ma le 5) e galulue ai totino o le Komiti Faafoe.

Ua ta’ua foi i totonu o le pili taufaaofi e faapea, afai ae tula’i mai se tulaga e avanoa ai se nofoa o le komiti faafoe a’o faagasolo le nofoaiga, o le a faapea ona toe filifilia e le Kovana se tasi e faatumulia lea nofoa.

O lo’o ta’ua ai foi le filifiliga faapitoa o ni totino fou pe afai o ni faalavelave le ma’alofia, e pei o maliu, faamavae mai i le tofiga po o le faatula’i ese o se totino ae o lo o malolo le Fono Faitulafono.  Ae e mae’a le tautua a i latou nei, pe afai ae tapunia se Fono Faapitoa a le Fono Faitulafono, ae e le pasia ai o latou tofiga.

O lo’o ta’ua foi i totonu o lenei pili taufaaofi, le mafai ona fa’aauauina o le nofoaiga a se totino o le Komiti Faafoe, pe afai ua mae’a ona tausaga faatulafonoina, ae e le’i pasia se tasi e sui tulaga ia te ia.  

O lenei komiti faafoe, o le a fono faatasi i le kuata.  E atoa le korama o le komiti faapea pe afai e auai um ni totino se tolu pe sili foi.  E mafai ona fono le komiti e ala i aupega tafailagi ia po o le fa’aaogaina foi o telefoni.  

E $5,000 le totogi o i latou e filifilia i le laulauafono a le Komiti Faafoe, i le tausaga e tasi, se’ia vagana le Taitaifono, e $6,000 lona totogi, i le tausaga.

O le maua foi e totino o le komiti faafoe o lo’o aumau i atunuu i fafo, ia tupe aua femalagaiga, o fale e nonofo ai, mea taumafa faapea ma tupe fa’aaluina mo feso’otaiga, i le vaitaimi o le faatinoina o latou tiute.

E le o se taimi muamua lenei ua taumafai ai le Maota o Sui ina ia aofia i totonu o faatalanoaga ma suesuega o totino o le Komiti Faafoe a le LBJ, e ui lava ina e le’i taliaina lava e le Maota o le Senate a latou talosaga i tausaga ua tuanai.

I le taimi nei, e na o le Senate e manaomia ona pasiaina ma faamaonia totino o le Komiti Faafoe a le LBJ.