Pago Pago - AMERIKA SAMOA

Ua matua fa’apopoleina lava le afioga i le Kovana Sili, Lemanu P.S. Mauga ma le afioga i le Lutena Kovana, Talauega Eleasalo Ale “i le tulaga o lo’o iai nei tausi soifua” i le falema’i o le LBJ Medical Center. 

O le saunoaga lea a le Pule Sili o le aufaigaluega i le Ofisa o le Kovana, ia Loa Tauapa’i Laupola i le tali mai ai i fesili a le Samoa News i le mae’a ai lea o le savali ese mai galuega o teine tausima’i mai le falema’i i le aso Faraile na te’a nei, ma latou talotalo atu ai i faailoilo i luga o le alatele agai i le falema’i i le taeao o le aso Gafua.

E pei ona lipotia e le Samoa News i le Aso Lua o le vaiaso lenei, e latalata i le to’a 50 tausi soifua sa le’i galulue i le taeao o le Aso Gafua, ae ua o ese ma galuega ma fa’ailoa lo latou le fiafia i nisi o mataupu, ae maise totogi, e aofia ai ovataimi. Sa faia sa latou solo fa’atuiese fa’asaga i le puleaga a le falema’i.

Ua le o fiafia tausi soifua ona o ovataimi e le’i totogia ma le le maua o a latou siitaga sa folafola e pei ona faalauiloa i le vaiaso na te’a nei e le pulega ma le komiti faafoe a le falema’i.

E silia i le to’a 20 tausi soifua e le’i auai atu i a latou sifi i le falema’i i le fa’aiuga o le vaiaso ua te’a, e fa’aalia ai lo latou le fiafia i fa’aiuga ua faia e le pulega a le falema’i.

Fa’aalia e se tamaitai tausi soifua sinia, e fa’apea, “afai e mafai e le falemai o le LBJ ona fa’afaigaluega ni tamaitai tausimai e lei laiseneina mai Fiti, tu’u i faletalimalo e fa’atali ai le aoga faatausi soifua ia Ianuari, e faapefea la ona latou le gafatia ona totogi a matou ovataimi ma folafola mai ai se siitaga?”

Na ta‘ua e le tamaitai tausi soifua e lē o se taimi muamua lea, ua iai ni fa’afitauli i ovataimi.

“Afai e gafatia e le falema’i ona fai fa’ai’uga tau pulega e ala i le fa’a faigaluegaina o tausima’i mai fafo e le’i laiseneina, e tatau lava ona maua a matou ovataimi.”

“Sa matou galulue ma le le fiu ma le tele o ovataimi e le’i totogia ae o a latou fa’aiuga talu ai nei ua  matou fesiligia ai.”

“E leai se mea e tete’e ai i nai o matou uso ma uso Fiti i inei e fesoasoani mai, ae e le o laiseneina, o lea e pau lava le mea latou te faia o galuega fesoasoani a tausi soifua, ae o loo maua alauni o fale ma isi penefiti e le agavaa ai i matou o tausi soifua. O fea o iai le tonu i lena mea?”

“Na latou fa’afaigaluegaina tausimai mai Fiti, ona latou fa’ailoa mai lea o le a maua se siitaga o o matou totogi, e pei o upu e totogi ai a matou pili,” o le tala lea a le tamaitai tausimai sinia.

Fa’ailoa e Loa i le Samoa News, ua saunia ta’ita’i o le malo e faia se isi la’asaga e fesoasoani ai i le LBJ. 

“O lo’o popole tele le Kovana Lemanu ma le Lutena Kovana Talauega i le tulaga o lo’o iai nei tausi soifua i le LBJ,” o le saunoaga lea a Loa i fesili a le Samoa News.

Na tuuina mai e le falemai se fa’amatalaga i le aoauli o le Aso Gafua e ta‘ua ai “se mala e lei oo i se taimi” mo gasegase o le LBJ i le mauaina o se savali faafuasei ese mai galuega o tausi soifua ia Tesema 16 ma Tesema 19. 

O lo’o taua i lea fa’amatalaga tusitusia mai le LBJ e fa’apea na feiloai i le Aso Gafua le Pule Sili o le LBJ ia  Moefa’auo Bill Emmsley ma se vaega o tausi soifua na tuuina atu se tusi o faitioga.

“Ina ua mae’a le fonotaga, sa fa’atonu e le Pulesili ia Tausima’i uma e toe fo’i i le galuega. O le popolega tele a le Pule Sili e pei ona ia fa’ailoa i tausi soifua, o le fa’aauauina pea lea o le saogalemu ma le lelei o le tausiga o gasegase mo le falema’i ma le saogalemu o tagata faigaluega o lo’o tutumau.

“E le’i matamuli le Ofisa Sili o Pulega i le faasoaina atu o ona manatu e faapea o le galuega tausimai o se ‘pito i luga’ o lana lisi o mataupu, mai le amataga.”

E pei ona fa’ailoa i le pepa o fa’amatalaga a le LBJ, na  fa’amatala atili e Moefa’auo le tele o fuafuaga ua mae’a ona fa’atulafonoina e lagolago ai le mataupu a le tausi soifua.

“Sa matua alofa le Pule Sili i tausi soifua ma fautuaina i latou o lee a ia feiloai ma le Komiti Faafoe ma le pulega sinia i le foiaina o a latou mataupu e pei ona tuuina atu,” o le tala lea a le LBJ i a latou pepa o fa’amatalaga. 

O ni isi o tausi soifua sa auai i le solo tete’e i le Aso Gafua e lei toe fo’i i le galuega ma latou fa’ailoa i le Samoa News, se’i vagana ua fo’ia e le falema’i a latou fa’asea, latou te le toe fo’i i le falema’i.

“O se tulaga masani lenei o le solia o folafolaga, na latou faailoa mai o le a maua ni faaopoopoga i o matou totogi ma oo mai i le aso totogi, e le gata ina le totogia o matou ovataimi ae matou te lei mauaina foi le siitaga folafolaina o matou totogi, lea. o upu ia a le Pule Sili,” o le tala lea a le au tausi soifua le fiafia.

E tusa ai ma le faamatalaga na tuuina mai e le falemai, e faaaloalo le Pule Sili o aia tatau a tamaitai tausimai mo le saolotoga e tautala ai, ae o le matafaioi autu a le Pule Sili o le faamautinoaina o le tulaga maualuga o le soifua maloloina ma le faaauauina o le tausiga saogalemu o gasegase e le afaina e tusa ai ma ta’iala a tulafono a le ofisa feterale o le Centers for Medicare & Medicaid Services.