Pago Pago - AMERIKA SAMOA

E $14 miliona le initeresi ua ausia e le malo o Amerika Samoa mai i le teugatupe a le ARPA lea o lo’o teuina i le Faletupe a Siona, e pei ona molimauina e le Tausitupe malolo a le malo, le susuga ia Donald Kruse, i se fonotaga tu’ufa’atasi a le komiti o tupe a le Fono Faitulafono, ina ua mae’a ona su’esu’eina e le Peresetene o le Senate, le tofa ia Tuaolo Manaia Fruean.

I le aso Lulu o le vaiaso ua tuanai, sa fesiligia ai e Tuaolo ia Kruse, e tusa ai ma fuafuaga a le malo, mo le totogia o le aitalafu e $14 miliona, i le Teugatupe o le Ritaea a tagata faigaluega a le malo (ASGERF) ma na ta’ua ai e Kruse e faapea, e tatau ona fa’aaoga le initeresi lea o lo’o i le Faletupe a Siona, e totogi ai lea aitalafu.

Ae na tali mai Kruse, e mana’omia ona soalaupuleina lea tulaga ma le Kovana.

Sa fa’aleoina e Tuaolo e faapea, o se avanoa lenei ua maua, e mafai ai ona tali atu le malo i lana aitalafu i le Teugatupe a le Ritaea ma sa ia fa’amamafaina ai le taua, o le puipuia o lea Teugatupe ma tupe lea o lo’o to’esea mai i tagata faigaluega o le malo, ma tu’uina i totonu o lea Vaegatupe.

le Afioga i le Peresetene o le Senate, le tofa ia Tuaolo, o lo’o avea ma taitaifono o le Komiti Faafoe o le ASGERF.  O lo’o to’alua i la’ua ma se tasi o Faipule mai i le Maota o Sui, o lo’o i totonu o le Komiti Faafoe, e tusa ai ma le tulafono.

I le latou iloiloga, sa taumafai Tuaolo e saili seisi faamalamalamaga faaopoopo mai ia Kruse, e tusa ai ma se fuafuaga a le malo, mo le totogia o lana aitalafu i le ASGERF.

Sa faamanino e Kruse e faapea, o lo’o galulue malosi le malo ina ia aoina tiute ma lafoga o lo’o aitalafou ai tagata ma pisinisi, i le malo.  Ma o le 75 pasene o tupe a le ARPA o lo’o teuina i le Faletupe a Siona, e le o fa’aaogaina ma ua mafai ona maua ai se faaopoopoga mai lana initeresi (interest). 

Ae sa ta’ua foi e Kruse e faapea, e toe inivesi loa tupe nei i totonu o le tamaoaiga, e mafai ona fa’aleleia atili ai ia tupe aoina, e pei ona molimauina i tupe ua mae’a ona aoina, tauala mai i poloketi a le Ofisa a Aoga, i le 2022 ma le 2023.

Sa fa’aauau ona u’una’ia e Tuaolo ia le Tausitupe ina ia fa’aaogaina ia le initeresi mai tupe teuina a le ARPA i le Faletupe a Siona, e totogi ai le aitalafu a le malo i le ASGERF.  Ma sa ia ta’ua se fonotaga lata mai ma le Fofoga Fetalai faapea le Tausitupe, lea sa o latou taumafai ai e saili se auala, e fa’aaoga ai lenei tupe (initeresi) e fa’aitiitia ai nisi o aitalafu a le malo, ua leva ona iai.

E ui ina taumafai le Tausitupe e faamanino mai e faapea, e na o le $293 miliona o tupe e le’i fa’aaogaina a le ARPA, i le taimi nei.  Ae peitai, sa fa’aalia le le fiafia o le Peresetene o le Senate, i lana faamatalaga.