Pago Pago - AMERIKA SAMOA

MOLIA SE ALII I LONA FAIA O UIGA TAU FAAMATA’U I SE TINA MATUA

O le 5:30 i le afiafi o le Aso Sa, Aukuso 20, 2023 na faafesootai ai e se tina matua ia le ofisa o leoleo i Tafuna on aua faaleagaina e se tasi lana taavale, na tu i luma o lona maota i Nu’uuli.  Na mafai ona faamaonia mulimuli ifo, o le na faia lea tulaga, o se alii e suafa ia Azora Sunia.

Ina ua taunuu sui malu o le malo i le maota o lenei tina, sa ia faamatalaina e faapea, o le 5 i le afiafi o lea lava aso, a’o iai i latou ma nai ona alo laiti (grandkids) i totonu o le fale, sa ia faalogoina le ou a lana taifau sa i fafo o le fale, ma sa ia faatonuina ai si ona alo teine e sau e vaai po le a le mea ua uou ai le maile.

Na sau le teineititi e vaai ae toe foi atu ma faailoa atu i lona tina matua, e iai le taavale la e paka i luma o le latou fale.  Ma na savali mai le tina matua i fafo, ae oso mai i fafo mai i le taavale le ave taavale ma se pake pesipolo i lona lima.

Na faamatala e le tina matua, na savali atu le avetaavale, lea ua faamaonia o Sunia, i le mea na tu ai le taavale a le tina matua, ma amata ona sasa faamalama o le taavale.  Na ta’ua e le tina matua, ua fiu e valaau atu i le alii lea o lo o faia lana sauniga i lana taavale pe iai se mea o manaomia, ae le tali mai le ua molia.

E taunuu atu leoleo i le maota o le tina matua i lea afiafi, ua o ese le ua molia ma nisi alii se toalua sa o latou malaga faatasi atu.

O lo o ta’ua i faamaumauga a le faamasinoga e faapea, ina ua mae’a le sauniga a le ua molia, lea sa fai i le taavale a si tina matua lea, ona savali atu lea i le tina matua ma faalala iai le pate pesipolo ma faapea atu i le tina matua, “Ou ke laku a ma le pake sasa ai ou maka.”  Ma leisi ana faamatalaga e faapea, “E fai e lou grandson ae kigaiga ai oe”.

Ona toe oso lea o le ua molia i lana taavale ma o ese mai le fale o lenei tina matua ua mata’u e le gata i lona soifua ae faapea foi soifua o si ana fanau laiti.  Sa ia talosagaina ia sui malu o le malo ina ia aua nei toe latalata atu le ua molia ia i latou.

I se tumateina o le tau atoa o vaega o le taavale sa faaleagaina e le ua molia, e i le va o le $5,000 ma le $6,000.

Na mauaina e leoleo ia Sunia i tua o le Family Mart faatasi ai ma alii e toalua na latou o i le fale o le tina matua.  Ae e le i aveina atu i latou i le ofisa a leoleo, sa faamatalaina e le ua molia i sui malu o le malo e faapea, sa tafao i le fale o sana uo i tua o le faleoloa o Tutuila i Nu’uuli, ae alu atu le alo o le tina matua lea ae na tago le ua molia i le tuli ese.

Ae ina ua alu ese atu le alo o le tina matua, na ta’ua e Sunia e faapea, sa ia lagonaina se pa’o ma  o latou e siaki ae o latou vaaia le tamo’e o le tama a le tina matua, ua tamo’e agai i le latou fale.  Ma na ia vaaia ua mafo’e lana taavale ma o le mafuaaga lea na latou o ai i le fale o le tina matua lea.

Na aveina faatasi Sunia ma molimau e toalua ia sa iai i le taimi na tupu ai le faalavelave, i le ofisa a leoleo.  Sa musu se tasi o molimau e fai sana faamatalaga.  Ae na faamatala e leisi molimau e faapea, sa iai o ia i luma o le auala ina ua alu atu le taavale a Sunia.  Ma na oso i tua o le taavale, a’o agai atu i le fale o le tina matua.

Sa faamatala foi e lea molimau le oso i fafo o Sunia ma le pate pesipolo ma sasa ai faamalama o le taavale a o ia taumafai e taofi Sunia.

Ua molia nei Sunia i le faaleagaina o mea totino ma le faatupu vevesi.  E $5,000 le tupe faatulagaina e tatala ai o ia i tua.

TATALA I TUA SE ALII O LO O MOLIA I FAIA O AMIOGA MATAGA I SE AU USO E TOALUA

O le aso 10 o Oketopa, 2022 na lokaina ai le alii o Ma’alona Ioane ma molia i lona faia o ni amioga mataga i ni teineiti se toalua.  Ae ua tatalaina nei o ia i tua mai i le falepuipui, ina ua mae’a ona totogiina se tinoitupe e $10,000.

Na tete’e Ioane i moliaga faasaga ia te ia.

O moliaga o Ioane na tulai mai ina ua suesueina e taitai o le aoga maualuga a Faasao ma Malisi ia se teineititi aoga, i le aso 3 o Oketopa, 2022 ona ua vaaia se suiga tele i le amio a lenei teineititi, ma iloa ai na faia e se tagata amioga mataga ia te ia.

E tusa ai ma faamaumauga a le faamasinoga, o lo o ta’ua ai le faamatalaina e lenei teineititi aoga, e le na o ia na faia iai e le ua molia ia amioga mataga, ae sa ia faia foi i lona uso laititi.  Na faafesootai e taitai o le aoga ia le Ofisa o le Social Services a le ekalesia Katoliko mo se fesoasoani i lenei mataupu.  Sa faamatala e le teineititi aoga lenei i taitai o le aoga, le tiga o lona loto ona o lo o fealuai saoloto le alii lea na faia nei tulaga mataga ia i la’ua ma lona uso.

I le aso 5 o Oketopa, 2022 na faatalanoaina ai e se tagata faigaluega mai i le Social Services ia le uso laititi ma lona tina ma o iina na fa’ailoa atu ai i le tina le mea na tupu.  Ina ua maea lea talanoaga, sa faapea loa ona agai atu i latou uma i le ofisa a leoleo i Leone e faila se tagi e faasaga i le ua molia.

Sa faamatala e le uso laititi e faapea, i le aso 6 o Setema, 2020, na tuli ai o ia e lona tina e ave se ipu meaai i le fale o lona ‘Aunty’, e le mamao mai i le latou fale.  Ae o lona toe fo’i mai, sa valaau atu ai Ioane ia te ia ma fai atu ia te ia, e sau i le mea o lo o tu atu ai.

Na faamatala e le uso laititi, ina ua o’o atu i le mea sa tu mai ai Ioane, sa tago atu lenei alii ma opo mai o ia ma sogi atu i lona ua.  Sa mafai ona uunai ese e le uso laititi ia le ua molia mai ia te ia, ma tamo’e loa i le latou fale, ma faamatala i lona tina le mea na tupu.  Ae peitai, ina ua fesiligia e le tina ia Ioane, sa teena e Ioane tu’uaiga a le uso laititi.  Ae peitai, i se taimi mulimuli ane, i lea lava aso, na o’o atu ai Ioane ma lona toalua ma faatoese i le tina ma le uso laititi ma sa faamagaloina ai Ioane e le tina o le teineititi.

Ae peitai, sa faamatala e le uso laititi le toe tupu o seisi faafitauli ia te ia, ia Iulai 2021 a o la fai meaaoga ma le afafine o le ua molia, i le latou fale.  Ina ua sauni le uso laititi e alu i le latou fale, ae taunu’u atu loa Ioane i le fale.  Na faamatala e le uso laititi, na savali atu o le ua molia ma toe faia uiga mataga ia te ia, ae na te le i ta’uina i seisi seia vagana ai lona uso matua lea e aoga i Faasao Malisi.

Na faamaonia e le tina o nei teineiti le faamatalaga a le uso laititi i le faafitauli muamua ma lona faamagaloina o le ua molia ona sa o’o atu ma lona toalua ma faatoese e tusa ai ma le mea na tupu, ae peitai, e na te le i iloa na toe tupu seisi faafitauli.

O le aso 10 o Oketopa 2022 na lokaina ai Ioane, ma aveina atu i le ofisa a leoleo i Leoleo mo le suesueina o ia.  Ma sa ia tete’e i lona faia o ni uiga mataga i le teine matua.  

O lo o ua molia nei Ma’alona Ioane i faitauga e lua o le faia o amioga mataga, o faitauga e lua i le faaoolima faapea ma faitauga e lua i lona faia o ni amioga e ono a’afia ai fanau iti.

Ae i se ripoti mai i le ofisa a leoleo ia Aukuso 2001, na faasalaina ai e le Faamasinoga Maualuga ia Ma’alona Ioane, i le 15 tausaga i le falepuipui ona o lona faia o ni uiga mataga i se teineititi talavou.