Pago Pago - AMERIKA SAMOA

TOE SOSOLA NISI PAGOTA

Ua fa’aauau pea ona tulai mai faafitauli i le to’ese autu a le malo i Tafuna, i le sosola so’o o pagota.  E toalua ni pagota na mafai ona fepe’ei i luga o le pa sima a le falepuipui ma sosola ese atu ai, na vaaia e nisi o le atunu’u ma o latou valaau atu ai i le ofisa a leoleo.  Na ta’ua e nei molimau, na o latou vaai i pagota ia e toalua i Fagaima, ua pasi atu ma le taxi stand a le 4-Kona, ma o lo o aga’i atu i Kokoland.

I le aso 9 o Setema, 2023 i le 3:54 i le aoauli, na faatopetope atu ai sui malu o le malo ina ua maua mai le ripoti, i le vaaia o pagota nei e toalua i le auala e agai atu i Kokoland.  Ma sa mafai ona toe pu’eina mai ai Wayne Gasolo ma Pati Lepou ma aveina atu i le ofisa a leoleo i Tafuna e faia ai ni suesuega.

Sa mafai ona faafeso’otaia e leoleo ia le Satini o lo o i le falepuipui ma sa faailoa mai e le Satini, sa faitauina e leoleo sa i le sifi ao ia pagota i le 3:15 i lea lava aoauli, ma sa atoa uma pagota i totonu o le falepuipui.

Ae sa faamatalaina e le alii pagota o Pati Lepou, na tatalaina i tua la’ua e se tasi o leoleo i le falepuipui, mai i a la sela ina ia mafai ona faamamaina sela.  Ma o iina na la taupulepule ai ma Wayne Gasolo e fepe’ei i luga o le pa sima i tua o le fale lea e loka ai la’ua.

Na ta’ua e Lepou, na mafua ona la sosola, ona sa ia maua tala ua ma’i lona tina ma sa mana’o e alu e asi si ona tina.

Ua toe lokaina nei ia nei alii ma ua toe faaopoopo ia i la’ua moliaga o le sosola ese mai i le falepuipui, ma se tinoitupe e ta’i $5,000 e totogi ona mafai lea ona tatala i tua mai i le falepuipui.

AOTO'A TUITASI

Na valaau se tina i le ofisa leoleo i Leone, mo se fesoasoani ona o se faalavelave na tulai mai i Malaeloa.  Ina ua taunu’u leoleo sa faamatalaina iai e lenei tina, e pasi mai lana taavale i luma o le fale o le ua molia, ae ona faalogoina se pa’o, e foliga mai o se mea na tau i lana taavale.  O le ua molia o le alii o Aoto’a Tuitasi.

Sa faamatala e le tina, na faatu lana taavale ma ia savali atu i le mea sa nofonofo mai ai Tuitasi ma nisi tagata ma ia tuuaia Tuitasi i lona togiina o lana taavale, ae peitai sa tali mai Tuitasi, e na te le iloa po o le a le mea lea e talanoa atu ai lenei tina.  Na fa’aauau ai lava le finauga a le fafine ma Tuitasi, ma i’u ina tu’i e Tuitasi le itu tauagavale o le foliga o le tina.

Sa faamatala e le tina i leoleo, ona o ia e faamama lona toto, na matapogia ai o ia ina ua tu’i o ia e Tuitasi.  Sa aveina atu e leoleo ia le tina i le falemai.

Na faamaonia le faaoolima o Tuitasi i lenei tina e se molimau sa ia faamatalaina i leoleo le afaina o le fofoga o le tina, ina ua tu’i e Tuitasi.  Ma sa ioe foi Tuitasi i leoleo, ina ua fesiligia po o ia sa faaoolima i le ua a’afia, ma na aveina atu ai loa Tuitasi i le ofisa a leoleo i Leone mo le fa’aauaina o suesuega.

Sa faamatala e Tuitasi, sa faia se latou inuga pia ma ana uo ina ua savali atu le ua a’afia ma tu’uaia o ia i lona togiina o lana ta’avale.  Na ta’ua e Tuitasi, ua fiu lava e taumafai e faato’ato’a le mataupu, ae peitai, i lona ita tele, sa ia po ina ai le itu tauagavale o le foliga o le tina.  Ma na ta’ua e Tuitasi, na mafua ona o’o lona lima i le ua afaina i lenei mataupu, ona ua fai sina le fa’aaloalo i lona fanua.

Ua molia nei Tuitasi i le faaoolima i le tulaga e tolu ma e $1,000 le tinoitupe ua faatulagaina e mafai ona tatalaina ai o ia mai i le falepuipui.

TEVITA FINAU

O le aso 9 o Setema, 2023 na o’o atu ai se valaau i le ofisa leoleo i Tafuna e ripotia ai se alii ua nofo ma togi le taavale a se tagata, a’o pasi atu i luma o le falesa Katoliko i Pava’ia’i.

I le 11:30 i lea lava po na feiloai ai leoleo ma le ua a’afia i lenei mataupu ma sa faamatala e lenei alii, a’o agai atu lana taavale i le itu i Sisifo, ma ia pasi atu ma le falesa Katoliko, sa faate’ia o ia i se tagata of uvae uliuli ma se ofu tino Ami, ua oso atu ma tauai lana taavale i ni ma’a.

Na taumafai leoleo e saili lea alii ae peitai, sa le i faamanuiaina a latou taumafaiga.  Ae i le 11:58 i le po lava lea, na toe valaau mai ai se isi i le ofisa a leoleo mo se fesoasoani ona o lona uso, le alii o Tevita Finau, lea o lo o faatupu vevesi i lo latou fale, i tua o le falesa Katoliko i Pava’ia’i.

Ina ua taunu’u leoleo sa faailoa atu iai e lona uso, o Finau la e i luma o le alatele ma e latou te le iloa le mafuaaga ua le fiafia ai.  Sa faamatala e le uso e faapea, na sau Finau i le fale o lo o laei ona ofu Ami ma amata ona faamisamisa atu ia te ia.  Ae ina ua valaau e lona uso ia leoleo, na sola ia Finau.

Na agai atu leoleo e saili le alii o Finau, ma maua atu o ia o lo o nofonofo i tafatafa o le alatele, ae peitai, e tu le taavale a leoleo, ae toa sola ese Finau.  Ae na mafai ona tuliloa e leoleo ma aveina atu loa o ia i le toese i Tafuna.

A o agai atu leoleo ma le alii o Finau i le ofisa leoleo i Tafuna, sa fa’aauau pea ona laulau vavale i sui malu o le malo ma ia lafo ni faaupuga taufaamata’u i leoleo.  Ae peitai, ina ua o latou taunu’u i le ofisa leoleo, sa musu le alii e fai sana faamatalaga i le mafuaaga ua toatama’i ai.

Ua molia nei Finau i moliaga e lua, o le faatupu vevesi i nofoaga lautele ma le faaleagaina o mea totino a isi.

E $1,000 le tinoitupe ua faatulaga e mafai ona tatala ai o ia mai i le falepuipui.