Pago Pago - AMERIKA SAMOA

MASALOMIA I LE FAAOOLIMA

Na valaau se tina i le ofisa leoleo i Leone mo se fesoasoani, ma ia tu’uaia sona tausoga i lona faaoolima i se tasi o ana tagata faigaluega.  Sa ta’ua e lenei mafine, le fa’alavelave o Willi Fa’ataualofa i galuega a se tasi o ana aveta’avale, a’o agai atu e ave sana uta palapala i Taputimu, i tafatafa o le mea o iai le kamupani faufale a le Silva’s.

Sa le gata i le faaoolima i le aveta’avale loli, ae na faapea foi ona tu’uaia Fa’ataualofa i lona tatalaina o le faitoto’a a le ave loli ma taumafai e toso mai le ave loli mai fafo o le taavale.

Ina ua taunu’u leoleo i le nofoaga sa tupu ai le faalavelave, sa o latou fa’atalanoaina nisi o le aufaigaluega a le Silva’s ma sa faamatala e le aufaigaluega, sa o latou faalogoina se taugaupu ma e le i umi, ae o latou vaaia se tagata o savali atu agai i le fale lea o lo o i leisi itu ala o le mea o iai le kamupani faufale a le Silva’s.

Na agai atu sui malu o le malo i le fale, ma o latou feiloai ai ma le tagata lea e suafa ia Fa’ataualofa.  Ma sa faamatala e Faataualofa i leoleo, lona toatama’i tele i le Sa’o o le latou aiga, le susuga Ma’ae, ona o lona manatu, e pule ia i le fanua lea o lo o la’u atu ai uta palapala.  Sa faamaonia e Faataualofa lona tago atu i le lima o le ave loli ma ia faatonuina o ia e taofi le toe la’uina atu o palapala ma ma’a i luga o lona fanua.

Ae o le taimi lea ua o’o ai le tina sa valaauina leoleo, i le ofisa a leoleo, faatasi ai ma le ave loli, mo sa la’ua fa’amatalaga i le mea na tupu.  Sa faamatala e le ave loli, a o faataunu’uina lana galuega, sa savali atu Fa’ataualofa mai i leisi itu auala ma vala’au atu ia te ia, e taofi lana galuega.

Ae sa fa’aauau pea ona faia le galuega a le ave loli, ma o iina na savali atu ai loa Faataualofa ma tatala le faitoto’a o lana loli ma taumafai e toso mai o ia i fafo mai i le loli.  Sa ta’ua foi e le ave loli, na avea le gaioga lea a Fa’ataualofa ma tulaga na toeititi o’o ai se tulaga faaletonu i isi na tu latalata atu i le ta’avale, ona o la sa tau solomuli lana taavale ae toso mai o ia e Faataualofa i fafo.

Na ta’ua e le aveta’avale, sa mafai ona fesoasoani le molimau, le alo tamaitai a Ma’ae, e taofiofi Fa’ataualofa.  Sa fa’ao’oina atu foi i le ofisa leoleo i Leone, mai i le Sa’o o le aiga, o lo o pu’eina ai le ata o Fa’ataualofa, a’o ia faia ni upu taufa’amata’u ma faaoolima i le ave loli.

Ua molia nei Fa’ataualofa i faitauga e lua o le faatupu vevesi i nofoaga faitele faapea ma le faaoolima i lona tikeri e tolu.  

E $500 le tinoitupe faatulagaina e tatalaina ai o ia i tua mai i le falepuipui.

FA’AMATA’U I SE AGAESE

Ua lokaina nei se alii e 38 tausaga le matua, ona o le fa’atupu vevesi i nofoaga faitele, ina ua masalomia i lona laulauvavale ma tau faifai ma fa’aoolima i se isi tamaloa.  O lo o masalomia foi le fa’aaogaina e le ua molia, ia se agaese, e tau fa’amata’u ai i le na a’afia i lenei mataupu.

I le aso 6 o Setema, 2023, na ulufale atu ai se tina ma sona alo tamaitai i le ofisa leoleo i Tafuna ma ripotia se fa’alavelave na tula’i mai i Pava’ia’i.

E tusa ai ma faamatalaga ma ni molimau tusitusia a le tina ma lona alo talavou, sa tu’itu’i leotele e se tagata le latou faitoto’a ma ina ua tatalaina e le alo tamaitai matua a lenei tina, ia le fale, na vaaia ai le ua molia o i fafo, o lo o fia talanoa ia “Tai”, lea sa i totonu o le fale i le taimi na tupu ai le fa’alavelave.

Sa faamatala e le tamaitai talavou, ina ua alu atu e valaau Tai (le uo teine a lona tuagane) sa ia va’aia le oso o le ua molia i totonu o lana taavale ma alu ese atu ma luma o le fale.  Ae peitai, i se taimi mulimuli ane, a o latou iai i luma o le fale, sa o latou va’aia le toe alu atu o le ta’avale a le ua molia, ma ia oso mai i fafo ma se agaese o lo’o u’u mai i lona lima.

Na faamatala e le tamaitai talavou, na savali atu le ua molia agai i lona tuagane, a’o u’u le agaese i lona lima, ma amata ona fa’afefe lona tuagane, ma toso mai lona tuagane, ma u’una’i aga’i i le pa a le latou tuaoi.  Sa ta’ua foi e le tamaitai talavou, o le taimi na ia va’ai atu ua sasalu le agaese a le ua molia agai i lona tuagane, o iina na ia oso atu ai loa ma u’u mai le lima o le ua molia, lea o lo o iai le naifi.

O le aso lava lea na ave faapagota ai e leoleo ia le ua molia, le alii o Vaisaulu Ekeroma mai lona maota i Vaitogi.

Na faamatala e le ua molia, o lona ita tele i lona afafine ona o lo o moemoe i le fale o lana uo tama i Pavaiai, na alu ai e su’e mai, ma ia va’aia ai lona afafine ma lana uo tama, i luma o le fale a le uo tama i Pavaiai.  Na ioe Ekeroma i lona u’uina o se agaese i lona lima, ma lona tuleia i lalo, o le uo tama a lona afafine.

O lo o ua molia nei Ekeroma i moliaga o le fa’ao’olima i lona tulaga e tolu ma e $1,000 le tinoitupe faatulagaina e tatalaina ai o ia mai i le falepuipui.