Pago Pago - AMERIKA SAMOA

MAUA I LUGA O MASINI PU’E ATA A LE FAAMASINOGA IA SE AVETA’AVALE NA SE’I LONA LAISENE AVETA’AVALE

I fa’amaumauga a le faamasinoga, o lo’o ua ta’ua ai le mauaina e le Masela a le fale faamasino, ia se alii ua se’i sona laisene aveta’avale ae na ona fa’afoeina atu se taavale i le fale faamasino.

O le taeao o le aso 7 o Novema, 2024, a’o mataituina e le sui Masela a le fale faamasino ia masini pu’e ata a le fale faamasino o Faamasinoga Faaleitumalo, sa ia va’aia ai le susuga ia Tavita Pula o oso mai totonu o se pikiapu – i le itu a le avetaavale.

Na toe siaki e le Masela o le fale faamasino ia fa’amaumauga a le faamasinoga e tusa ai ma Pula ma na fa’amaonia ai le se’i ina o le laisene a Pula.

O le taeao na soso’o ai, sa faapea ona fa’afeso’ota’i e le Masela o le fale faamasino ia Pula e tusa ai ma lenei mataupu ma fa’ailoa atu ia Pula le iai o se fa’atonuga mai i le faamasinoga mo le avefaapagotaina o ia.  Sa faapea ona talosagaina e le Masela ia Pula ina ia agai atu i le Faamasinoga Fa’aleitumalo.

Na fesiligia e Pula le mafuaaga o lona alu atu i le fale faamasino.  Sa faapea ona fa’ailoa iai e le Masela o le fale faamasino, le pu’eina o lona ata e masini pu’eata a le fale faamasino, o lo’o ia fa’afoeina se taavale, ae ua mae’a ona se’i lana laisene aveta’avale.

Sa fa’ailoa atu e Pula i le Masela o le fale faamasino, na mafua ona ia fa’afoeina le taavale i le fale faamasino, ona o se mataupu a lona atalii i le fale faamasino, sa mana’omia ai se pepa e fa’ao’o atu i le ‘probation officer’.

O le taeao lava lea, na o’o atu ai Pula i le fale faamasino ma na lokaina ai o ia ma taofia mo lona iloiloga i lea aoauli.

Sa molia Pula i le aveta’avale solitulafono, o se vaega ‘D’ i solitulafono mamafa, e mafai ona nofosala ai i le falepuipui i le va o le 90 aso ma le lima tausaga, po o se sala tupe e $5,000; po o faasalaga uma e lua.

E $1,000 se vaegatupe na fa’atulagaina mo le tatalaina i tua o le na molia, e faatalitali ai lona faamasinoga.

TU’UA’IA E LE FAFINE IA LONA TO’ALUA I LE SAUAINA O IA

O le taeao o le aso 21 o Ianuari, 2025, na fa’afeso’ota’i ai e se tina ia le Ofisa a Leoleo i Fagatogo ma lipotia iai le sauaina o ia e lona to’alua, i totonu o le la aiga.

E tusa ai ma fa’amaumauga a le faamasinoga, na agai atu leoleo i le nofoaga na tupu ai le faalavelave ma fa’atalanoaina ai le tina na a’afia.  Ma na ta’ua e lenei tina le lokaina o ia i fafo o le la potu moe, e lona to’alua, ae o lo’o ia taumafai e tapena lana tama teine mol ana talavai.  

O se taimi mulimuli ane, na ala mai ai i luga ia le na molia, ma amata ona ‘e’e i le tina, ona ua misi le talavai a le la tama.  Sa ta’ua e le tina lona le tali atu i lona to’alua, ae na savali i totonu o le potu a’o mulimuli atu lona to’alua ia te ia, ma ia tago i le u’u lona tuaua.

Na ta’ua foi e le tina le taumafai o lona to’alua, e titina o ia ma toso atu o ia i fafo mai le potu, ma ia fai atu i le tina, o le a fa’auma o ia ma susunu uma o latou lavalava.

Sa ta’ua e le tina na a’afia e faapea, na amata mai le la fe’ese’esea’iga ma lona to’alua ona o le masalosalo o lona to’alua (le na molia) ia te ia ma na iai se aso na faatali pasi ai e alu e faigaluega, ae alu atu le na molia ma lalau o ia i luma o tagata.

Ina ua mae’a ona fa’atalanoaina e leoleo ia le tina na a’afia, sa ia faasino i leoleo ia le potu o iai lona to’alua ma na faapea ona agai atu iai leoleo ma lokaina mai ai le na molia, ma aveina atu o ia i le ofisa a leoleo.

O moliaga a le to’alua a le tina na a’afia, na aofia ai le Faatupu Vevesi i totonu o le aiga ma le Fa’ao’olima i lona tulaga e tolu.  O nei moliaga, o tu’uaiga e a’afia ai sauaga i totonu o le aiga. 

O le moliaga o le faatupu vevesi, o se vaega ‘C’ i soligatulafono mama, e mafai ona nofosala ai i le falepuipui, i le o’o atu i aso e sefululima, po o se sala tupe e $300; po o faasalaga uma e lua.

O le moliaga o le fa’ao’olima, o se vaega ‘A’ i soligatulafono mama, e mafai ona nofosala ai i le falepuipui i le tausaga atoa, po o se sala tupe e $1,000; po o faasalaga uma e lua.

E $500 se vaegatupe na mafai ona faatulagaina, e tatala ai i tua le na molia, e faatalitali ai lona faamasinoga.