Pago Pago - AMERIKA SAMOA

LOKA SE ALII NA OSOFA’IA SE TAMAITAI I TOTONU O LONA FALE

I fa’amaumauga a le faamasinoga, o lo’o ta’ua ai le lokaina e leoleo o le susuga ia Luu Dinh Tu ma molia o ia i le Faatupu Vevesi i totonu o le fale a se tamaitai sa la fa’auo muamua, faapea lona solivale o le fale a le tamaitai, atoa ai ma le fa’ao’olima.

E tusa ai ma fa’amaumauga a le fa’amasinoga, na vala’au atu se tamaitai i le Ofisa a Leoleo i Tafuna, mo se fesoasoani, i le vaveao o Ianuari 29, 2025 ma ripotia atu le osofa’ia o lona fale e se alii na la fa’auo muamua, faapea ma le sauaina o ia.

E maua atu e leoleo ia Dinh Tu, lea ua molia i lenei fa’alavelave, o lo’o ta’oto’oto mai i luga o le moega a le tamaitai na a’afia.

Ina ua fa’atalanoaina e leoleo ia le tamaitai na a’afia, sa ia ta’ua e faapea, na tupu muamua foi se tulaga i lo la va ma le ua molia, ia Ianuari 26, 2025 lea na vala’auina ai foi e le tamaitai na a’afia ia leoleo.  Na o’o atu leoleo ma lokaina mai Dinh Tu, ae peitai, sa toe tatalaina i tua o ia i le aso 28 o Ianuari.

Sa faamatalaina e le tamaitai na a’afia, i leoleo, le alu atu o Dinh Tu (lea na molia) i lona fale ae sa fa’asaina e le tamaitai na a’afia, ia le ulufale atu o le na molia i totonu o lona fale.  Ae na mafai ona maua e le na molia ia le avanoa e ulufale atu ai i totonu o le fale a le tamaitai na molia, mai i le faitoto’a pito i tua o le fale.

Na ta’ua e le tamaitai na a’afia e faapea, ina ua mafai ona ulufale atu le na molia i totonu o lona fale, sa ia taumafai loa e sola agai i le faitoto’a pito i luma, ae na maua le na molia, i lona ulu ma toso mai o ia i totonu o le fale ma fasi ai o ia.

Sa ta’ua foi e le tamaitai na a’afia, e le nofo ia Dinh Tu i lona fale.  E maua atu e leoleo ia le na molia, o lo’o ta’oto mai i luga o le moega a le tamaitai na a’afia, ma o latou lokaina mai ai o ia.

O moliaga na fa’asaga ia Dinh Tu, na aofia ai le Faatupu Vevesi i totonu le aiga, o le Solivale o fanua ma fale a isi faapea ma le Fa’ao’olima i lona tulaga e tolu.

O nei moliaga, e a’afia ai sauaga i totonu o le aiga.

O le moliaga o le faatupu vevesi, o se vaega ‘A’ i solitulafono mama, e mafai ona nofosala ai i le falepuipui mo aso e sefululima, po o se sala tupe e $300; po o faasalaga uma e lua.

O le fa’asalaga o le solivale o fanua ma fale, e aunoa ma se fa’atagana,, o se vaega ‘B;’ i solitulafono mama, e mafai ona nofosala ai i le falepuipui i masina e ono, po o se sala tupe e $500; po o faasalaga uma e lua.

Ae o le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le falepuipui mo le tausaga atoa, po o se sala tupe e $1,000; po o faasalaga uma e lua.

E $1,000 se vaegatupe na fa’atulagaina e mafai ai ona tatalaina i tua ia le na molia, e fa’atalitali ai lona faamasinoga.

MOLIA SE ALII NA TAU FA’AMATA’U I SEISI ALII INA UA LE MAUA MAI AI SANA SIKALETI

O le po o Ianuari 27, 2025, na agai atu ai leoleo i tua o le Tedi i Fagatogo, e tali se valaau a se alii e nofo i luga o se va’a fagota, ina ua tau fa’afefe o ia e le susuga ia Ofele Punefu, i se niu, ina ua musu le na a’afia e tu’u ia Punefu se sikaleti.

E taunu’u atu leoleo i le nofoaga na tupu ai le faalavelave, o lo’o nonofo mai ai ni alii se to’alua, pe a ma le 10 futu le va.  Na talotalo mai le alii na a’afia i leoleo ma na ia fa’amatalaina i leoleo le alu atu o Punefu, lea na fagota i tua o le Tedi, ma aisi sana sikaleti.  Sa tali mai le alii na a’afia, ia Punefu, e $1 i le sikaleti.

Ae na tali atu Punefu, e leai sana tupe.  Ma alu ai i le pe’a i se niu ma toli mai se niu ma tu’u atu i le alii na a’afia ma toe aisi atu iai Punefu i se afa sikaleti.  Ae na tali mai iai le alii na a’afia, e leai ni ana sikaleti ta’i afa afa, ae fa’aauau pea ona aisi atu Punefu.

Na i’u ai lava ina palauvale atu Punefu i le alii na a’afia ma taumafai e tuli ese o ia mai tua o le Tedi.  Ma na u’u mai e Punefu le niu ma fa’afoliga lana togiina ai o le alii na a’afia.  Sa ta’ua foi e le alii na a’afia ia le savali ese o Punefu ae na fai atu ia te ia, e alu ese ae na te le fasiotia o ia.

O iina na valaau ai loa le alii na a’afia i le ofisa a leoleo, mo se fesoasoani.

E mae’a ifo ona fa’atalanoaina e leoleo ia le alii na a’afia, ae ua sola Punefu, ma na faapea loa ona tuliloaina o ia e leoleo, ma lokaina mai o ia.

O moliaga na faia faasaga ia Punefu, na aofia ai le Faatupu Vevesi, o se vaega ‘B’ i solitulafono mama, e mafai ona nofosala ai i le ono masina, po o se sala tupe e $500; po o faasalaga uma e lua.

Ma le moliaga o le Fa’ao’olima i lona tulaga e tolu, o se vaega ‘C’ i solitulafono mama, e mafai ona nofosala ai i le falepuipui mo aso e sefululima, po o se sala tupe e $300; po o faasalaga uma e lua.

E $500 se vaegatupe na fa’atulagaina, e mafai ona tatalaina ai le na molia, e faatalitali ai lona moliaga.

VALAAU E SE AIGA IA LEOLEO INA UA LE MAFAI ONA FA’ATO’ATO’A LE ATALI’I

O le afiafi o Ianuari 26, 2025, na fa’afeso’ota’i ai e se tina ia le Ofisa a Leoleo i Fagatogo e ripotia ai sona alo o lo’o fa’amisa i totonu o le latou aiga.

Na agai atu leoleo i le nofoaga na tupu ai le faalavelave ma e tusa ai ma fa’amaumauga a le faamasinoga, sa fa’atalanoaina e leoleo ia le tina lea na valaau mai i le ofisa a leoleo.

Ma na ia ta’ua le filemu o mea uma i totonu o le latou aiga ma o lona alo lea na tupu ai le fa’alavelave ma lona to’alua sa i le umukuka mo le gaseseina o le latou taumafataga.  Ae sa fa’ate’ia le aiga atoa ina ua alu atu le ua molia ma togi se laulau i totonu o le fale ma ato le faitoto’a o le fale.

Ina ua taumafai le tina e taofi le ua molia, ae lilium ai le atalii ma palauvale mai i lona tina ma fai mai iai, e leai sana feau.

Sa ta’ua e le tina lo latou taumafai e fa’ata’ita’i le na molia, ae na atili ai ona leotele ma i’u ina savali mai iai lona uso (uso a le na molia), ae peitai, na oso le na molia ma u’u mai se agaese ma taumafai e osofa’ia ai lona uso.

Na ta’ua e le tina le taofia o le na molia ae e le’i o’o i lona uso ma le agaese.  Ma e taunu’u atu leoleo, o lo’o i tua o le fale ia le na molia, ae peitai, e toe su’e atu ua leai seisi.

O le suafa o le na molia, o Clinten Tofaeono.  Ma sa maua e leoleo seisi valaau, a’o latou agai atu i le ofisa a leoleo, o le la ua toe fo’i atu le na molia, i le fale, ma toe fa’aauau ona fa’avevesi i lona aiga.

E taunu’u atu leoleo, o lo’o i totonu o le potu ia Tofaeono ma sa faapea ona avefaapagotaina o ia e leoleo ma aveina atu i le ofisa autu a leoleo i Fagatogo mo le fa’aauauina o a latou su’esu’ega.

I le faamatalaga tusia a Tofaeono, sa ia ta’ua ai e faapea, na fai le la umu ma lona tama i lena taeao, ae otegia ai o ia e lona tama.  Ma sa le fiafia o ia, ona o la na tiga lona tua ma lona ulu.  O le mea lea na alu ai i luma o le latou fale ma amata ona palauvale ai, ae alu atu lona ‘uncle’ i le fasi o ia ma na atili ai ona le fiafia Tofaeono.

O le mea lea na alu ai i totonu o le fale ma togi le laulau ma ato le faitoto’a.  Ona ia tago lea u’u mai se agaese ma savali agai i fafo o le fale.

E le’i maua e leoleo ia le agaese.

O moliaga na faia faasaga ia Tofaeono, na aofia ai le Faatupu Vevesi i totonu o lona aiga ma le Fa’ao’olima i lona tulaga e tolu.  O nei moliaga, o ni vaega ‘C’ i solitulafono mama, e mafai ona nofosala ai i le falepuipui i le o’o atu i aso e sefululima, po o se sala tupe e ta’i $300 i le moliaga, po o faasalaga uma e lua.

E $5,000 se vaegatupe na fa’atulagaina e mafai ona tatalaina ai le na molia, e faatalitali ai lona faamasinoga.