Ads by Google Ads by Google

Pou Tiute a Leoleo


[ata: foa'i]

Pago Pago - AMERIKA SAMOA

MOLIA SE ALII NA ALU MA SE AGAESE I SE FALESU’ISU’I

Na lokaina e leoleo se alii ua molia nei ina ua masalomia lona fa’aaogaina o se agaese, e faamata’u ai le pule o se fale su’isu’i i Iliili. Ma o ia foi sa valaauina leoleo.

E tusa ai ma faamaumauga a leoleo, ua ta’ua ai e faapea, i le aso 20 o Novema, 2023, na valaau ai e Liliu Scanlan ia leoleo ma ta’u i leoleo, o lo o iai se tagata i totonu o le fale su’isu’I a le ‘Flora’s Sewing Shop’ ma o lo o u’uina e lea alii ia se fana, o lo o fa’alala i le pule o le fale su’isui’i.  Ina ua toe valaau mai leoleo I le telefoni, na tali e le susuga Bob Tinae ma sa ia faamatalaina i leoleo se tamaloa ma sana agaese, sa ia fa’aaogaina le telefoni e valaau ai leoleo.

Ina ua taunu’u leoleo i le nofoaga o tupu ai le faalavelave, na vaaia e leoleo le faia o se talanoaga a Scanlan ma ni alii se toalua.  Sa agai atu leoleo i le fale su’isu’i ma faatalanoaina le pule o le fale su’isu’i, o Floradelize Bautista.  Ma na faamatala e Bautista, na alu atu Scanlan I lona fale suisui ma e’e atu ia te ia mo tupe e totogi ai le fale o lo o iai le fale suisui.

Ua ta’ua i faamaumauga a leoleo, molimau a Bautista, i uiga taufa’amata’u a Scanlan ma sa fefe tele ia Bautista ona sa alu atu Scanlan ma se agaese, e foliga mai o le a fasiotia o ia.

O lea na valaau ai loa Bautista i sana uo e alu atu, ona o lona fefe aemaise ai lona le malamalama i faamatalaga o lo o taualaga e Scanlan.

Sa faamatala e Bautista i leoleo, ina ua alu ese Scanlan, sa ia sulufai loa i le fale a lona tuaoi ina ia mafai ona valaau leoleo.  Ina ua fesiligia o ia pe na te masani ia Scanlan, sa tali Bautista, e na te le i vaai lava i lea tagata ona e le nofo i le latou eria.

Na lokaina loa e leoleo ia Scanlan ma aveina atu i le ofisa leoleo i Tafuna mo le suesueina, sa aveina foi e leoleo le agaese a Scanlan.

Ina ua suesueina o ia e leoleo, sa faamatalaina e Scanlan, ina ua fiu e tu’itu’i i le faitotoa a Bautista, ae le tali mai lava seisi, o le mafuaaga lea na ia tu’itu’i leo tele ai, ona masalo ai o moe Bautista.  Ma sa ia ta’ua foi, na o le pau lava le mafuaaga na alu ai i le fale su’isu’i, o le aoina o le tupe totogi o le fale ina ia mafai ona lafo i lona tama o lo o i atunu’u mamao.

Sa faamatala foi e Scanlan, na alu ese ma toe fo’i atu, ma o iina na ia lagona ai ni tagata o talanoa i totonu o le fale, ae peitai, na fiu foi e tu’itu’i, ae leai lava seisi e sau i le faitotoa.

O iina na ia manatu ai, ai o tupu se faalavelave i totonu o le fale.  Ma ina ua ia tilotilo i totonu o le fale, na ia vaaia se tamaloa e leai ni foliga, o lo o taofi faamalosi le pule o le fale suisui.  O le mafuaaga lea na tauvalaau ai i le tamalo e tu’u saoloto le pule o le fale su’isu’i ae tali atu le tamaloa, pe manao e fana o ia (Scanlan).

Na ta’ua e Scanlan, o iina na fefe ai loa ma alu i le fale o Tinae e fa’aaoga lana telefoni e valaau ai leoleo

Ae peitai, o lo o ta’ua i faamaumauga a leoleo, e tusa ai ma a latou suesuega, na alu Scanlan i le fale su’isu’i ma faatupu vevesi ai i le pule o le fale su’is’u’i, ma faafefe o ia i se agaese ma taumafai e ulufale i totonu o le fale su’isu’i e aunoa ma se mafuaaga.  E le gata i lea, ina ua faapea mai Scanlan sa ia faalogoina ni tagata se toatele o talanoa i totonu o le fale, o lo o tautatala i le gagana Samoa, ae e na o le pule o le fale su’isu’i, o lona toalua ma le la tama, e nonofo i totonu o le fale su’isu’i. 

 Ae e le i iai le toalua ma le alo o le pule o le fale su’isu’i i le taimi na tupu ai le faalavelave.  E le gata i lea, e Filipino le aiga atoa.

Ua molia nei Scanlan i  moliaga e tolu, e aofia ai le Faatupu Vevesi i nofoaga faitele, lea e mafai ona faafalepuipui ai se tagata i le 6 masina pe sala tupe e $500; po o faasala uma e lua.  O lo o molia foi o ia i le Faaoolima i lona tulaga e tolu, lea e mafai ona faasala ai se tasi i le falepuipui mo aso e 15 po o se sala tupe e $300; po o faasalaga uma e lua.  Atoa ai ma le moliaga o le Ave Faapagota sese o se tagata, lea e mafai ona nofosala ai se tasi i le falepuipui mo le 12 masina, po o se sala tupe e $1,000; po o faasalaga uma e lua.

TAOFI I LUGA O LE AUALA AE MOLIA AI I MOLIAGA E FA

Na lokaina mai ina ua taofia lana taavale i luga o le aualatele, se alii na maua ua le toe aoga le laisene ma le inisiua a lana taavale ma e leai foi sona laisene avetaavale.

E le i ta’ua i totonu o faamaumauga a leoleo, le mafuaaga na ripotia ai e leoleo ia le laisene o le taavale a lenei alii, i lo latou ofisa autu, ona o lo o aga’i atu le taavale i Sasa’e, ae o lo o mataituina e leoleo ia taavale o lo o agai i Sisifo, i tafatafa o le aoga a Matafao.

O lea ua molia ai nei Mark Maiava, le avetaavale, i moliaga e fa, e aofia ai le tulaga faaletonu o le laisene a le taavale, lea e mafai ona nofosala ai se tasi i le falepuipui, i le 5 tausaga, po o se sala tupe e $5,000; po o faasalaga uma e lua. 

O lo o molia foi Maiava i le leai sona laisene avetaavale, o se solitulafono e mafai ona faasala ai se tasi i le falepuipui mo le ono masina, pe sala tupe e $500; po o faasalaga uma e lua.

Atoa ai ma le moliaga o le Laisene ua le uma lona aoga, o se solitulafono e mafai ai ona faafalepuipui se tasi i le ono masina, pe sala tupe e $500; po o faasalaga uma e lua.

O lenei faalavelae, e pei ona ta’ua i faamaumauga a leoleo, sa tulai mai i le taeao o le aso 9 o Oketopa, 2023; a’o faia leoleoga a leoleo i luga o le alatele mo taavale o lo o agai mai i le itu i Sisifo, i tafatafa o le aoga a Matafao i Faga’alu.  

O lo o ta’ua foi i faamaumauga a leoleo e faapea, na masalomia e leoleo ia le laisene o le taavale a Maiava, ona e foliga mai na tusia e se tagata le numera ’24 i luga o le pepa o le laisene.  Ae ina ua tapa e leoleo ia le inisiua ma le laisene avetaavale a Maiava, sa le i mafai ona tu’uina atu e Maiava.

O lea na ave fa’atasi Maiava ma lana taavale i le ofisa autu a leoleo i Fagatogo.  Ma na fesiligia ai iina Maiava po o ai na tusia ia fuainumera o le ’24 i luga o le laisene a lana taavale, sa tali Maiava, o ia.