Pago Pago - AMERIKA SAMOA

TOLU TA’AVALE LAVEVEA INA UA ‘OVA LE FA’ASUA’AVA O SE TASI O AVETA’AVALE

O le afiafi o le aso 22 o Mati, 2025 na fa’afeso’ota’i atu ai e le Ofisa Leoleo i Fagatogo ia leoleo i luga o le alatele i Malaeimi, e tusa ai ma se fa’alavelave tau ta’avale i luma o se ‘taxi stand’ i Fagaima, na a’afia ai ni ta’avale se tolu.

Ina ua taunu’u leoleo, sa molimauina ia ni ta’avale se lua i luga o le alatele, o lo’o faasaga leisi i Sisifo ae o leisi i Sasa’e.

Sa va’aia foi ni tagata o latou li’o ina se alii o lo’o saofa’i i luga o se ma’a tele.  O le suafa o lea alii, o Henry Penitito, lea na molia i lenei mataupu, ma o ia sa fa’afoeina le ta’avale na mafua ai ona tupu le fa’alavelave.

E tusa ai ma faamatalaga a le tele o molimau sa iai i le taimi na tupu ai le fa’alavelave, sa aga’i atu le ta’avale a Penitito i le itu i sisifo ma na saoasaoa le alu o lana taavale, ona ta lea o lana taavale aga’i i leisi itu o le alatele, lea o lo’o o atu ai ta’avale e agai i Sasa’e.

O le ta ina e Penitito o lana taavale i leisi itu o le alatele sa ia so’aina ai ni ta’avale se lua, o lo’.o agai atu i Sasa’e.  O se tasi o ta’avale sa lavea ia Penitito, na iai i totonu ia se tina matua.  O leisi ta’avale na manaomia ia se ta’avale toso, e mafai ona tosoeseina ai mai luga o le auala.

Sa fesiligia e leoleo ia Penitito pe mana’omia se auaunaga a le EMS, sa ia tali mai e leai, ae ua faanoanoa ona o le fa’alavelave ua tupu.

Na fesiligia foi o ia pe iai sana laisene aveta’avale, sa tali le alii ioe, ae peitai, e le o ia te ia, i le taimi lena.  Ae sa mafai ona ia tu’uina atu lana ID femalaga’i, e fa’amaonia ai lona tagata.

Sa faapea foi ona fesiligia Penitito pe sa ia tagofia se ‘ava malosi i lea aso, sa ia tali ioe.  E lima ni fagu pia lapopo’a sa ia taumafaina i lona fale.  Ma sa lagonaina e leoleo le malosi o le manogi pia o le alii ma le mumu o totonu o ona mata.

Na faapea foi ona faia e leoleo ia su’esu’ega masani e fa’amaonia ai le tagofia e se aveta’avale o le ‘ava malosi ma sa faapea ona fa’amaonia uma i nei su’ega le fa’asuaava o Penitito i lea afiafi.

O moliaga na molia ai Penitito, na aofia ai le Aveta’avale le fa’autauta, o se solitulafono mamafa, i le vaega ‘D’, e mafai ai ona nofosala i le falepuipui i le va o le 90 aso ma le lima tausaga, po o se sala tupe e le silia ma le $5,000; po o faasalaga uma e lua.

Faapea ma le moliaga o le aveta’avale a’o fa’asuaava, o se vaega ‘A’ i solitulafono mama, e mafai ona nofosala ai i le falepuipui, i le o’o atu i le tausaga atoa, po o se sala tupe e $1,000; po o faasalaga uma e lua.

Ma le moliaga o le aveta’ava’avale le fa’autauta, o se vaega ‘C’ i solitulafono mama, e mafai ona nofosala ai i le falepuipui, i le o’o atu i aso e 15, po o se sala tupe e $300; po o faasalaga uma e lua.

Atoa ai ma le moliaga o le le leai o se laisene aveta’avale, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

E $5,000 se vaegatupe na fa’atulagaina e mafai ona tatalaina ai le molia, e faatalitali ai lona faamasinoga.

TU’UA’IA E SE FAFINE LONA TO’ALUA UA LA TETE’A, I LE SAUAINA O SE LA TAMA TEINE

O le taeao o le aso 3 o Aperila, 2025, na sulufa’i atu ai se tina i le Ofisa a Leoleo i Tafuna, ma ripotia i leoleo ia le sauaina e lona to’alua, ua o la tete’a, ia sona alo teine laititi.

[Ua faapea ona le lomiaina suafa o i latou sa a’afia ma molia i lenei fa’alavelave, aua le puipuiga o fanau iti.]

Sa faamatalaina e le tina na o’o atu i le ofisa a leoleo, i leoleo, o le aso muamua o Aperila, 2025, na alu atu ai lona alo ma lona vae tauagavale, ua fula, i luga teisi lava o lona tulivae ma sa ia tapu’eina ata o le manu’a ma ia fesiligia lona alo pe na fa’apefea ona tupu lea tulaga.

Na fa’amatalaina e le teineititi na a’afia, i lona tina, le po ina o ia e lona tama a’o la iai i totonu o le ta’avale a lona tam.

Sa fa’atalanoaina e leoleo ia le teineititi na a’afia, i luma o lona tina, e tusa ai ma le faafitauli sa tupu.  Na ta’ua e le teineititi, e faapea, a’o la agai atu ma lona tua’a e momoli atu o ia i le fale o lona tina, sa su’esu’eina o ia e lona tua’a, e uiga i lona tina.  Ae sa ita lona tua’a i ana tali, ma ia fa’atu fa’afuase’i ai le taavale ma ‘e’e atu ia te ia.

Na ta’ua foi e le teineititi na a’afia, le po malosi e lona tua’a, o lona vae ma sa ia lagonaina le tiga ma mulimuli ane, sa ia le toe lagonaina se tiga i lona vae.  

Sa ta’ua e le tina o le teineititi, lona aveina o lona alo i le vaega a le ‘Child Protective Services’ i le aso 2 o Aperila mo ni a latou suesuega.  Ma sa fa’ailoa atu ai e le ofisa ia te ia, e le mafai ona gaioi le vaega a le CPS se’ia mae’a ona failaina se tagi a le tina e faasaga i lona to’alua tete’a.

O moliaga sa faila faasaga i le tua’a o le teineititi, na aofia ai le Faatupu Vevesi i totonu o le aiga, Fa’ao’olima i lona tulaga e tolu ma le faia o se gaioiga e afaina ai le saogalemu o se fanau iti.

O le moliaga o le faatupu vevesi, o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300; po o faasalaga uma e lua.

O moliaga o le fa’ao’olima ma le faia o se tulaga e afaina ai se fanau iti, os e vaega ‘A’ i solitulafono mama, e mafai ai ona nofosala ai i le falepuipui, e o’o atu i le tausaga, po o se sala tupe e $1,000; po o faasalaga uma e lua.

E $2,000 se fa’atulagaina e tatalaina ai le na molia mai i le falepuipui, e faatalitali ai lona faamasinoga.