Pago Pago - AMERIKA SAMOA

LOKAINA E LEOLEO FANAU TALAVOU MATUTUA MA FANAU A’OGA MAUALULUGA ONA O LE TAGOFIA O ‘AVA MALOLOSI

O le taeao o le aso 11 o Aperila, 2025, e pei ona ta’ua i fa’amaumauga a le faamasinoga, na faapea ona fa’afeso’ota’i ai e se sui pulea’oga, ia le Ofisa a Leoleo i Fagatogo, e tusa ai ma ni fanau a’oga o lo’o inu pia i  luga o se matafaga, e tu lata i le a’oga, ae o le taimi lea o lo’o faia ai a’oga.

E to’aiva ni alo ma fanau, sa ave faapagotaina e leoleo mai i lea fa’alavelave.  Ae na molia e leoleo ia le vaega matutua o nei fanau talavou, lea na aofia ai Miracle Alaiilima, Toa Toeitititi, Samasoni Finauga ma Elmaine Lavasi’i, i lo latou tagofia o ‘ava malolosi i lalo o tausaga fa’atulafonoina.

Ina ua o’o atu leoleo i le nofoaga sa tupu ai le fa’alavelave, sa faapea ona o latou fa’atalanoaina le sui Puleaoga, lea sa ia fa’amatalaina i leoleo, lona mauaina atu o nei tamaiti, o fai mai le latou inuga pia ma ulaula, i totonu o se fale i autafa o le matafaga, ma ia vala’auina ai loa leoleo.

Mai i le to’aiva sa maua atu e leoleo, e to’alima i latou, na i lalo ifo o le 18 tausaga – e to’afa ni tamaitai ma ni ali’i se to’atolu.  O leisi vaega e to’afa, ua atoa lo latou ta’i 18 ma le 19 tausaga – e to’atolu alii ma se tamaitai e to’atasi.  

Sa mauaina atu ai foi i le nofoaga lava lea, ia ni apa pia, o ni pusa sikareti, o se afi ma se ‘vape’.

Ina o ave faapagotaina e leoleo ia latou uma e to’aiva, sa faapea ona lagonaina le malosi le latou manogi pia .  Ma ina ua o latou taunu’u i le ofisa a leoleo, sa faapea ona fa’amaumauina o latou suafa, tausaga, ma faamaumauga mo matua.  Ona logoina lea o latou matua, e agai atu i le ofisa a leoleo.

O se taimi mulimuli ane, sa faapea ona moliaina ia le vaega matutua, ae o le fanau talavou laiti, sa faapea ona su’esu’eina ta’itasi i latou, i luma o latou matua.  Ma na o latou fa’amaonia ia lo latou tagofia uma, o ‘ava malolosi sa fa’atauina e Miracle Alaiilima.

Sa toe tu’uina atu fanau talavou i a’ao o latou matua ma fautuaina matua, i le aso e tatau ona o’o atu ai i luma o le Fa’amasinoga Fa’aleitumalo, mo a latou iloiloga.

Na lokaina Alaiilima i le to’ese i Tafuna i lea aso, e faatalitali ai lona fa’amasinoga, ae o Lavasi’i, Finauga ma Toeitititi sa toe tatalaina i tua.

O le tausaga fa’atulafonoina e mafai ona tagofia ai ‘ava malolosi i totonu o Amerika Samoa, o le 21.

O Alaiilima, Toeitititi, Finauga ma Lavasi’i, na molia uma i le Tagofia o ‘ava malolosi i lalo o tausaga fa’atulafonoina, o se vaega ‘B’ i solitulafono mama, e mafai ona nofosala ai i le o’o atu i masina e ono, po o se sala tupe e $500; po o faasalaga uma e lua.

Faapea ai ma le moliaga o le faia o se latou inuga pia, i se nofoaga faasaina, o se vaega ‘B’ foi, i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500 po o faasalaga uma e lua.

O le moliaga fa’aopoopo a Alaiilima, o le Faia o se gaioiga e ono a’afia ai le saogalemu o fanau iti, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

E leai ni vaegatupe sa fa’atulagaina, na tatalaina ai i latou mai i le falepuipui, e fa’atalitali ai o latou faamasinoga.

MOLIA SE TAMAITAI FA’ASUA’AVA MA SIVA I LUGA O LE ALATELE

O le aso 16 o Aperila, 2025, na agai atu ai leoleo, e tali se vala’au na o’o mai i le ofisa a leoleo, e tusa ai ma se tamaitai, o lo’o palauvale ma siva solo i luga o le alatele.

E tusa ai ma fa’amaumauga a le faamasinoga, o le tamaitai o Muamua Sani, e 21 tausaga le matua, na fiu leoleo e fa’atonu e alu ‘ese ma luga o le auala, aua le puipuiga o lona saogalemu faapea le saogalemu o le mamalu lautele o feoa’i i luga o le alatele.

Ae peitai, sa musu le tamaitai e alu ‘ese ma fa’aauau ona siva ma ‘e’e ma palauvale i luga o le auala.

Na faapea loa ona ave faapagotaina o ia e leoleo, ma momoli atu i le ofisa a leoleo i fagatogo ma i’u ai ina lokaina o ia i le to’ese i Tafuna, e fa’atalitali ai lona faamasinoga.

O le moliaga na faia fa’asaga ia Sani, sa aofia ai le Fa’asua’ava i luga o le alatele, o se vaega ‘B’ i tulafono mama, e mafai ona nofosala ai i le o’o atu i le ono masina, po o se sala tupe e $500; po o faasalaga uma e lua.

E leai se vaegatupe na fa’atulagaina e mafai ona tatalaina ai le na molia, e faatalitali ai lona faamasinoga.