Pago Pago - AMERIKA SAMOA

LIPOTI E SE TAMALOA LONA AFAFINE I LEOLEO

I le aso 5 o Tesema, 2023 na lokaina ai e leoleo ia Vaioa To’oalo i le faatupu vevesi i totonu o lona aiga i Nu’uuli.

Ua molia nei o ia i le faitauga e tasi o le Faatupu Vevesi i nofoaga faitele, lea e mafai ona faasala ai o ia i le falepuipui i le ono (6) masina, po o se sala tupe e $500; po o faasalaga uma e lua.

E tusa ai ma fa’amaumauga a le malo, o lo o ta’ua le viliina e se tama o le ofisa a leoleo i Tafuna ma lipoti iai lona afafine, lea sa faatupu misa ma save’uina le filemu i totonu o le latou aiga, e ala i le palauvale i ona tua’oi.

Sa faapea ona agai atu leoleo i le aiga o To’oalo ma lokaina mai ai o ia, ina ua mae’a ona o latou talanoa ma le tua’a o lenei tamaitai.

O lo o iai se talitonuga a lenei tama, ua a’afia si ona afafine, i fuala’au fa’asaina, aua o lana masani lea, o le fa’apisa i totonu o le latou aiga.

Na fa’amatalaina e le tama i leoleo; na fa’ate’ia o latou tuaoi ina ua fa’amisa ma palauvale atu lona afafine ia i latou, ma sa taumafai o latou tauoi e fa’ato’ato’a le mataupu, ae peitai, sa le mafai ona to’a le ua molia.

Na fa’amaonia e lenei tama lona popole tele i le saogalemu a ia ma lona to’alua, aua e le o se taimi muamua lea ua fai ai e lona afafine nei tulaga.

Sa fa’atalanoaina foi e leoleo ia se molimau na iai i le taimi na tupu ai le fa’alavelave, ma sa ia ta’ua le matuai fiu o le tua’a a lenei tamaitai ma ona tuaoi, e fautuaina o ia.

Ina ua fa’atalanoaina e leoleo ia To’oalo, sa ona te’enaina ripoti e faapea sa palauvale i ona matua; ae sa ia ta’ua, na o ona tausoga ia e latou te tuaoi, na palauvale iai.

Ua lokaina nei To’oalo e fa’atalitali ai lona fa’amasinoga.

MOLIA NI ALII SE TOALIMA I LO LATOU FASI TELE O SE ALII 22 TAUSAGA

Sa lokaina mai e leoleo ia ni alii se to’alima i le 3:10 i le vaveao o le aso Sa, Tesema 3, 2023, ona o moliaga i lo latou fa’ao’olima i se alii e 22 tausaga, e suafa ia Charlie Tago.

Sa aveina uma i latou nei e to’alima i le to’ese i Tafuna.

Sa faamatala e Tago i leoleo, na paka le latou ta’avale i le pakaga a McDonald’s, ae sa iai seisi ta’avale na paka i autafa.  Ae o lona oso mai i lalo mai i le latou ta’avale, ae tau ai lona tino i le ta’avale lea sa tu i autafa, ma o iina na tupu ai loa le fa’alavelave.

Ua molia nei ia Kuoli Fautasi, Tiapula Puni, Vaifanua Peko, Meki Ta’ase ma Jay Matautia i moliaga e lua, e aofia ai le Faatupu Vevesi i nofoaga faitele ma le Fa’ao’olima i lona tulaga e tolu.  O le moliaga o le faatupu vevesi, e mafai ona nofosala ai i le falepuipui mo le ono (6) masina, po o se sala tupe e $500; po o fa’asalaga uma e lua.  O le moliaga o le Fa’ao’olima, e mafai ona fa’asala ai se tagata i le falepuipui mo le tausaga e tasi (1), po o se sala tupe e $1,000; po o fa’asalaga uma e lua.

I le aso 3 o Tesema, 2023, na vala’au ai se tagata i le ofisa a leoleo, e lipoti iai se alii o lo o fasi e ni tagata se to’alima.  Ina ua taunuu atu leoleo, sa molimauina e leoleo ia le tu’i ina e Fautasi o Tago ma pa’u ai i lalo ia Tago, ma matapogia ai.

Sa aveina uma e leoleo ia i latou na aofia i lenei fa’alavelave i le ofisa a leoleo mo le suesueina.

Ma e tusa ai ma fa’amaumauga a le malo, sa faamatalaina e le molimau lea na valaauina leoleo, e  faapea, sa ia lagonaina se vevesi i ta’avale ia sa paka i tafatafa o lana ta’avale, ma ia va’aia ai ni alii se to’afa, o kikiina ia le ua a’afia i lenei fa’alavelave.  Sa faamatala foi e le molimau, a’o ta’atia Tago i luga o le sima, sa fa’aauau ona tatu’i ma ta kiki o ia, ma fa’amanu’alia ai ona lima ma ona tuli.  Sa faamaonia e le molimau, o Fautasi lea sa tu’iina Tago ma pa’u ai i lalo.  Atoa ai ma leisi to’afa, o Puni, Peko, Taase ma Matautia, na faia le sauniga o le tatu’i ma ta kiki ia Tago a’o ta’atia o ia i luga o le sima.

Ina ua mae’a ona togafitia manu’a a Tago e le EMS sa ia faamatalaina loa e faapea, sa tau lona tino i le ta’avale lea sa i autafa o le latou ta’avale, ina ua oso mai i fafo.  O le ta’avale lea na i autafa, o se pikiapu, ma sa ta’ua e Tago, le feosofi atu o tagata na i tua o le pikiapu lea ma fasi o ia.   Sa ta’ua e Tago lona taumafai e kava ona foliga ma sola ese, ae ua to’atele i latou.  Ae ina ua mafai ona ia savali ese, sa tautevateva lana alu, ae toe tu’i o ia e seisi alii ma tau i lona gutu ma matapogia ai loa.

Ina ua su’esu’eina i latou ua molia, sa faamatala e Fautasi, sa ia fa’alogo atu o fufusu mai Tago ma ‘ana tama’ ma o le mea lea na oso atu ai ma tu’i le gutu a Tago.

Sa te’ena e Puni ma Mata’utia, le faia o ni a la faamatalaga, e tusa ai ma le fa’alavelave.

Ae na fa’amatala e Peko, e leai sana mea sa faia.  Sa pau lana mea sa fai, o le fai atu ia Tago e vaai lana ta’avale, ona o lona popole ina ne’i leaga lana ta’avale, ae na te le i pa’i ia Tago.

E tusa ai foi ma isi faamaumauga a leoleo, o le fa’asuaava tele o le alii lea o Ta’ase, sa le malamalama ai i ni fa’atonuga na tu’uina atu e leoleo ia te ia i lea po.

E ta’i $1000 tupe faatulagaina e mafai ona tatala mai ai i latou nei mai i le falepuipui, e fa’atali ai a latou fa’amasinoga.

LOKA SE TAMALOA I LE FAAPISA ONA UA LE KUKAINA E LE FAFINE SANA MEA’AI

O le aso 3 o Novema, 2023 na lipotia ai e se tina ia lona to’alua i le ofisa a leoleo i le faatupu vevesi i lo latou aiga, ona ua le saunia e le tina se mea tausami a lona to’alua.

Ua molia ai nei Matega Tauefu i solitulafono e lua, e aofia ai le Faatupu vevesi i nofoaga faitele ma le Fa’aleagaina o mea totino, i lona tulaga e tolu.

O le solitulafono o le Faatupu vevesi, e mafai ona nofosala ai se tasi i le falepuipui i le ono (6) masina, po o se sala tupe e i le va o le $150 ma le $500; po o fa’asalaga uma e lua.

O le solitulafono o le Fa’aleagaina o mea totino i lona tulaga e tolu, e mafai ona fa’asala ai se tasi i le falepuipui i le ono (6) masina, po o se sala tupe i le va o le $150 ma le $500; po o fa’asalaga uma e lua.

E tusa ai ma fa’amaumauga a le malo e faapea, o le aso 3 o Novema, 2023 na valaau ai e le to’alua a Tauefu ia leoleo ina ua alu atu Tauefu i le latou fale i Kokoland, o lo o fa’asuaava ma amata ona faamisa.

Ina ua taunu’u atu leoleo i le fale o le aiga, sa fa’asino ifo iai e le tina o le aiga ia le mea o lo o iai Tauefu ma le faamatalaga a le tina, o lo o fa’ataga moe.  Sa lokaina mai e leoleo ia Tauefu ma tu’uina o ia i totonu o le ta’avale a leoleo, ma o lo o ta’ua i fa’amaumauga a leoleo le lagonaina le manogi pia o le ua molia.

Sa fa’atalanoaina e leoleo ia le tina o le aiga i lona maota ma sa ia faamatalaina e faapea, na manava atu o ia i le fale i lena aso, ae ua toatamai lona toalua, ona ua leai se meaai o saunia.

O lo o ta’ua foi i ripoti e faapea, i le ita tele o Tauefu, na amata ai ona ia tau’aia mai i fafo o le fale ia se ili uila, o se sioki vai ma ni ipu ti.  Ona ia fa’afefeina lea o lona to’alua, i lona le faia o ona tiute fa’aletina.  Sa faamatala foi e le tina le lagonaina e ona tuaoi, o mea sa faia e lona to’alua.

Sa fa’atalanoaina foi e leoleo ia se tasi o tuaoi lea na ia faamatalaina lona lagonaina mai o lona ‘uncle’ (Tauefu) o palauvale i lona to’alua, ma tau’ai meafale i fafo mai i le latou fale.

Sa te’ena e Tauefu le faia o sana faamatalaga ma lokaina ai loa o ia.