Pago Pago - AMERIKA SAMOA

JUSTIN GAGO

I le aoauli o le aso 8 o Ianuari, 2024 a’o feagai leoleo ma o latou tiute masani i le tu’uaga o a’oga a fanay, sa faapea ona taofia ai latou e nisi i luga o le alatele, ona o se fusuaga a nisi o fanau aoga.

Sa va’aia e leoleo ia le alii 18 tausaga o Justin Gago, lea o lo o masani ai leoleo i isi mau fusuaga a fanau aoga, o tamo’e atu aga’i i se vaega o  faapotopoto mai ai ni tamaiti aoga, ma avau fusuaga.

Sa taumafai leoleo ma seisi alii na latalata ane, e vaovao le fusuaga a nei fanau aoga.  Ma na vaaia e leoleo ia le tamo’e o Gago agai i se taavale o lo o paka i tafatafa o le Su’igaula, ae ina ua o’o atu iai leoleo, sa fa’ailoa mai iai e Gago, o le ta’avale a lona tuafafine.

Ae sa aveina e leoleo ia Gago i le ofisa leoleo i Fagatogo ma fa’ai’u ai i le falepuipui i Tafuna, e faatali ai lona faamasinoga.

Ua molia nei Gago i le faatupu vevesi i nofoaga lautele, lea e mafai ona nofosala ai se tasi i le falepuipui, i le ono masina, po o se sala tupe e $500; po o fa’asalaga uma e lua.

E $500 le tinoitupe ua faatulagaina e mafai ona tatalaina ai Gago mai i le falepuipui e faatali ai lona fa’amasinoga.

MARK SEUMANUTAFA

O le afiafi o le aso 8 o Ianuari, 2024, na valaau ai se tina i le numera mo se lave’ai i faalavelave fa’afuase’i (911), ona o sona alo alii o lo o faatupu vevesi i totonu o le latou aiga.  

Ina ua taunuu leoleo i le fale a lenei tina, sa ia faamatalaina e faapea, na manava mai i galuega ae valaau atu lana tama mo leisi ki o le latou ta’avale ae ina musu le tina e faasino iai le mea o iai le ki, sa faapea ona fa’aali ai le le fiafia o lea atalii, i lona tina.

E le’i umi ona uma le talanoaga a le tina ma lana tama i luga o le telefoni, ae toe maua e le tina seisi telefoni mai i si ona ‘granddaughter’, o lo o valaau atu e ta’u atu le tau’ai solo e le alii o Mark Seumanutafa (le alo a le tina) ia mea i totonu o le fale, ma le faatupu vevesi.

Sa ta’ua e le tina, ona o lona pppole tele i le saogalemu a fanau a si ana fanau ma si ona tina matua, o lea na ia valaau ai i le ofisa a leoleo mo se fesoasoani.

Sa faamatala e le tina, e le o se taimi muamua lenei ua tula’i mai ai se faalavelave faapenei i le latou aiga.  Ma o uiga ia a lona alo e fa’aalia pe a le fiafia pe le maua le mea o mana’o iai.  

O le 6 i lea afiafi, sa lokaina ai e leoleo ia le ua molia ma aveina atu o ia i le falepuipui e faatali ai lona faamasinoga.

Ua molia nei Seumanutafa i le faituaga e tasi o le Faatupu Vevesi i totonu o lona aiga, ma o se solitulafono e mafai ona faafalepuipui ai, e o’o atu i le sefululima (15) aso po o se sala tupe i le va o le $150 ma le $300; po o faasalaga uma e lua.

E $300 le tinoitupe ua mae’a ona fa’atulagaina, e mafai ona tatala ai Seumanutafa i tua mai i le falepuipui, e faatali ai lona faamasinoga.

VAGATAI TUPA’I

O le aso 4 o Ianuari, 2024, na o’o atu ai se tina i le ofisa leoleo i Fagatogo e faila sana tagi e faasaga i lona tuagane, le susuga ia Vagatai Tupa’i, ma molia o ia i lona faia o ni uiga taufa’amata’u.

E tusa ai ma le lipoti a le tuafafine a Tupa’i, o lena taeao sa vaaia ai e le tuafafine ia le to’alua a lona tuagane, o fa’aaoga se faatanoa fufulu ipu i fafo lea e fa’aaoga uma e i latou, i fafo o le fale.  Ma sa va’aia e le tuafafine le liki mai o le vai mai i le faatanoa fufulu ipu, ma tafe atu i totonu o le fale.  Ma o lea, na ia otegiaina ai le to’alua a lona tuagane.

Ae atonu sa lagona mai e lona tuagane, lona otegiaina o lona to’alua, na savali mai ai ma ‘e’e atu ia te ia ma amata ona talepe le faatanoa fufulu ipu ma fa’aauau atu lana sauniga i le laulau ‘ai a le aiga, lea o lo o i fafo.

Sa ta’ua foi e le tuafafine le faafefeina o ia e lona tuagane, e faapea, o le a ia susunuina le latou fale.

O le 12 i le aoauli o lea lava aso, e tusa ai ma faamaumauga a leoleo, na agai atu ai leoleo i le maota o Tupa’i i Pago Pago, ma lokaina mai ai o ia.

I sana faamatalaga i leoleo, sa ia ta’ua ai lona le fiafia i lona tuafafine ona o le otegiaina o lona to’alua.  Ina ua fesiligia Tupa’i pe sa ia faafefeina lona tuafafine, i le susunuina o le fale, sa tali Tupa’i, ioe ae ona o lona ita tele i lona tuafafine, sa ia lafoina ai lea faamatalaga.

Ua molia nei Tupa’i i le Faatupu Vevesi, o se solitulafono e mafai ona lokaina ai se tasi i le falepuipui i le o’o atu i le sefululima (15) aso po o se sala tupe e $300; po o faasalaga uma e lua.