Pago Pago - AMERIKA SAMOA

FUSUAGA A USO

O le 9 i le po o le aso 6 o Ianuari, 2024, na valaau ai se tama loto mafatia, mai i le afioaga o Seetaga, e saili se fesoasoani mai i le ofisa a leoleo, ina ua fufusu ona atalii e to’alua, o Apelu Vilisinimisa ma Pati Ta’aloga, ae e le o malamalama le tama pe aisea ua fufusu ai.

Ina ua taunuu leoleo i le nofoaga na tupu ai le faalavelave, sa o latou talanoa ma se alii, ae na lilo i leoleo o se tasi lea o alii na a’afia i le vevesi.  Ina ua fesiligia e leoleo ia lenei alii po o ia lea sa faatupu vevesi i lo latou fale, sa tali lenei alii, e leai ma ia faapea atu i leoleo, o lea ua o ese le auuso lea na fufusu, mai i le fale.

Sa mulimuli ane, ona talanoa lea o leoleo ma le tama lea na valaau i le ofisa a leoleo ma sa ia faamatalaina i leoleo lona lagonaina se taugaupu i le va o Vilisinimisa ma Ta’aloga ae ina ua ia savali atu e va’ai po o le a le mea o tupu, ae ona vaaia alii nei e to’alua, ua fufusu.  Sa ta’ua e lenei tama lona taumafai e vaovao le fusuaga a ona atalii ae ua malolosi tele nei alii.

E tusa ai ma faamaumauga a leoleo, sa faamatalaina foi e lenei tama le taina e Vilisinimisa ia Taaloga i se ili uila ma o le mafuaaga lea na ia valaau ai loa i le ofisa a leoleo.  Na ta’ua foi e lenei tama le tulieseina o Vilisinimisa mai i le fanua.

Ina ua fesiligia e leoleo ia le tama po o fea e maua ai Vilisinimisa, sa tali le tama, o Vilisinimisa lea na latou talanoa ina ua o latou toa’i taunuu atu.  Na faapea ona toe agai atu leoleo i le alii lava lea e tasi na latou talanoa muamua, ma toe fesiligia o ia, po o ia lea na a’afia i le pisa, ae na toe tali Vilisinimisa, e leai.  Ae na fa’ailoa mai e le tama i leoleo, o Vilisinimisa lea na a’afia i le fusuaga.

Sa faapea loa ona lokaina mai e leoleo ia Vilisinimisa ma aveina atu loa o ia i le ofisa a leoleo i Tafuna mo le fa’aauauina o su’esu’ega.

Sa faamatalaina e se molimau, le lagonaina o le taugaupu a le au uso lenei ma ia vaaia le amataina o le fusuaga ma le taina e Vilisinimisa o Taaloga, i se ili uila, ma fa’aauau atu ai le la fusuaga i totonu o le umukuka.

Na fesiligia e leoleo ia molimau po o fea ua alu iai Taaloga, ae peitai, sa le i mautonu ia molimau po o fea o iai Taaloga talu ona tuli ese e lona tama mai i le fale.  Sa taumafai leoleo e saili ia Taaloga, ae peitai, sa le i maua o ia.  Sa faatonuina loa le tama ina ia faafeso’ota’i atu le ofisa a leoleo pe a toe fo’i mai Taaloga i le fale.

Ina ua faataunuuina le su’esu’ega o Vilisinimisa i le ofisa a leoleo, sa ia faamatalaina e faapea, a’o fai se latou inuga pia, na amata ona fia malosi lona uso ma sa ia faatonuina lona uso e alu e moe.  Sa ta’ua e Vilisinimisa, e na te le iloa po o le a le taimi na amata ai le la fusuaga ae e na te le i taina lona uso i se ili uila.

O lo o molia uma lenei au uso i le Faatupu Vevesi i totonu o aiga, o se solitulafono e mafai ona loka ai se tasi i le o’o atu i le sefululima (15) aso, po o se sala tupe i le va o le $150 ma le $300; po o fa’asalaga uma e lua.

MOLIA SE ALII I LE FAATUPU VEVESI I TOTONU O LONA AIGA

O le afiafi o le aso 15 o Ianuari 15, 2024, valaau ai se tina i le ofisa a leoleo i Tafuna, e lipoti ai lona to’alua, lea o lo o faavevesi i totonu o le latou fale i Vaitogi.

O le a le lomia suafa o i latou o lo o a’afia i lenei mataupu, ona o le puipuiga o fanau iti o lo o a’afia ai.

E tusa ai ma faamaumauga a leoleo, na agai atu i le fale o le tina na valaau ifo i le ofisa a leoleo  ma o latou talatalanoa ai.  Ma sa faamatalaina e le tina le palauvale solo o le tama o le aiga i totonu o le fale ma ia ta’eiina ipu ma nofoa.

Sa ta’ua foi e lenei tina lo latou fefefe ma si ana fanau ona o le fa’asuaava o le ua molia.

Sa aveina loa e leoleo ia le ua molia i le ofia a leoleo i Tafuna mo le su’esu’eina.  Ma sa ia faamatalaina i leoleo, e moni o ia o se tagata faatupu faalavelave, ae peitai, e na te le i faia mea ia sa faamatala e lona toalua.

Ua molia nei lenei alii i moliaga e lua, e aofia ai le Faatupu Vevesi i totonu o le aiga ma le Fa’aleagaina o Meatotino i lona tulaga e tolu.

O le moliaga o le faatupu vevesi, e mafai ona faasala ai se tasi i le falepuipui, i le o’o atu i le sefulu lima (15) aso po o se sala tupe i le va o le $150 ma le $300; po o faasalaga uma e lua.

Ae o le moliaga o le faaleagaina o mea totino, e mafai ona fa’afalepuipui ai se tasi i le o’o atu i le ono (6) masina po o se sala tupe e i le va o le $150 ma le $500; po o faasalaga uma e lua.

E $500 le tinoitupe ua faatulagaina e mafai ai ona tatalaina ai i tua le ua molia, e faatali ai lona faamasinoga.