Ads by Google Ads by Google

POU TIUTE A LEOLEO


[ata: foa'i]

Pago Pago - AMERIKA SAMOA

FA’ATAU KOME

O le aso 27 o Ianuari, 2024 na fa’afeso’ota’i ai e le tamaitai o Manino Utumapu ia le ofisa a leoleo, e lipotia ai se alii 18 tausaga e suafa ia Fa’atau Kome, ona o le faatupu vevesi i totonu o lona fale.  Sa faamatala e Utumapu i leoleo, na moe Kome i lona fale e aunoa ma se faatagana.  Ma ina ua taumafai Utumapu e tuli ese Kome mai lona fale, sa tago Kome i le u’u mai se pate ta polo (golf club) ma fealuai solo i totonu o le fale.

Sa faamatalaina foi e Utumapu e faapea, ina ua alu atu i le fale o lo’o moe Kome, sa ia fai atu loa i lona tausoga e la te o e faatau mai se la meaai, ae ala ifo ai i luga ma Kome ma fai atu, e fia alu foi ma ia.  Ae peitai, na ita Kome ina ua fai atu iai Utumapu, e alu e ai i le latou fale.  O iina lea na ita ai Kome ma u’umai le pate ta polo.

Sa ta’ua e Utumapu, sa o’o mai ia te ia le fefe ona o amioga a Kome ae na fiu e fai iai e alu i le latou aiga.

Ina o agai atu leoleo i le fale o Utumapu, sa vaaia Kome o lo o saofai i luma o se fale faatali pasi, ae ina ua liliu atu iai ta’avale a leoleo, sa faapea ona tu i luga Kome ma tamo’e agai i le malae ta polo.  Sa tuliloaina o ia e leoleo ma mauaina o ia o lafi i lalo o ni pupuvao, ma aveina atu loa o ia i le ofisa leoleo i Tafuna.

Ina ua faatalanoa e leoleo ia Kome, sa ia faamatalaina e faapea, sa le fiafia Utumapu ona ua alu le aso atoa o moe.  O le mea lea na tu ai i luga ma palauvale atu ia Utumapu ma u’u mai le pate ta polo a’o fealua’i i totonu o le fale.

Ua molia nei Kome i moliaga e tolu;

  1. Faatupu vevesi i totonu o aiga; o se vaega ‘C’ o soligatulafono mama, e mafai ona fa’asala ai se tasi i le falepuipui i le o’o atu i le sefululima (15) aso, po o se sala tupe i le va o le $150 ma le $300; po o faasalaga uma e lua.
  2. Fa’ao’olima i lona tulaga e tolu; o se vaega ‘B’ o soligatulafono mama, e mafai ona loka ai se tasi i le falepuipui, e o’o atu i le sefululima (15) aso, po o se sala tupe e i le va o le $150 ma le $300 tala; po o fa’asalaga uma e lua. 
  3. Solivale o fanua a isi e aunoa ma se faatagana; o se vaega ‘B’ o soligatulafono mama, e mafai ona faasala ai se tasi i le ono (6) masina i le falepuipui, po o se sala tupe e $500; po o faasalaga uma e lua.

E $1,000 le tinoitupe ua faatulagaina, e mafai ona tatalaina ai i tua le ua molia, e faatali ai lona faamasinoga.

TINO TAPUA’IALUPE

E tusa ai ma faamaumauga a leoleo, o lo o ta’ua ai e faapea, o le aso 28 o Ianuari, 2024, valaau atu ai se tamaitai, e suafa ia Christina Falanika, i le ofisa a leoleo i Fagatogo e lipotia le tata’eina o le latou faitoto’a tioata, i Faga’alu, e Tino Tapua’ialupe.  E taunu’u atu leoleo i le fale o aiga na valaauina leoleo, o lo o taofiofi mai e tuagane a Falanika, ia Tapua’ialupe.  Sa faapea loa ona lokaina mai e leoleo le ua molia, ma aveina atu loa o ia i le ofisa a leoleo mo le suesueina.  Sa maitauina foi e leoleo, le manogi pia o Tapua’ialupe.

Ina ua talanoa leoleo ma Falanika, sa ia faamatalaina i leoleo e faapea, na alu atu le alii o Tapua’ialupe, i lo latou fale, e fia talanoa ia te ia, ae sa na’o ia le fale.  Na ta’ua e Falanika, sa foliga mai na fa’asuaava ia Tapua’ialupe.  Sa la tau upu e uiga i le la faigauo i taimi ua tuanai, ma sa taumafai Falanika e tuli ese Tapua’ialupe mai i le latou fale, ae musu Tapua’ialupe.  O lea na valaau atu ai Falanika i ona tausoga, ae tu’i ai e Tapua’ialupe le faitoto’a tioata.

Ua molia nei ia Tapua’ialupe i moliaga e tolu; 

  1. Faaleagaina o meatotino – i lona tulaga e lua; o se vaega ‘A’ o soligatulafono mama, e mafai ona loka ai se tasi i le o’o atu i le tasi (1) tausaga i le falepuipui, po o se sala tupe e $1,000; po o fa’asalaga uma e lua.
  2. Solivale fanua o isii e aunoa ma se faatagana; o se vaega ‘B’ o soligatulafono mama, e mafai ona faasala ai se tasi i le falepuipui, i le o’o atu i le ono (6) masina, po o se sala tupe e $500; po o faasalaga uma e lua.
  3. Faatupu vevesi i totonu o aiga; o se vaega ‘C’, o soligatulafono mama, lea e mafai ona loka ai se tasi i le falepuipui, i le o’o atu i le sefululima (15) aso, po o se sala tupe e $300; po o fa’asalaga uma e lua.

E $1,000 le tinoitupe ua faatulagaina e mafai ona tatalaina ai i tua ia Tapua’ialupe, mai i le falepuipui, e faatali ai lona faamasinoga.

SIMANU TOFA

Sa lokaina mai e leoleo, i le aso 27 o Ianuari, 2024, ia le susuga ia Simanu Tofa, ina ua va’aia e leoleo i totonu o se taavale na o latou taofia i luga o le alatele, o lo o ia u’uina se apa pia o lo o matala.

E pei ona ta’ua i faamaumauga a leoleo, a’o latou feagai ai ma le tiuteina o femalagaiga i luga o le alatele i le afiafi o le aso 27, o Ianuari, 2024, i luma o le falea’oga a Matafao, na va’aia ai e leoleo ia se taavale, o agai atu i le itu i Sasa’e, i se saoasaoa ua sili atu ma le 20 maila, ma na faapea loa ona taofia e leoleo le taavale.

O le susuga ia John Fia sa faafoeina le taavale lea na taofia e leoleo.  Ae ina ua tapaina e leoleo lana laisene avetaavale, sa ia fa’ailoa ifo i leoleo, o la e galo i le fale.  Ae sa mafai ona ia tu’uina i leoleo seisi ID e faamaonia ai lona tagata.

A’o talatalanoa leoleo ma Fiu, ae matala mai le faitotoa o le taavale lea e pito i tua, ma iloa atu ai e leoleo ia le alii o Simanu Tofa, o lo o ia u’uina mai se apa pia, o lo o matala.  Ina ua fesiligia e leoleo ia Tofa, po o ona silafia, e faasa i le tulafono ona taumafa se pia i totonu o se taavale i luga o le auala, na tali Tofa, e le ta le iloa lea tulaga.

Sa lokaina mai loa e leoleo ia Tofa ma aveina atu o ia i le to’ese i Tafuna e faatali ai lona faamasinoga.

O lo o ua molia o ia i le faitauga e tasi (1) o le taumafaina o ava malosi i nofoaga faasaina.