Pago Pago - AMERIKA SAMOA

MOLIA SE AVEPASI I LE LEAI O SONA LAISENE AVETA’AVALE LA’U PASESE (COMMERCIAL LICENSE)

O le 4:22 i le vaveao o le aso 2 o Mati, 2024, na taofia ai e leoleo ia se pasi laititi i totonu o le afioaga o Nu’uuli, a’o agai atu i Sasa’e, ina ua afe i tua le pasi e piki sana pasese i se vaega o le alatele, e fa’asaina ai ona piki pasese a pasi, ae le gata i lea, e le i afe tele i tua le pasi mai i le auala tele.

E tusa ai ma faamaumauga a leoleo, e le’i iai se laisene aveta’avale la’u pasese (commercial license) a le avepasi, le susuga ia Salemona Sio, ina ua taofia o ia e leoleo i luma o le faleoloa a le Paradise Inc, i lea aso, seia vagana ai lana laisene aveta’avale masani.

Sa lapata’iina e leoleo ia Sio ma faatonuina o ia, e toe fo’i i lona aiga e paka ai le pasi ma aua ne’i ona toe fa’afoeina le pasi se’ia maua sona laisene aveta’avale la’u pasese (commercial license).

Ae peitai, na toe va’aia foi e leoleo ia le pasi lava lea e tasi, i luga o le alatele i le 5:00 o le taeao lava lea e tasi, o lo o fa’afoeina lava e Sio.

Ma e tusa ai ma faamaumauga a leoleo, sa taumafai se leoleo na tu i tafatafa o le alatele ma sana moli uila, e fa’atu le pasi ma valaau atu le suafa o Salemona Sio, ae peitai, sa le’i fa’atuina e Sio le pasi, ae ua amata ona fa’asaoasaoa le alu o le pasi.

Na feosofi leoleo i le latou ta’avale ma taumafai e tuliloa le pasi a le alii o Sio ae peitai, e le i toe vaaia le pasi i luga o le auala.  O lea na toe fo’i mai ai leoleo mai i luma o le faleoloa a le H&L Mart, ae ua tape moli o le latou ta’avale, a’o tau saili pea le pasi a Sio.

Sa va’aia e leoleo ia le pasi i luma o le fale a se aiga i Nu’uuli, ma o lo’o iai pea le alii o Sio i totonu.  Na aga’i atu leoleo ma faatonu Sio e oso mai i fafo o le pasi, ae sa tali Sio, o la e faatali lona tuafafine. 

Sa lokaina mai loa e leoleo ia Sio ae toso lana pasi i le mea o iai le Ofisa a Leoleo i Tafuna.

Ua molia nei Sio i lona tete’e a’o faatinoina tiute a leoleo, o se vaega ‘A’ i solitulafono mama, lea e mafai ona faafalepuipui ai se tasi i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

E le gata i lea, sa tusia foi ni pepa sala a Sio, e aofia ai le faafoeina o se ta’avale e le saogalemu, ona e tusa ai ma le molimau a le sui malu o le malo na fa’afoeina mai le pasi i le Ofisa a Leoleo i Tafuna, e le o mau le foeuli o le pasi.

O nisi o pepa sala (citation) sa tu’uina ia Sio, na aofia ai lona sola ese mai i leoleo ma le leai o sona laisene aveta’avale la’upasese (commercial license).

E $1,000 le tinoitupe faatulagaina e mafai ona tatalaina ai i tua ia Sio, e fa’atali ai lona faamasinoga.

MOLIA SE ALII 27 TAUSAGA I LE FAATUPU VEVESI MA LE FA’AO’OLIMA

Ua molia nei le susuga ia Ata Lagisa i moliaga o le Faatupu vevesi i nofoaga faitele faapea ma le Fa’ao’olima ona o lona fa’aumu solo i totonu o le afioaga o Vailoa ae fa’ai’u i lona taina o le ulu a le susuga ia Junior Fa’alologa i se u’amea.

E tusa ai ma fa’amaumauga a le malo, o po o le aso 28 o Fepuari, na faia ai se pati i le maota o Fa’alologa i Vailoa ma sa iai ma le ua molia.  Ma sa sologa lelei tulaga uma o le pati, se’ia o’o ina savali le ua molia, agai i le alatele, ma fa’aumu leotele ai.

Sa faamatala e Fa’alologa lona alu atu ma fa’atonuina Lagisa e alu loa i lona aiga, ona sa o’o lava ina alu atu ma le faifeau ia Faalologa, e tusa ai ma le pisa o Lagisa.  Ae peitai, sa avea lea ma tulaga na le fiafia ai le ua molia ma amata ai ona palauvale ma fa’aauau ona fa’aumu.

Sa ta’ua e Fa’alologa lona po ina o le ua molia ma tuli o ia i lona aiga.  Ae peitai, 20 minute na soso’o ai ae toe fo’i atu Lagisa ma ona uso.  Ma na u’u atu e le ua molia ia se u’amea e pei o se ‘rebar’, ma amata ona ia ta’eiina ai ipu ma fagu pia.  Na lagona mai e Faalologa le ta’ei atu o ipu ma fagu pia i fafo o lona fale, ma ia savali mai ai e taumafai e taofi.

Na tula’i mai se vevesi i le va o Fa’alologa ma Lagisa, ma ta ai e Lagisa ia le ulu a Fa’alologa i le ‘rebar’.

E taunu’u atu leoleo, ua alu ese Lagisa ma na fiu leoleo e su’e o ia.  Ae na faatopetope atu Fa’alologa i le Ofisa a Leoleo i Tafuna mo togafitiga e le vaega a le EMS.

O le 5:45 i le taeao na soso’o ai, sa toe aga’i atu ai leoleo i le aiga o Lagisa ma lokaina mai ai o ia.

O moliaga a Lagisa, e aofia ai le Faatupu Vevesi i Nofoaga Faitele – o se vaega ‘B’ o solitulafono mama, lea e mafai ona nofosala ai se tasi i le le silia ma le ono (6) masina, po o se sala tupe e le silia ma le $500; po o fa’asalaga uma e lua.

Faapea ma le moliaga o le Fa’ao’olima i lona tulaga e lua – o se vaega ‘D’ o solitulafono mamafa, lea e mafai ona fa’asala ai se tasi i le le silia ma le lima (5) tausaga, po o se sala tupe e le silia ma le $500; po o fa’asalaga uma e lua.

E $20,000 le tinoitupe faatulagaina e mafai ona tatalaina ai le ua molia, e fa’atali ai lona faamasinoga.