Pago Pago - AMERIKA SAMOA

LOKA SE ALII TALAVOU I LE GAOI

O le taeao o le aso 11 o Mati, 2024 sa lokaina ai e leoleo ia se alii talavou e suafa ia Mamona Mamona, mai i le fale’aiga a le Sweetie’s i Malaeimi, ma molia i lona osofaia o ni ta’avale se lua sa i le paka ta’avale a le Kolisi (ASCC).

Ua molia nei Mamona i faitauga e lua o le Gaoi, o se vaega ‘A’ o solitulafono mama, lea e mafai ona fa’asala ai se tasi i le falepuipui, i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

E $2,000 le vaegatupe fa’atulagaina e mafai ona tatalaina ai le ua molia mai i le falepuipui, e fa’atali ai lona fa’amasinoga.

Sa mafai ona fa’amaonia i se ata vitio ia le ulufale o le ua molia i totonu o le ta’avale muamua, ma saofai ai i totonu o le ta’avale, pe a ma le lua minute.  Ona ia aga’i atu lea i le ta’avale lona lua ma tatalaina foi.  Ona ia aga’i atu loa lea i le fale’aiga i leisi itu auala, lea na maua atu ai e leoleo.

Sa ta’ua e le tagata e ana le ta’avale lea sa osofa’ia e Mamona, ina ua ia alu atu i lana ta’avale i lena taeao, sa ia iloa ai ua to’esea sana pepa sikareti fou ma seleni sa i totonu o le taavale.  Ma sa iai foi nisi o meatotino sa i totonu o lana ta’avale, e foliga mai na laga e se tasi.

I le molimau a le e ana le ta’avale lona lua, sa le gata ina lagaina e le ua molia ia lana ta’avale, ae sa ave’esea foi se ‘flash drive’ sa iai i totonu o lana ta’avale.

O nei mea totino uma, sa maua i totonu o se tama’i ato a Mamona, ina ua su’esu’eina e leoleo.

JEREMIAH TAELEIFI

O le po o le aso 12 o Mati, 2024, na fa’afeso’ota’i ai e se tina ia le Ofisa a Leoleo i Tafuna ona o le uso a lona to’alua, o lo o fa’aumu solo ma faatupu vevesi i lo latou aiga.

Ina ua taunu’u leoleo i le nofoaga na tupu ai le fa’alavelave, sa va’aia le taumafai o le to’alua a le tina na valaau i le ofisa a leoleo, ma nisi, e taofiofi le susuga ia Jeremiah Taeleifi, lea ua molia i lenei fa’alavelave.

Sa faapea loa ona lokaina mai e leoleo ia Taeleifi ma aveina atu i lo latou ofisa.  Sa fa’alogoina foi e leoleo ia le manogi pia o Taeleifi.

Na fa’atalanoina e leoleo i latou sa iai i le nofoaga na tupu ai le fa’alavelave, ma sa faamatalaina e le uso a Taeleifi, na ia fa’alogo mai totonu o le latou fale, o fa’aumu ma palauvale atu se tagata i fafo, ma na sau e va’ai po o ai, ma ia iloa ai o lona uso.  

Sa faamatala foi e le uso a le ua molia, sa toe fo’i i totonu o le fale e aumai sona mitiafu, ae ona fa’alogoina nisi o fa’aumu ma palauvale mai i le fale a ona matua, o lea na ia savali atu ai loa i le fale a ona matua, ma ia va’aia ai lona tama o lo’o talanoa ma lona uso (Taeleifi).  Ma ina ua fai atu i lona uso e uiga i lana amio, ae tu’i mai o ia e lona uso (Taeleifi).

Na molimauina e leoleo le manu’a o le mata taumatau a le na a’afia i le fa’alavelave.  Ma sa ia ta’ua foi lona pu’eina o lona uso (Taeleifi) ma valaau i lona to’alua e vala’au leoleo.

Sa fa’atalanoa foi e leoleo ia le tina na valaau i le ofisa a leoleo (le to’alua a le uso a Taeleifi), ma sa ia ta’ua lo la iai ma lona to’alua i lo la fale, ae o la fa’alogo mai o fa’aumu leotele atu se tagata, ma palauvale.  Sa ta’ua e le tina le faapea atu a lona to’alua ia te ia, o lona uso lea o lo’o fa’aumu ma savali mai ai lona to’alua i fafo, ma aga’i atu i le fale a ona matua, lea e alu atu ai le pisa.

Sa ta’ua e le tina lona savali atu foi ma ia i le fale o matua a lona to’alua, ma ia va’aia lona to’alua o lo’o taofiofi mai le ua molia, ma sa faatonuina o ia e lona to’alua e valaau leoleo.

Na fa’atalanoa foi e leoleo ia le tua’a a le ua molia ma sa ia ta’ua lona iai i totonu o lona fale, ae ona fa’alogoina se tasi o fa’aumu ma palauvale solo, ma ina ua sau i fafo o le fale, na ia va’aia ai le savali ese mai o lona atalii laititi (le ua molia) mai i le fale o lona uso.  Ae e savali mai lava ma pisapisa o.

Sa faamatala e lenei tama lona taumafai e fa’afilemu lona atalii, ae peitai, ua ova le ‘ona ma na amata ona tu’ua’ia o ia e lona atali’i i le le apalai o lona tusi folau, ma ona o le to’atama’i o le tam ana ia fai atu ai i lona atalii, e le’i ausia e ia tausaga e apalai ai sona tusi folau.

O le taimi lea na taunu’u atu ai ma lona atalii matua ma otegia lona atalii laititi i le le fa’aaloalo ma le laititi, ae liliu mai le ua molia, i le tu’i lona uso matua, ma o le mafuaaga lea na pu’eina ai o ia e lona uso matua ma taofiofi seia o’o atu leoleo.

Ua molia nei ia Taeleifi i moliaga e lua;

Faitauga 1:  Faatupu Vevesi i totonu o aiga – o se vaega ‘A’, o solitulafono mama, e mafai ona fa’afalepuipui ai se tasi, i le o’o atu i aso e sefulu lima (15), po o se sala tupe i le va o le $150 ma le $300; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona fa’afalepuipui ai se tasi i le o’o atu i le tausaga e tasi (1), po o se sala tupe e i le va o le $150 ma le $1,000; po o fa’asalaga uma e lua.

E $500 le vaegatupe fa’atulagaina e mafai ona tatalaina ai i tua le ua molia, e fa’atali ai lona fa’amasinoga.

FETU FALEOSEGA

O le aso 11 o Mati, 2024 na valaau ai se mafine mai i Faga’alu i le Ofisa a Leoleo i Fagatogo (FPS) mo se fesoasoani ona o lona tuaoi, le susuga ia Fetu Faleosega, o lo’o faamata’uina o ia ma palauvale atu ia te ia.

Ina ua taunu’u leoleo, sa faamatalaina e lenei mafine, ia le tu’uaia o ia e le ua molia, i le maliu faapea ma se la faiga uo ma le atalii a le ua molia.  Ma sa fa’afefeina foi o ia e le ua molia i se naifi. 

Sa ta’ua e le mafine le sau o lona tama, mai lona fale, e va’ai po o le a le mea ua tupu, ma sa lagona foi e le tama a le mafine ia le palauvale a le ua molia.

Na fa’asino e le mafine, i leoleo, le mea o tu mai ai le ua molia ma sa va’aia e leoleo ia le tum ai o lenei alii ma se naifi e faapata ai falaoa, ma valaau mai e sau loa fasioti [oe].  Ae ina ua agai atu iai leoleo, sa tu’u i lalo e le ua molia, ia le naifi.

Ma sa lokaina mai e leoleo ia Faleosega ma ua molia ai nei o ia i le Faatupu Vevesi i nofoaga faitele, o se vaega ‘B’ o solitulafono mama, e mafai ona fa’afalepuipui ai se tasi i le ono (6) masina po o se sala tupe e $500; po o fa’asalaga uma e lua.

E $300 le vaegatupe faatulagaina e mafai ona tatalaina ai i tua le ua molia, e fa’atali ai lona fa’amasinoga.