Ads by Google Ads by Google

POU TIUTE A LEOLEO


[ata: foa'i]

Pago Pago - AMERIKA SAMOA

MOLIA SE TAMAITAI I LONA FA’AO’OLIMA I SEISI FAFINE

Ua fa’amaumauina i le Ofisa a Leoleo i Tafuna, le telefoni atu o se Fafine e lipotia le fa’ao’olima o se tamaitai ia te ia, i luma o le faleoloa o le H&L i Nu’uuli, i le taeao o le aso 28 o Mati, 2024.

Ua molia nei le tamaitai 33 tausaga mai Samoa e suafa ia Sarah Falealo, i moliaga e lua, e aofia ai le Faatupu Vevesi i Nofoaga Faitele faapea ma le Fa’ao’olima.

E tusa ai ma le molimau a le Fafine na a’afia i lenei fa’alavelave, sa alu atu i le faleoloa a le H&L i Nu’uuli e fa’aaoga le latou telefoni, e valaau ai sana taxi, ae savali atu i totonu o le faleoloa ia Falealo ma fai atu ia te ia, e alu i fafo ma le faleoloa, a leai, o le ia (Falealo) fasia o ia (le ua a’afia).

Sa ta’ua foi e le ua a’afia le palauvale atu o Falealo ia te ia, ma lalau o ia.

Na faapea foi ona aofia i fa’amaumauga a leoleo, se molimau i le fusuaga a Falealo ma le tamaitai o lo’o a’afia i lenei mataupu.  Ma sa faamatala e le molimau i leoleo, sa ona lagona mai i totonu o lona fale lea e i tafatafa tonu o le faleoloa a le H&L ia le palauvale o ni tagata i le paka taavale a le faleoloa.

Ma sa ta’ua foi e le molimau, o Falealo na sasauina le tu’i muamua ma ona futiina le ulu o le tamaitai sa o la fufusu.

Sa mauaina e leoleo ia Falealo o nofonofo i luma o se fale, e latalata mai i le faleoloa na tupu ai le misa ma lokaina mai o ia ma aveina loa o ia i le Ofisa a Leoleo i Tafuna.

Ina ua fa’atalanoaina e leoleo ia Falealo i lo latou ofisa, sa ia faamatalaina e faapea, o le tamaitai lea sa o la pisa, na alu atu i lana (Falealo) fale faigaluega ma lalau atu ia ma lona tina.  Sa ta’ua e Falealo lona faatonuina o lea tamaitai e alu ese ma lona fale faigaluega, ae musu le tamaitai ma o lea na ia fai atu iai i le tamaitai, e o mai i fafo e la te fufusu ai.

Sa faamaonia e Falealo, o ia na liaina le tu’i muamua.

O moliaga a Falealo, e aofia ai;

Faitauga 1:  Faatupu Vevesi i Nofoaga Faitele – o se vaega ‘B’ o solitulafono mama, e mafai ona fa’asala ai i le falepuipui, i le ono masina, po o se sala tupe e $500; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona fa’asala ai i le falepuipui mo le tasi (1) tausaga, po o se sala tupe e $1,000; po o fa’asalaga uma e lua.

E $1,000 le vaegatupe faatulagaina e mafai ona tatalaina ai le ua molia mai i le falepuipui, e fa’atali ai lona faamasinoga.

SULUFA’I SE TAMAITAI I LE OFISA A LEOLEO ONA O LONA FEFE INA NE’I LAMATIA LONA LA

E tusa ai ma fa’amaumauga a leoleo, sa agai atu leoleo i le afioaga o Pavaiai i le aoauli o le aso 31 o Mati, 2024, e tali se valaau mai a se tamaitai, mo se fesoasoani, ona ua ia masalomia le tulai mai o se faalavelave ia te ia, pe afai e na te le tu’ua le fale o lona tausoga, le susuga ia Va’afatu Tunoa.

A’o agai atu leoleo i Pavaivai, sa o latou va’aia se alii o savali ese mai i le fale, e agai atu i le alatele, e fetaui ma le lipoti na o’o atu ia i latou.  Sa taofia lenei alii e leoleo ma ina ua faamaonia, o Tunoa lea, sa faapea loa ona lokaina mai o ia e leoleo, ma aveina atu i le ofisa a leoleo.

Ae sa maua le avanoa e faatalanoaina ai e leoleo ia le tamaitai sa valaau atu i lo latou ofisa.  Ma sa ia fa’amatalaina i leoleo, le fo’i mai o Tunoa mai i le lotu i le aoauli ma valaau atu ia te ia e sau i fafo mai lona potu.  Na ta’ua e le tamaitai, e savali mai i fafo ma lona potu, ae palauvale atu le ua molia ia te ia, ma faatonu o ia e alu e fai se meaai.  E le gata i lea, sa faamatala foi e lenei tamaitai, a’o fa’aauau pea ona ‘e’e atu Tunoa ia te ia, sa amata ona savali atu ia te ia, pei e alu atu e fasi o ia.

 Ona o lona fefe tele ina ne’i lamatia lona ola, sa toe fo’i ai lenei tamaitai i totonu o lona potu ma loka mai le faitoto’a.

Ae o lo’o ta’ua i faamaumauga a leoleo, le fa’afefeina e le ua molia, ia le tamaitai pe afai e le sau i fafo ma le potu.  Na ta’ua e le tamaitai e faapea, e le o se taimi muamua lea ua tupu ai se mea faapea, ae e na te le’i lipotia ona o lona fefe i le saua o le ua molia.

Sa ta’ua e leoleo na aveina ia Tunoa i le ofisa a leoleo, a’o alu le latou ta’avale sa faapea le faamatalaga a le ua molia, e faatali le tamaitai le la, e toe fo’i atu loa, tuli ese mai i le fale.

O moliaga ua faasaga nei ia Tunoa, e aofia ai;

Faitauga 1:  Faatupu Vevesi i totonu o aiga – o se vaega ‘C’ o solitulafono mama, e mafai ona faafalepuipui ai se tasi, i le o’o atu i aso e sefululima (15), po o se sala tupe e $300; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘C’ o solitulafono mama, e mafai ona fa’afalepuipui ai se tasi, i le o’o atu i aso e sefululima (15), po o se sala tupe e i le va o le $150 ma le $300; po o faasalaga uma e lua.

E $300 le tinoitupe faatulagaina e mafai ona tatalaina ai le ua molia, mai i le falepuipui, e faatali ai lona faamasinoga.