Pago Pago - AMERIKA SAMOA

JOHN MATAGILELE

E tusa ai ma fa’amaumauga a le malo, o le vaveao o le aso 20 o Iulai, na valaau ai se alii i le Ofisa a Leoleo i Tafuna, e lipotia le fusuaga a se latou tuaoi.  Sa lipotia mai ai foi le susuga ia John Matagilele o lo’o faatupu vevesi, palauvale ma fusu i le fale o le latou tuaoi.  Ma na fa’amaonia i su’esu’ega, le fa’asuaava o le ua molia.

Ua molia ai nei Matagilele i le Faatupu Vevesi i totonu o aiga, o se vaega ‘B’ i solitulafono mama, e mafai ona fa’afalepuipui ai i le ono masina po o se sala tupe e $500; po o faasalaga uma e lua.

E $300 sa fa’atulagaina e mafai ona tatalaina ai le ua molia, e faatali ai lona faamasinoga.

Ina ua taunu’u sui malu o le malo, sa molimauina se faalapotopotoga o tagata, ma se alii o lo’o taumafai e taofiofi le ua molia.  Ae o lo’o fa’aauau ona palauvale le ua molia ma ia fa’atonuina le alii sa taofiofia o ia, e tu’u o ia.

Na faapea loa ona lokaina mai e leoleo ia Matagilele, ma aveina atu i le Ofisa a Leoleo mo le fa’aauauina o le latou suesuega.

Sa fa’atalanoaina foi e leoleo ia le alii lea na valaau mai i le Ofisa a Leoleo ma sa ia ta’ua e faapea, sa ia lagonaina le ‘e’e o se tagata ma palauvale, ma ina ua ia sau i fafo, e va’ai po o le a le mea o tupu.  O iina na ia va’aia ai le ua molia, o taumafai e fufusu ma sana uo sa la inu pia faatasi.

Na ta’ua foi e le alii na valaau i le Ofisa a Leoleo, sa ia taumafai e fa’afilemu ia Matagilele ae sa la mafai.  O le mea lea na ia fa’atonuina ai ni tamaiti e taofiofi le ua molia.  Ae peitai, na fa’aauau pea ona ‘e’e ma palauvale ia Matagilele.

Sa ta’ua foi e le alii na valaau i le Ofisa a Leoleo, na o’o lava ina sau lona tina ma faatonu le ua molia, ina ia filemu, ae palauvale atu iai Matagilele, o le mea lea na po ai loa e le alii na valaauina leoleo, ia Matagilele ona o le le fa’aaloalo i lona tina.

LINA FUALAAU

I le vaveao o le aso 28 o Iulai, 2024 na taofia ai e leoleo ia se taavale i tafatafa o le Ofisa Leoleo i Tafuna, ma ave faapagotaina ai se tamaitai na va’aia e leoleo, o inu sana fagu pia i totonu o le taavale.

Na molia loa lea tamaitai o Lina Fualaau i le taumafaina o se ‘ava malosi i nofoaga faasaina, o se vaega ‘B’ o solitulafono mama, e mafai ona nofosala ai i le falepuipui, i le o’o atu i le ono masina, po o se sala tupe e $500; po o faasalaga uma e lua.

E le i ta’ua i totonu o faamaumauga a le malo se vaegatupe na faatulagaina e tatalaina ai le ua molia, e faatalitali ai lona faamasinoga.

E tusa ai ma fa’amaumauga a le malo, o le vaveao o le aso 28 o Iulai, na va’aia ai e se leoleo ia le tamaitai o Fualaau o inu se fagu pia ma nofo i luga o se alii, i totonu o le taavale.

Ina o aga’i atu leoleo i le itu i Saute, e latalata i le le Ofisa a Leoleo i Tafuna, sa va’aia seisi taavale a leoleo o fa’atu se taavale i le isi itu auala o le OMV.  Ma na va’aia le sosolo atu o se taavale ma tu i le saini ‘Taofi’, ma poloka ai le auala, o lea na vala’au atu ai le leoleo i le taavale lea, ina ia alu le taavale.

Ae na ta’ua e le alii leoleo, le manino o lana va’ai ona o moli o le auala, sa ia iloa atu ai se tamaitai o nofo i luga o se alii i le nofoa pito i tua o le taavale, o lo’o taumafaina sana fagu pia.  O lea na faatonu ai loa e le leoleo ia le aveta’avale ina ia aga’i sa’o atu lana taavale i luma o le OMV, i le mea o iai le Ofisa a Leoleo.

Ina ua agai atu leoleo i le taavale, na va’aia ni alii se to’alua ma se tamaitai o lo’o saofa’i i luga o vae o se alii na saofa’i i le nofoa pito i tua.  Ma sa va’aia e leoleo ia le tu’u o le lima taumatau a le tamaitai i le va o ona vae, ma a’apa aga’i i lalo.  

Sa faatonuina e leoleo ia le tamaitai e sau i fafo ma le taavale ae tali fa’atosotosololoa mai le tamaitai, o ia e ma’i ma e le mafai na sau i fafo ma le taavale.  Sa ia faapea mai foi, e le inu ma e na te le’i solia se tulafono.

Na savali atu loa seisi leoleo ma fa’atonu le alii sa i tua o le taavale ina ia tatala mai lana faitoto’a.  Ina ua tatala mai le faitoto’a pito i tua, sa susulu atu iai e le leoleo ia lana moli uila i vae o le alii ma le tamaitai, ma va’aia ai le u’u mai i le lima o le tamaitai ia se fagu pia.

Ina ua faatonuina le tamaitai e aumai i fafo le fagu pia, sa ia tago ma togi i lalo ma faapea mai, e le o se solitulafono le inu o pia i totonu o se taavale.