Pago Pago - AMERIKA SAMOA

RIPOTIA E SE TAMALOA SONA ATALII 19 TAUSAGA I LEOLEO

E tusa ai ma faamaumauga a le malo, o le aoauli o le aso 31 o Aukuso, na fa’afeso’ota’i ai e se tamaloa ia le Ofisa a Leoleo i Tafuna, e tusa ai ma sona atalii, o lo’o faatupu vevesi i totonu o le latou aiga.

E tusa ai ma le ripoti a le tamaloa, sa fa’aleagaina e lona atalii, o Lopeti Sili’a Wilson, ia le uaea o le faamalama a le latou fale, i se ma’a.

Ma e taunu’u leoleo i le nofoaga o lo’o tupu ai le faalavelave, ae o lo’o pala’au leotele ia Wilson ma faapea mai, e na te le’i amataina.

Sa fa’atalanoaina e leoleo ia le tuafafine a Wilson ma sa faamatalaina e le tuafafine, le to’atama’i o lona tuagane ona o lona fai atu iai, e uiga i lana (Wilson) inu pia, ae laititi.  Na ta’ua e le tuafafine le savali i fafo o Wilson ma amata ona palauvale solo.

Na faamatalaina e le tuafafine lona taumafai e fa’ato’ato’a le ua molia ae peitai na savali i fafo ia le ua molia ma tu’i le faamalama i le ma’a.  Na ta’ua foi e le tuafafine e faapea, e le o se taimi muamua lea ua faia ai e le ua molia ia lea tulaga.  

Sa faamatalaina foi e le tuafafine e faapea, o so’o se taimi lava e ita ai le ua molia, e na te taufa’amata’u i le latou aiga.  Ma o lo’o iai sona masalosaloga, o lo’o tagofia e le ua molia ia se vaega o fuala’au faasaina, o le mariuana.

Ua molia nei Wilson i faitauga e tolu, e aofia ai:

Faitauga 1:  Fa’atupu Vevesi i totonu o aiga (sauaga i totonu o aiga), o se vaega ‘C’ o soligatulafono mama, e mafai ona nofosala ai i le falepuipui, i le o’o atu i aso e 15, po o se sala tupe e $300; po o faasalaga uma e lua.

Faitauga 2:  Faaleagaina o meatotino i lona tulaga e tolu (sauaga i totonu o aiga), o se vaega ‘C’ o soligatulafono mama, e mafai ona nofosala ai foi i le 15 aso, po o se sala tupe e $300; po o faasalaga uma e lua.

Faitauga 3:  Tagofia o ava malolosi ae e le’i ausia tausaga faatulafonoina, o se vaega ‘B’ o soligatulafono mama, e mafai ona nofosala ai i le o’o atu i le 6 masina, po o se sala tupe e $500; po o faasalaga uma e lua.

E le o ta’ua i totonu o faamaumauga a le malo se vaegatupe e mafai ona tatalaina ai i tua le ua molia, e faatalitali ai lona faamasinoga.

MOE AE O LO’O GAOIA LONA FALE

O le vaveao o le aso 3 o Setema, na fa’afeso’ota’i ai e se tamaitai ia le Ofisa a Leoleo, e ripotia le gaoia o lona fale, ae o lo’o fai sana malologa.

Ina ua taunu’u leoleo i le nofoaga na tupu ai le faalavelave sa molimauina se alii o savali atu agai i le fale o le tamaitai na valaau i leoleo, ma se ma’a.

Sa tuliloaina loa o ia e. leoleo ae peitai, sa le’i mafai ona maua lea alii.

I le faatalanoaga a leoleo ma le tamaitai na aafia, sa faamatala ai e le tamaita le fa’ate’ia o ia a’o faia sana malologa, i le palauvale leotele o se tagata i totonu o lona fale.  Na ta’ua e le tamaitai, o le alii lea na alu atu i totonu o lona fale, e suafa ia Ancaz Leapai.

O se taimi mulimuli ane, na maua ai e leoleo ia Leapai ma aveina atu loa o ia i le ofisa a leoleo ma sa molimauina e leoleo le malosi o le manogi o le ava malosi i lenei alii.

Ua molia nei Leapai, i faitauga e lua, e aofia ai:

Faitauga 1:  Faomea i lona tulaga muamua, o se vaega ‘B’ o soligatulafono mamafa, e mafai ona nofosala ai i le falepuipui, i le va o le lima ma le sefululima tausaga.

Faitauga 2:  Solivale o fanua, o se vaega ‘B’ i soligatulafono mama, e mafai ona nofosala ai i le falepuipui, i le ono masina, po o se sala tupe e $500; po o faasalga uma e lua.

E $10,000 sa faatulagaina e mafai ona tatalaina ai le ua molia, mai i le falepuipui, e faatalitali ai ona faamasinoga.