Pago Pago - AMERIKA SAMOA

MOLIA E MATUA IA SO LA ALO TAMAITAI I LE SAUAINA O I LA’UA

O le aso 22 o Oketopa 22, 2024 na valaau atu ai se tama matua i le Ofisa a Leoleo, ma talosagaina se fesoasoani ona o lona afafine, ua nofo ma susunu lana moa vao.

Ina ua taunu’u leoleo, sa maua atu le tamaitai o Esther Tufuga, lea ua molia, o lo’o nofonofo i tua o le fale ma na mua’i lokaina mai o ia e leoleo, ae e le’i amataina a latou su’esu’ega.

Na faamatalaina e le tama matua lea na valaau i le Ofisa a Leoleo, o lona toe fo’i mai mai le faleoloa i lena aoauli, sa ia va’aia ai le susunuina e lona afafine o le moa vao sa na ia (tama matua) fa’anoi ina mai i sana uo e fa’aaoga.

Ae ina ua taumafai le tama matua e talanoa atu i lona afafine, po o le ua molia, ae palauvale mai iai le tamaitai.

Ona tago lea o le ua molia i le una’i ‘ese lona tama ma tapuni le faitoto’a, lea na utia ai le lima o lona tama.

Sa ta’ua e le tama matua lona le mafaia o se mea i lona afafine, o le mafuaaga lea sa ia faatonuina ai lona to’alua e valaau leoleo mo se fesoasoani.

I le faamatalaga a le tina o le aiga, o ia foi lea o le molimau i le faalavelave, ina ua alu atu lona to’alua i le faleoloa, sa alu atu Esther (lea ua molia), ma vane le faitoto’a o le la potu i se naifi, ma ave le moa vao sa i totonu o le potu.

Ina ua fesiligia Esther e lona tina po o fea a ave iai le moa vao, sa tali le tamaitai, e leai sana (tina) fe’au.  Ona savali lea o le ua molia agai i fafo o le fale.  

Na ta’ua e le tina po o le molimau, e le’i umi ae ona va’aia ua asu mai tua o le fale.  Ae e le’i umi ae toe fo’i atu lona to’alua mai i le faleoloa ma fesiligia le ua molia, pe aisea ua faia ai lea tulaga, sa ta’ua e le molimau (po o le tina matua) lona lagonaina o le palauvale a le ua molia, i le tama matua.

O lo’o ua ta’ua foi i totonu o faamaumauga a leoleo, le faamatalaina e le ulugalii na a’afia, po o matua o Esther, i leoleo, le tupu so’o o faalavelave faapenei i lo la alo.

Ma e iai nisi taimi e faaleagaina ai e le ua molia ia meafale i totonu o le fale po o le faia foi o nisi tulaga faatupu faalavelave i totonu o le latou aiga, ae e na te le faia se tulaga e fesoasoani ai i totonu o le aiga.

Ua molia nei le tamaitai o Esther i le moliaga o le Faatupu Vevesi i totonu o lona aiga, o se vaega ‘C’ i soligatulafono mama, e mafai ona loka ai se tagata mo aso e sefululima, po o se sala tupe e $300; po o faasalaga uma e lua.

E $3,000 na fa’atulagaina e mafai ona tatalaina ai le ua molia mai i le falepuipui, e fa’atalitali ai lona faamasinoga.

MISA SE ULUGALII ONA O LE MASALOSALO O LE TAMALOA

O le po o le aso 22 o Oketopa, 2024, na fa’afeso’ota’i ai e se tina loto mafatia ia le Ofisa a Leoleo, ina ua alu atu lona to’alua i le fale, o lo’o fa’asuaava, ma sauaina o ia i totonu o le latou fale.

E ui ina sa sola le ua molia, ae e le’i taunu’u atu leoleo, o se taimi mulimuli ane, na toe mauaina ai o ia e leoleo.

Ua molia nei le susuga ia Matega Matega i le moliaga o le Faatupu Vevesi i totonu o lona aiga, o se vaega ‘C’ o soligatulafono mama ma e $5,000 se vaegatupe na fa’atulagaina e tatalaina ai o ia e faatali lona faamasinoga.

O lo’o ta’ua i totonu o faamaumauga a le Malo e faapea, ina ua taunu’u leoleo i le nofoaga na tupu ai le faalavelave, sa fiu e saili le ua molia, ae ua sola.  Ae o se taimi mulimuli ane, na toe maua ai o ia o lafi i totonu o se togavao latalata i lona fale.

Ina ua faatalanoaina e leoleo ia molimau, sa ia ta’ua lona lagonaina o le misa a le ua molia ma lona to’alua ma se telefoni, na togi.  Ma sa lagonaina foi e le molimau ia le palauvale o le ua molia, i lona to’alua ma le tu’i ina e le ua molia ia le fatafata o lona to’alua.

E tusa ai ma le faamatalaga a le tina o le aiga, na a’afia, ina ua manava atu le tama o le aiga i lea afiafi, ua fa’asuaava.  Ae na ita le ua molia, ina ua tata’eina e le tina o le aiga, ia lana (le ua molia) telefoni.  

Ma sa ta’ua e le tina, e nofo atu i lalo, ae tu’i e lona to’alua (le ua molia) ia lona fatafata ma palauvale atu ia te ia.

Ina ua aveina le ua molia i le ofisa a leoleo, sa ia faamatalaina i leoleo e faapea, na mafua ona to’atama’i ona sa loka e lona to’alua (le tina) ia lana (le ua molia) telefoni.  Ma ina ua o la tau’upu, sa ia togiina lona to’alua i le telefoni.  Ae tago le tina o le aiga, i le togi i lalo le telefoni.

Sa te’ena e le ua molia ia tu’uaiga i le pa’i o lona lima i lona to’alua.  Ae na togi o ia (le ua molia) e lona to’alua, i se laupapa.