Pago Pago - AMERIKA SAMOA

MOLIA SE ALII I LONA FA’AO’OLIMAI I LONA USO LAITITI ONA O TUPE

O le aso 23 o Setema, 2024, o lo'o ta'ua ai i faamaumauga a le malo, le fa'afeso'ota'ia e se tina ia le Ofisa a Leoleo i Fagatogo, e ripotia ai sona alo, e 26 tausaga le matua, lea ua tu'ua'ia i lona fa'ao'olima i sona uso laititi.

Ma ua ta'ua foi i faamaumauga a le malo e faapea, le agai atu o leoleo i le nofoaga na tupu ai le faalavelave, lea na faamatala ifo iai e le tina, lo la iai ma lona to'alua i totonu o le fale, ae o la fa'alogo mai i fafo, o faatonu e le la tama matua, o Paulo Filemoni, ia lona uso laititi, e avatu se tupe.  Ae ina ua musu le alii laititi e tu'u se tupe ia Paulo (lea ua molia), sa faapea ona ita le ua molia ma tu'i le gutu o lona uso laititi.

Ona faato'a tago lea o le uso laititi ma tu'u i le ua molia le $20.  Ma o le mafua'aga lea, e pei ona ta'ua e le tina, ua o la valaauina ai leoleo, ina ia mafai ona a'oa'i le alii matua.  Ma sa ta'ua e le tina, ua fai so'o le tulaga lea e le ua molia, i lona uso laititi, pe a maua totogi a lona uso laititi i vaiaso uma.

Na fesiligia e leoleo le tina po o fea o iai lona to'alua, sa tali le tina, o la na alu e su'e le mea ua alu iai le ua molia.  

Ina ua fesiligia e leoleo ia le uso laititi po o manaomia ona ave i le falemai, sa tali le alii e leai.

I le fa'atalanoaga a le uso laititi, sa ia ta'ua lona manava atu mai galuega i lea afiafi, ae alu atu lona uso matua (lea ua molia) ma fai atu iai e aumai se tupe e faatau ai sana meaai.  Ae sa tali mai le uso laititi, se'i ave muamua le tupe i o la matua.  Ae tago ai le uso matua i le tu'a fa'alua o ia.  O lea na ia tuuina ai le $20 i lona uso matua.

Ina ua toe fo'i atu le tama o le aiga, sa ia fa'ailoa atu i leoleo, e na te le'i mauaina lona atalii matua (lea ua molia) ae e na te iloa le mea o iai.  Sa faapea loa ona faatonuina e leoleo ia le ulugalii faapea ma le uso laititi, e feosofi i totonu o le taavale a leoleo, e faasino atu le fale o iai le ua molia.

Ina ua maua le ua molia, sa faapea ona talosagaina e leoleo ni isi leoleo faaopoopo, e fesoasoani i le pu'eina o lenei alii.  E tusa ai ma le ripoti a leoleo, e le'i foliga mai sa fa'asuaava le ua molia.  Ae na ia 'e'e mai i ona matua, ona o le valaauina o leoleo.  

Sa ioe le ua molia e o ma leoleo, pe afai ae o atu ai ma ona matua.  Ae peitai, a'o latou agai atu i le ofisa a leoleo, sa taumafai le ua molia, e oso i fafo mai i le taavale a leoleo.  O le vavave o gaioiga a leoleo, sa mafai ai ona toe pu'eina mai o ia ma lokaina ai loa ona lima, ma toe tu'uina o ia i totonu o le taavale a leoleo ma ae sa'o loa i le Ofisa a Leoleo i Fagatogo ma lokaina ai loa o ia.

O moliaga o Paulo, e aofia ai le Fa'ao'olima i lona tulaga e tolu (sauaga i totonu o le aiga), faapea ma le Faatupu Vevesi i totonu o le aiga (sauaga i totonu o le aiga).

O le nei moliaga uma, o se vaega 'C' o solitulafono mama, e mafai ona nofosala ai i le falepuipui, i aso e 15 po o se sala tupe e $300; po o faasalaga uma e lua.

E $5,000 se vaegatupe sa faatulagaina, e mafai ona tatalaina ai le ua molia, e faatalitali ai lona faamasinoga.

MOLIA SE ALII I LONA UMIA O SE PAIPA E ULA AI VAEGA O FUALAAU FAASAINA (Aisa)

E tusa ai ma fa'amaumauga a le malo, ua molia nei se alii e 25 tausaga, e suafa ia Tikeri Fanene, i le moliaga, o le umiaina o se vaega o fualaau faasaina (Aisa).  O lenei moliaga o se vaega o solitulafono mamafa, ma e mafai ona loka ai se tagata, i le va o le lima ma le sefulu tausaga, po o se sala tupe i le va o le $5,000 ma le $20,000; po o faasalaga uma e lua.

O lenei faalavelave sa tupu i le aso 27 o Aperila, ina ua taofia e leoleo se taavale i luga o le alatele, ma taofia ai e leoleo le taavale ona e leai se laisene avetaavale a le na faafoeina le taavale.

Sa ta'ua e le tamaitai leoleo sa iai i le taimi na tupu ai le faalavelave, ina ua ia tatalaina le faitoto'a pito i tua o le taavale, sa va'aia ai le ua molia, o lo'o saofa'i ma se ato uliuli.  Ina ua fesiligia le alii po o a mea o i totonu o le ato, sa tali le alii, o se fana.  Na fia malamalama le sui malu o le malo i le uiga o le faamatalaga a le ua molia, ma sa ia faamanino mai, o se paipa e ula ai ia vaega o fualaau faasaina (Aisa).

Ina ua tatalaina e le sui malu o le malo ia le ato, sa va'aia ai i totonu ia se paipa mata'eta'e ma ni tulaga e foliga mai o se vaega o fualaau faasaina (Aisa), i totonu o le paipa.  Sa faapea ona logoina ia vaega a leoleo e mataituina ia fualaau faasaina mo le faatinoina o a latou su'esuega ma na fa'amautuina ai, o se vaega o fualaau faasaina ia sa i totonu o le paipa.

Sa fa'amaonia e le ua molia, o ia e ana le paipa ma tulaga uma sa i totonu o le ato sa ia umia.

E $5,000 se vaegatupe na fa'atulagaina e mafai ona tatalaina ai le ua molia, e faatalitali ai lona faamasinoga.