Ads by Google Ads by Google

POU TIUTE A LEOLEO


[ata: foa'i]

Pago Pago - AMERIKA SAMOA

TU’UA’IA E SE FAFINE IA LONA TO’ALUA I TAUMAFAI E SASA O IA I SE NOFOA 

Na lokaina ia Tesema 8, 2024 ia le susuga ia Joe Faiai, ina ua ripotia o ia e lona to’alua i le ofisa a leoleo, i lona (Faiai) taumafai e sasa o ia (tina) i se nofoa ma le fa’aleagaina o a latou meafale.

Ma na molia ai Faiai i moliaga e lua, e aofia ai le faatupu Vevesi i totonu o le aiga ma le Fa’ao’olima i lona tulaga e tolu.

Ina ua taunu’u leoleo i le nofoaga na tupu ai le faalavelave, sa o latou va’aia Faiai i fafo o le fale ma na lokaina mai ai o ia iina ma tu’uina i totonu o le taavale a leoleo.

Na faapea ona fa’atalanoaina e leoleo ia le tina sa valaau atu i le ofisa a leoleo ma sa ia faamatalaina le faia o se inuga pia a lona to’alua i luma o le latou fale ma ina ua ia sau i totonu o le fale, na ia fesiligia o ia (tina) pe sa ia kukaina se meaai.  Na tali atu le tina, o lo’o iai mea’ai i  luga o le laulau.

Ae na ta’ua e le tina lona fa’alogoina o se pa’o leotele mai totonu o le fale, ma ina ua sau iai, na ia va’aia ai ua fa’aleagaina le latou televise.

Sa ta’ua e le tina lona fautuaina o lona toalua e taofi, ae sa le faalogo lona to’alua.  Ma savali atu ai ia te ia (tina) ma se nofoa laupapa ma taumafai e ta ai o ia.  

O iina na valaau ai loa e le tina ia le ofisa a leoleo mo se fesoasoani.

O moliaga o Faiai i le Faatupu Vevesi i totonu o le aiga, o se vaega ‘C’ o solitulafono mama, e mafai ona nofosala ai i le falepuipui, e o’o atu i aso e sefululima, po o se sala tupe e i le va o le $150 ma le $300; po o faasalaga uma e lua.

I le moliaga o le Fa’ao’olima i lona tulaga e tolu, o se vaega ‘A’ i solitulafono mama, e mafai ona nofosala ai i le falepuipui, i le o’o atu i le tausaga, po o se sala tupe e $1,000; po o faasalaga uma e lua.

E le i ta’ua i totonu o faamaumauga a le malo ia se vaegatupe na faatulagaina e mafai ona tatalaina ai le ua molia, mai i le falepuipui, e faatalitali ai lona faamasinoga.

MOLIA SE ALII 30 TAUSAGA INA UA OSO I LONA USO LAITITI MA SE AGAESE

Na molia le susuga ia James Fitiao, ona o se fa’alavelave na tula’i mai i le po o Novema 6, 2024, ina ua oso i sona uso laititi ma se agaese.

E tusa ai ma fa’amaumauga a le malo, na valaau e le tina o Fitiao ia le Ofisa a Leoleo ia le po o Novema 6, 2024,  ina ua sauaina e Fitiao ia lona uso laititi ma ia lafo iai ni upu taufa’amata’u.

Ina ua taunu’u leoleo i le nofoaga na tupu ai le faalavelave, sa o latou talatalanoa ma le tina le ua molia ma lona uso laititi, ma sa faamatala e le tina le to’atama’i o le ua molia, ina ua fa’anoi faalelei atu e lona uso laititi ia lana (le ua molia) telefoni feavea’I, se’i ona (uso laititi) fa’aaogaina.

Sa ta’ua e le tina, le oso o Fitiao ma u’u mai se agaese ma fa’afefeina ai lona uso laititi.  Ma o le mafua’aga lea na tago ai le uso laititi ma u’u mai ni ma’a ma tau’ai ai le ua molia. 

E tusa ai ma le faamatalaga a le tina, e le o se taimi muamua le aua tupu ai se tulaga faapenei ma ua ia iloa, o le a faateteleina i se taimi i luma.

I se faamatalaga a se molimau na iai i le taimi na tupu ai lenei faalavelave, sa ta’ua le oso o le ua molia, ma u’u mai se agaese ma taumafai e ta ai lona uso laititi, ina ua fa’anoi atu e lona uso laititi ia lana telefoni e fa’aaoga.

Ma na avea lea ma mafuaaga na fai ai le tau’aiga ma’a a le ua molia ma lona uso laititi.

Ua molia nei ia Fitiao i moliaga o le Faatupu Vevesi i totonu o le latou aiga faapea ma le Fa’ao’olima i lona tulaga e tolu (sauaga i totonu o le aiga) ma o nei solitulafono uma e lua, o vaega ‘C’ o solitulafono mama. 

 E mafai ona nofosala ai i le falepuipui, e o’o atu i aso e sefululima, po o se sala tupe e $300; po o faasalaga uma e lua.

E $1,000 sa fa’atulagaina e mafai ona tatalaina ai le ua molia mai i le falepuipui, e faatali ai lona faamasinoga.

LOKA SE ALII I SAMOA I LE GAOI O OFUVAE LAITI TAMAITAI

I se ripoti mai i le Samoa Observer, na ta’ua ai le lokaina o se alii na maua i luga o se vitio, o  ona gaoia se ofuvae laititi a tamaitai, mai i se fale ta lavalava i Apia, i le taeao o le aso Tofi o le vaiaso ua mava.

Na faamaonia e le pule o le faleoloa a Lynn’s Supermarket, o lavala na gaoia, o ni la’ei a se tasi o le latou aufaigaluega ma ua mae’a ona fa’ailoa mai e le tamaitai e ana lenei ofuvae laititi, e le toe mana’o e toe fa’afo’i atu lea ofu, ae ia tu’u ma le alii gaoi.

E ui ina e le’i ripotia e le pule o le faleoloa po o le aufaigaluega, ia lenei mataupu i le ofisa a leoleo, ae peitai, na salalau solo i luga o upega tafa’ilagi ia le ata vitio o le alii gaoi ma le gaoia o le ofuvae laititi.