Pago Pago - AMERIKA SAMOA

MOLIA SE ALII NA MAUA AI NI VAEGA O FUALAAU FAASAINA I TOTONU O LANA TAAVALE

E tusa ai ma fa’amaumauga a le faamasinoga, o le vaveao o le aso 15 o Tesema, 2025 na taofia ai e leoleo ia le taavale a le susuga ia Peni Jr. Ulugalu, i luga o le alatele ma i le faagasologa o le faatinoga o tiute a leoleo, sa maua ai ni vaega o fualaau faasaina, i totonu o lana ta’avale, ma fa’afeso’ota’iina ai loa le Iunite a leoleo, e mataituina vaega o fualaau faasaina (Vice & Narcotics Unit).

Sa ta’ua e sui malu o le malo, le fa’atuina o se pikiapu e tu lata i le KS Mart, ina ua molimauina le alu o le taavale ma tau sopoia laina i le ogatotonu o le auala, ma oso ai i leisi itu o le alatele.

O lea na fa’atuina ai loa e leoleo le taavale ma fa’ailoa atu i le avetaavale le mafuaaga ua faatu ai, ma ina ua fesiligia e leoleo le avetaavale pe sa ia taumafaina se ‘ava malosi, sa tali le aveta’avale, e leai, ae peitai, sa molimauina e leoleo le mumu o mata o le aveta’avale.

Na tapaina e leoleo ia le laisene a le avetaavale, ae sa fa’ailoa mai e le avetaavale, ua galo i le fale.  Ma ina ua fesiligia foi le avetaavale, po o ia e ana le taavale, sa tali le avetaavale, e leai, o le taavale a lona tua’a.

Sa fa’ailoa atu e leoleo i le aveta’avale, e le o lokaina o ia, ae o le a latou malaga i le ofisa a leoleo, faatasi ai ma lana taavale, mo le fa’aauauina o su’esu’ega.

O iina i le su’esu’ega o le ta’avale, sa maua ai loa e sui malu o le malo, ia ni ‘straws’ ua mae’a ona tipitipi, sa maua ai ni pauta papa’e i totonu, faapea ai ma ni paipa mata’eta’e e lua.

Ina ua mae’a ona fa’atalanoaina e leoleo ia alii e to’alua sa i totonu o le ta’avale ina ua mae’a ona nofo malamalama ia leoleo, sa piki i la’ua e le avetaavale i autafa o le auala.  Sa o la fa’ailoa atu i leoleo, e latou te le masani ma le avetaavale, ae na tu atu lana taavale i le fa’atu lifi i auatafa o le auala.

Ina ua su’esu’eina e le iunite a leoleo e mataituina vaega o fualaau faasaina, ia pauta na maua i totonu paipa ma ‘straws’, sa maua i totonu o le taavale, na fa’amaonia mai ai, o vaega o fualaau faasaina, o le Aia.

I le fa’amatalaga a le ua molia, sa ia ta’ua ai lona pikiina o ni alii se toalua i autafa o le alatele, na saili se la auala i lo la aiga.  Ma a’o aveina lana taavale, sa ia taumafai e alo ‘ese mai i ‘omo i luga o le auala, o le mafuaaga lea na oso ai lana taavale i leisi itu auala.  Ma fa’atu ai loa e leoleo lana taavale.

Na faamaonia e le ua molia, i leoleo, o ia e tagofia ia fualaau faasaina, ae o paipa ma ‘straws’ na maua i totonu o le taavale, o meatotino ia a alii ia sa ia pikiina mai i autafa o le alatele.

Ua molia nei Ulugalu i le moliaga o le Umia Faasolitulafono o Vaega o Fualaau Faasaina (Aisa), o se solitulafono mamafa e mafai ona nofosala ai i le falepuipui, i le va o le lima ma le sefulu tausaga, po o se sala tupe i le va o le $5,000 ma le $20,000; po o fa’asalaga uma e lua.

E $3,000 le vaegatupe sa faatulagaina mo le tatalaina o le ua molia mai i le falepuipui, e faatalitali ai lona faamasinoga.

MOLIA SE ALII NA MAUA ATU I TOTONU O FALEAOGA A IAKINA

O le 2:32 i le vaveao o Tesema 11, 2024, na lokaina mai ai e leoleo ia se alii e 27 tausaga, na maua atu o fealuai mai i totonu o le fale a’oga a Iakina i Iliili.

E tusa ai ma ripoti a leoleo, sa mauaina atu le susuga ia Lawrence Letuligasenoa, o fa’alagolago i le faitoto’a o le fale ‘ai a le aoga, ae o lo’o taumafai e tatala le faitoto’a.  Ina ua fesiligia o ia e leoleo, sa ta’ua e le ua molia, o lo’o fai sana savalivaliga.

A’o talatalanoa le ua molia ma leoleo, ae o le taimi lea o lo’o ia u’uina ai se taga pepa iila, o lo’o iai i totonu lana pepa fanau ma ni ata sa ia tusia.

Ina ua su’esu’eina ona la’ei e leoleo, sa mauaina ai se sikukalaiva, o se laisene avetaavale, o ni ‘bank cards’ a se tagata, ma ni ‘lighters’ e lua.

Na faapea loa ona aveina Letuligasenoa i le Ofisa a Leoleo mo le fa’aauauina o su’esu’ega a leoleo.  Lea na ia faamatalaina ai i leoleo, o ia o se leoleo po a le aoga, ma na alu e savalivali i totonu o le laumua a le aoga.

Ina ua fesiligia o ia e uiga i le laisene avetaavale ma ‘bank cards’ na maua i lana taga, sa fa’ailoa mai e le ua molia, sa ia mauaina i autafa o se pou moli, i tafatafa o le aoga.  Ae o le taga pepa i’ila, o lana meatotino lea.

Ina ua fesiligia o ia pe aisea na faalagolago ai i le faitoto’a o le fale’ai ma tilotilo i totonu o le fale’ai, sa tali le ua molia, o la sa taumafai e feanu mai i fafo ia se sosi mai lona gutu.

I se taimi mulimuli ane, na feiloai ai leoleo ma le pulea’oga e fa’amaonia le faamatalaga a le ua molia, o ia o se leoleo po.  Sa fa’ailoa mai e le pulea’oga i sui malu o le malo, e leai se leoleo po a le aoga ma e latou te le masani i le ua molia.

Ua molia nei Letuligasenoa i moliaga o le Umia o A’upega Faomea, o se vaega ‘D’ o solitulafono mama ma le moliaga o le Solivale o Fanua e aunoa ma se fa’atagana, o se vaega ‘B’ o solitulafono mama.

O le moliaga muamua e mafai ona nofosala ai se tagata i le falepuipui, i le o’o atu i tausaga e lima, po o se sala tupe i le va o le $150 ma le $5,000; po o faasalaga uma e lua.

Ae mo le moliaga lona lua, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

E $20,000 le vaegatupe na fa’atulagaina e mafai ona tatalaina ai le ua molia mai i le falepuipui, e fa’atalitali ai lona faamasinoga.