Pago Pago - AMERIKA SAMOA

TU’UA’IA SE TAMALOA I LE TA’IINA O SE FANA I LE ULU O LONA TO’ALUA

O le vaveao o Tesema 16, 2024, na agai atu ai sui o le Ofisa a Leoleo i Tafuna, e tali se vala’au mai i se tina, i le sauaina o ia e lona to’alua, ae fa’ai’u i lona ta’iina o se fana i lona (fafine) ulu.

E tusa ai ma fa’amaumauga a leoleo, ina ua taunu’u leoleo sa mafai ona talatalanoa ma le tina na vala’au mai i le ofisa a leoleo faapea ma lona uso.  Ae ua sola le to’alua a le tina na valaau mai i le ofisa a leoleo, le susuga ia Miracle Toilolo (lea ua molia).

Sa taumafai leoleo e saili Toilolo i nofoaga lata mai i lo la fale, ma maua atu ai o ia, o nofonofo mai i tua o se tasi o fale a ona tuaoi.  Na faapea ona ave faapagotaina mai ai o ia e leoleo.

Na fa’amatalaina e le to’alua a Toilolo e faapea, na o e tafafao ma sa inu ai ni a la ava malolosi, ae ina ua o la taunu’u i le fale, sa tula’i mai se fe’ese’esea’iga i lo la va, ma o’o ai lava ina amata ona tau’ai solo e le ua molia ia meatotino i totonu o le fale.

Sa ta’ua e le tina le sasaina o lona papatua e le ua molia, i se nofoa meata’alo a lana tama, a’o ia taoto i luga o le moega ma fa’asaga aga’i i le pa sima (wall).  Ma sa ia tago se’i mai le nofoa ma amata ona sasa ai le ua molia, ae ia tago atu ua u’u mai lona ua ma amata ona titina o ia.  Ma o le mamulu o lima a lona toalua, na ia tago atu ai loa i le telefoni ma valaau leoleo.

Ae o le taimi lea, e pei ona ta’ua e le tina, sa a’apa atu ai lona to’alua (lea ua molia) ma se’i mai se fana mai i totonu o lana atoa lea e na te feavea’i i taimi uma, ma tu’u le fana i lona ulu ma fesili atu ia te ia, po o le mea lea o mana’o iai.

Sa ta’ua foi e le to’alua a Toilolo lona taumafai e alu i fafo ma le potu, ae taofi o ia e le ua molia.  Ma na talosaga le tina i leoleo, e le o toe fia va’ai i le ua molia i so’o se nofoaga e latalata atu ia te ia, po o lona fale.

Ina ua faatalanoa e leoleo ia le uso a le to’alua a Toilolo, sa ia faamatalanaina lona lagonaina le ‘e’e o le ua molia ma le pa’o mai i le fogafale lona lua o le latou fale, ae mulimuli, ona lagonaina ai le ‘e’e mai a lona uso mo se fesoasoani.

Ae ina ua fa’atalanoaina e leoleo ia le susuga ia Toilolo, sa ia faamatalaina le tala lava e tasi, e pei ona sa faamatala e lona to’alua, i le amataga o le la misa.  Na ta’ua e le ua molia, ia lona le manino i le mafua’aga nap isa ai.  Ae sa ia togiina lona to’alua i le nofoa meata’alo a lona atalii, ona ia savali lea i fafo mai i le potu.

Ae ina ua ia toe fo’i atu i totonu o le potu, sa faapea ona ta fa’atolu e lona to’alua, ia lona (Toilolo) ulu ma tatu’i ona foliga ma lona ulu, ae e na te le’i tali mai i gaioiga a lona to’alua.  Ma na ta’ua foi e le ua molia ia lona tago se’i mail ana fana ma ta’i i le fatafata a lona to’alua, ma fesiligia o ia po o le mea lea o lo’o mana’o iai.

Sa molia Toilolo i moliaga o le Faatupu Vevesi i totonu o lona aiga, o se vaega ‘C’ o solitulafono mama, e mafai ona nofosala ai i le falepuipui e o’o atu i aso e 15, po o se sala tupe e $300; po o faasalaga uma e lua.

E le gata i lea, na molia foi o ia i le Fa’ao’olima i lona tulaga e tolu ma le Lokaina o se tagata, o ni vaega ‘A’ o solitulafono mama, e mafai ona nofosala ai i le falepuipui i le tausaga, i le moliaga e tasi.  Po o le sala tupe e ta’i $1,000; po o faasalaga uma e lua.

E $1,500 na fa’atulaga e mafai ona tatalaina ai le ua molia, e faatalitali ai lona faamasinoga.

MOLIA SE ALII I LONA SAUAINA O SE LEOLEO PO

O le po o Tesema 21, 2024 na agai atu ai leoleo i le fale kalapu a le Flame’s i Tafuna, ona o se vala’au na o’o mai i le Ofisa a Leoleo i Tafuna, e tusa ai ma se alii o lo’o faatupu vevesi ma i’u ai ina o’o ona  lima i se leoleo po a le fale kalapu.

E tusa ai ma fa’amaumauga a le faamasinoga, na ta’ua ai le lokaina mai e leoleo o le susuga ia Senetenari Williams, i lea afiafi.

I su’esu’ega a leoleo sa faia i lea afiafi, sa ta’ua ai le fa’afia ona tuli i fafo e leoleo po o le fale kalapu ia le ua molia, ae peitai, sa fa’afaigata le alii.

Na o’o ai ina tosoina o ia i fafo e se tasi o leoleo po, ae taumafai ai le ua molia, e tu’i fa’atolu le leoleo po.  Na misi le tu’i muamua, ae na tau i foliga o le leoleo po ia isi tu’i mulimuli e lua.

Sa aveina foi le leoleo po i le ofisa a leoleo mo le faia o sana fa’amatalaga ma na ia ta’ua e faapea, na alu lena afiafi o latou lapata’ia le ua molia e tusa ai ma lana fa’aumu i totonu o se pati sa faia i le fale kalapu.  Ae peitai, ua le gata ina fa’aumu le ua molia, ae ua faapea ona palauvale solo.

Ma e o’o i le taimi ua uma ai le pati, ua tau le mafai ona taofiofi le ua molia.  O lea na faatonuina ai o ia e le leoleo po na a’afia, ua tatau ona alu i le fale, ona ua fa’asuaava tele.  Ae peitai, na musu le ua molia, ma o le mafua’aga lea na tau ta’ita’i ai o ia i fafo, e le leoleo po.  Ae liliu mai ai le ua molia ma tu’i ia le leoleo po. 

 Ua molia nei Williams i moliaga o le Faatupu Vevesi i Nofoaga Faitele ma le Fa’ao’olima i lona tulaga e tolu.

O le moliaga o le faatupu vevesi, o se vaega ‘B’ o solitulafono mama, e mafai ona nofosala ai i le falepuipui i le ono masina, po o se sala tupe e $500; po o faasalaga uma e lua.

Ae o le moliaga o le fa’ao’olima, o se vaega ‘A’ o solitulafono mama, e mafai ona nofosala i le falepuipui i le tausaga atoa, po o se sala tupe e $1,000; po o faasalaga uma e lua.

E $1,000 se vaegatupe na fa’atulagaina e mafai ona tatalaina ai le ua molia, e faatalitali lona faamasinoga.