Pago Pago - AMERIKA SAMOA

MOLIA SE ALII 22 TAUSAGA I LE FAATUPU VEVESI 

O le taeao o le aso 22 o Tesema, na ripotia ai e se tuaoi ia se alii ma sana uo teine, i le ofisa a leoleo, ona o le leotele o le la misa.

Na agai atu leoleo mai i le Ofisa Leoleo i Fagatogo, i le nofoaga na tupu ai le faalavelave ma fa’ailoa ifo iai e le alii na valaau atu i le ofisa a leoleo, ia lona faalogoina o le susuga ia Ropeti Ropeti (lea ua molia), o leotele mai i totonu o lona potu moe.  Ma ina ua ia alu atu iai e va’ai po o le a le mea o tupu, sa ia va’aia le tau’ai solo e Ropeti o lavalava ma meatotino, i totonu o le potu.

Ma ona sa iai ma le uo teine a Ropeti, o lea na valaau ai loa leoleo, ae e le’i o’o le la misa i se tulaga faigata.

Sa faapea loa ona agai atu leoleo i le potu a le ua molia ae o lo’o fa’aauau lava le sauniga a Ropeti, agai i lana uo teine ma tau’ai solo lavalava ma meatotino i totonu o le potu. 

Na mafai ona lokaina mai Ropeti e leoleo ma taitai mai o ia i fafo mai i le potu ma aveina atu loa i le ofisa a leoleo i Fagatogo mo le fa’aauauina o a latou suesuega.

Ae i se faatalanoaga a leoleo ma le tamaitai na a’afia, sa ia faamatalaina e faapea, na mafua ona amata le la misa, ona ua le fiafia Ropeti, i lona (uo teine) fesiligia o ia, po o le a lana mea sa fai i totonu o le potu moe a se uo tamaitai a lana uo teine.

Ua molia nei Ropeti i le Faatupu Vevesi i totonu o le aiga, o se vaega ‘C’ o solitulafono mama, e mafai ona nofosala ai i le falepuipui moa so e sefululima, po o se sala tupe e $300; po o faasalaga uma e lua.

E le gata i lea, ua molia foi o ia i le Fa’ao’olima i lona tulaga e tolu, o se vaega ‘A’ o solitulafono mama, e mafai ona nofosala ai i le falepuipui mo le tausaga, po o se sala tupe e $1,000; po o faasalaga uma e lua.

E $300 se vaegatupe ua fa’atulaga e mafai ona tatalaina ai le ua molia, e faatalitali ai lona faamasinoga.

LOKA SE ALII 25 TAUSAGA I LE FAAPIS AI LUGA O LE AUALA

O le aso 21 o Tesema, 2024, na lokaina mai ai e leoleo ia le susuga ia Nicholas Harmon ona o le faatupu vevesi i luga o le alatele ma lona lafoina o ni faamatalaga taufa’amata’u i seisi tagata.

Ina ua taunu’u leoleo sa molimauina ia Harmon o ‘e’e leotele i le tamaloa na a’afia, ma lona aiga, i totonu o le latou fale.  Ma sa ta’ua e le alii na a’afia, a’o ia otegiaina lona atalii i le faia o ana galuega, sa ia faalogoina se tagata o tali mai i le auala ma palauvale mai.

E ui ina fa’ailoa atu e le tamaloa na a’afia, ia Harmon, e le o ia lea o lo’o otegia, ae peitai, sa fa’aauau ona palauvale mai Harmon ia te ia ma lona aiga, ona ia savali lea agai i le faleoloa.  Ae ina ua toe fa’aauau ona otegia e le tamaloa ia lona atalii, sa toe faapea Harmon o lo’o ‘e’e atu le tamaloa ia te ia.

Sa faatalanoaina e leoleo ia le atalii o le tamaloa ma sa ia ta’ua lona iai i totonu o lona potu ina ua amata ona otegia leotele mai o ia e lona tama.  Ae i se taimi mulimuli ane, na ia toe faalogoina ua sui le leo o lona tama, o lo’o vala’au agai i le auala.  Ina ua ia sau i fafo mai i le potu e va’ai po o le a le mea o tupu, sa ia va’aia Harmon o tu i luma o le latou fale, ma ‘ava’avau atu i lona tama.

Ua molia nei ia Harmon i le Faatupu Vevesi i totonu o aiga, o se vaega ‘B’ o solitulafono mama, e mafai ona nofosala ai i le falepuipui mo le ono masina, po o se sala tupe e $300; po o faasalaga uma e lua.

E $300 lea ua faatulaga e mafai ona tatalaina ai le ua molia, e faatalitali ai lona faamasinoga.