Ads by Google Ads by Google

Pu’e faapagota le ali’i na ia fasi faamo’amo’a lona to’alua

ausage@samoanews.com

O le vaiaso na te’a nei na pu’e faapagota ai e Leoleo se ali’i e 33 tausaga le matua mai Ottoville i Tafuna, ona o tu’uaiga i lona fasi faamo’amo’a lea o si ona to’alua a o matamata i ai lana fanau teine laiti e to’alua.

 

E pei ona taua e le malo i le latou tagi e fa’apea, o le afafine e 7 tausaga le matua a le alii ua molia na ia vilia le telefoni o le 911 ma logo i ai lona Tina ua manu’a lona tino ina ua fasi e lona Tama (le ua molia), ma aga’i atu ai loa se vaega to’atele o Leoleo e tali i le valaau.

 

O lenei mataupu na tula’i mai i le masina o Fepuari na te’a nei, ae o le vaiaso na te’a nei na faatoa mafai ai ona pu’e faapagota e Leoleo le ua molia ma tula’i ai i loa i luma o le Faamasinoga Faaitumalo mo lana ulua’i iloiloga.

 

[O le a le mafai e le Samoa News ona faailoa le suafa o le alii ua molia, ona o puipuiga lava i le ono mafai lea ona iloa atu ai le na aafia i lenei fa’alavelave].

 

O moliaga ua faia faasaga i le alii ua molia e aofia ai le moliaga e tasi o le faaoolima i le tulaga lua, faapea ai ma le moliaga e tasi o loa taofia faamalosi lea o se tagata e aunoa ma se mafua’aga, o vaega D ia o solitulafono mamafa, lea e mafai ona fa’asala ai se tasi i le Toese mo le umi e le silia i le 5 tausaga, pe fa’asala foi i le salatupe e le silia i le $5,000, pe faasala foi i faasalaga uma ia e lua.

 

O lo o tu’uaia fo’i le ua molia i le moliaga e tasi o le faaoolima i le tulaga tolu, faapea ai ma moliaga e 2 o lona faia o gaioiga e ono lamatia ai le saogalemu o fanau e laiti i lalo o le tulafono, o le vaega A lea o solitulafono mama, lea e mafai ona fa’asala ai se tasi i le Toese mo le umi e le silia i le tasi le tausaga, pe faasala fo’i i le salatupe e le silia i le $1,000, poo faasalaga uma fo’i e lua.

 

E $15,000 le tupe lea ua fa’atulaga e le afioga i le ali’i Fa’amasino ia Elvis P. Patea e tatala ai i tua le ua molia. Afai ae tatala o ia i tua, e le mafai ona ia toe taumafai e faafesootai lona to’alua ma lana fanau, e le tatau foi ona toe oo i le fale na tulai mai ai le faalavelave, ae tatau ona saili se isi nofoaga e nofo ai a o faagasolo ai taualumaga o lana mataupu.

 

O le aso Faraile o le vaiaso nei lea ua faatulaga e faia ai le uluai iloiloga o lenei mataupu i luma o le afioga i le Faamasino ia Elvis P. Patea.

 

TAGI A LE MALO

 

E pei ona taua e le malo i le latou tagi e fa’apea, o lenei mataupu na tofu atu i le Ofisa o Leoleo i Tafuna i le aso 29 o Fepuari na te’a nei, ina ua vili e se teineititi e 7 tausaga le matua le 911 na talosaga i ai mo se fesoasoani, ona o lona Tina ua manu’a sa fasi e lona Tama.

 

E to’atele Leoleo na tali atu i le valaau ma maua ai loa le avanoa e talanoa ai ma le teineititi na vilia le telefoni.

 

Na taunu’u Leoleo i le fale o le aiga i Ottoville ma latou maua atu ai le Tina o lo o taoto i luga o le moega i totonu o le potu o le fale, o lo o tagi ma lona tino ua gatete atoa i le fefe. Sa maitauina e Leoleo manu’a i le tino o le Tina na a’afia, e aofia ai lona ulu ma ona foliga. Sa vaaia foi le pisia o totonu o le fale i le toto na mafua mai i le taimi na faaoolima ai le ua molia i lona to’alua. Na sola ese le ua molia mai le fale ae le i taunu’u atu Leoleo.

 

Na auina atu le Tina na a’afia i le ta’avale a le EMS mo togafitiga i le Falema’i i Fagaalu, atoa ai ma lana fanau teine e toalua, lea fo’i na auina atu e Leoleo i le Ofisa mo lo laua saogalemu.

 

Na maua le avanoa e fesiligia ai e Leoleo le Tina na aafia e tusa ai o le mafua’aga o le faalavelave na ala ai ona faaoolima lona to’alua ia te ia.

 

Na taua e le Tina i Leoleo e fa’apea, sa manaia lava le la talatalanoaga ma lona to’alua i lea afiafi i totonu o le fale. Sa ia fai fo’i i lona to’alua, e tatau ona vave alu i le Faleoloa e fai mai se fa’atau mo le Toona’i o le Aso Sa.

 

Na faateia le Tina ina ua faafuase’i ona ita lona to’alua i sana faamatalaga sa lafo atu i ai, ma mafua ai loa ona tula’i mai se taugaupu i lo la va. A o faia le taugaupu, na faafuase’i ona tu’i e le ua molia o ia ma palasi ai i lalo. Sa faaauau ona ta tu’i e lona to’alua ona foliga ma toso solo o ia i totonu o le fale.

 

Na taua e le  Tina i Leoleo lona taumafai e sola ese peita’i na matua taofi lelei o ia e lona to’alua ae fa’aauau pea ona fasi o ia, ma mafua ai loa ona aafia ona foliga faapea ai lona mata agavale.

 

A o fasi e le ua molia lona to’alua, sa alaga leotele le Tina i luga mo se fesoasoani peita’i na atili ai ona taumafai le ua molia e faia gaioiga uma ina ia aua ai nei lagona e se isi le alaga fia ola a lona to’alua. Ae o le itu e sili ona faanoanoa ai e pei ona taua e le Tina na aafia i Leoleo, o nei gaioiga uma sa vaai i ai si ana fanau laiti e to’alua, le tama’ita’i e 7 tausaga ma le tamaitai e 9 tausaga le matutua.

 

Na mae’a ona fasi e le ua molia lona to’alua i le umukuka, i totonu lava o le fale, ona toso faatata lea o se fafine i luma o le potu malolo ma toe fa’aauau ai le fasiga, a o matamata i ai lana fanau.

 

A o tafiti le Tina na aafia ma taumafai e tete’e atu sau’aga a lona to’alua, na aapa atu le ua molia i le ‘Ali laupapa sa taatia i totonu o le fale ma sasa ai le ulu ma foliga o lona to’alua, peita’i na fa’aaoga e le Tina na aafia ona lima e tali ai ta malolosi a lona to’alua, ma mafua ai ona unaoa ona lima faapea ai se foa i lona ulu ma lona tino na tiga ina ua tau ai le ‘Ali.

 

A o  fasi e le ua molia lona to’alua, sa ia folafola i ai le isi mea e sili atu ona leaga na te faia ia te ia, pe afai na te ta’uina i se isi le mea sa tupu. Na faatonu fo’i e le ua molia lana fanau, e aua ne’i i ai se isi o laua e tautala e faatatau i le mea sa tupu.

 

Na maua le avanoa o Leoleo e fesiligia ai le fanau teine laiti e to’alua a le Tina na aafia e tusa ai o le faalavelave sa tula’i mai.

 

Na pau le faamatalaga a le teineititi matua e 9 tausaga na tuuina atu i Leoleo, sa ia lagonaina le taimi na alaga leotele ai lona Tina i le fia maua o se fesoasoani, a o fasi faamo’amo’a e lona Tama.

 

Ae o le teineititi laititi e 7 tausaga lea na vilia le 911, o ia lea sa mafai ona ia tuuina atu i Leoleo faamatalaga e uiga i le mea sa tupu. Na taua e le teineititi lea i Leoleo e fa’apea, o le taimi lava na maua ai lona avanoa, na alu ai i le atoa ma faaaoga le telefoni e vili ai le 911 mo se fesoasoani. Sa ia tago fo’i ma vili lona aunty ma fai i ai e alu atu vave e fesoasoani i lona Tina ua fasi e lona Tama.

 

Na taua atili e lenei alualutoto i Leoleo, lona vaai tino lava i le taimi na faatino ai e lona Tama le solitulafono, e ala i lona fasi faamo’amo’a o si ona Tina e aofia ai le ta tu’i o ona foliga faapea ai le sasa o lona tino i le ‘Ali.