Ads by Google Ads by Google

Pu’e faapagota e Leoleo le ali’i sa tau saili i le talepe fale ma le gaoi


[ata: foa'i]
ausage@samoanews.com

Pago Pago - AMERIKA SAMOA

 

O le ali’i lea na tau saili e Leoleo mo le tele o masina ona o tu’uaiga i lona aafia lea i le osofaiga sa faia faasaga i se fale i Tafeta i le amataga o le tausaga nei, ua taofia nei i le Toese i Tafuna ina ua pu’e faapagota o ia e Leoleo i le masina na te’a nei, e mafua mai i se isi fo’i solitulafono o loo tu’uaia ai o ia.

 

Ina ua fesiligia e Leoleo le susuga a Vincent Tufa’aga e tusa ai o tu’uaiga i lle fale na talepe i Tafeta ae ave faagaoi le tele o mea aoga sa i ai, na teena e le ua molia lona auai i le faatinoina o lea solitulafono. Sa ia taua i Leoleo e fa’apea, e le o ia o se tagata solitulafono i totonu o lona nu’u.

 

E pei ona taua e le malo i le latou tagi e fa’apea, i le aso 12 o Ianuari 2022 ao paka le ta’avale a se ali’i Leoleo ofu savili i le vaega e paka ai ta’avale i le Falema’i o le LBJ Medical Hospital i Faga’alu, sa ia molimauina ai se faalavelave na tula’i mai i lea nofoaga, o se alii na faaoolima i se Tama ma sona atali’i.

 

Na iloa mulimuli ane e Leoleo, o le ali’i na faatinoina le solitulafono o le faaoolima i se Tama ma lona atalii, o le susuga lea ia Vincent Tufa’aga, le ali’i o loo molia i lenei mataupu.

 

Na taua e le ali’i Leoleo ofu savili i Leoleo Suesue e faapea, a o nofo i totonu o lana ta’avale e faatali lona Faletua o loo alu e piki mai fualaau a lona Tina, na ia vaaia ni ali’i se to’alua o loo tau upu i le vaega e paka ai ta’avale i le falema’i i Faga’alu. O i laua ia e to’alua, o Tufa’aga ma le ali’i na aafia i lenei mataupu.

 

E le i umi ona tau upu alii nei e to’alua, ae ona vaaia loa le tu’i e Tufa’aga o le Tama na aafia ma palasi ai le Tama lea i lalo. Ao le i faaoolima Tufa’aga i le Tama na aafia, na muamua po e Tufa’aga le ali’i laitiiti e 12 tausaga le matua o le Tama na aafia.

 

Ina ua mae’a ona faaoolima Tufa’aga le Tama na aafia ma palasi ai i lalo, na vaaia le toe tu i luga o le Tama na aafia ma toe savali atu i le vaega o loo tu mai ai Tufa’aga ma toe faaauau le la talanoaga. 

 

Na mae’a le talanoaga a Tufa’aga ma le Tama na ia faaoolima i ai, ona vaaia lea o le savali atu o Tufa’aga ma oso i lana ta’avale ma alu ese loa. Na faigofie ona iloa e le Leoleo ofu savili mai totonu o lana ta’avale le susuga a Tufa’aga, o ia lea o loo masalomia i le faalavelave lea na osofa’i ai e nisi se fale i Tafeta.

 

Na logo e le Leoleo ofu savili le Ofisa o Leoleo i Fagatogo e tusa ai o le fa’alavelave na tula’i mai i le vaega e paka ai ta’avale i le Falema’i o le LBJ, ma aga’i mai ai loa Leoleo ma taofi le ta’avale a Tifaga i luga o le alatele ae auina atu i le Ofisa mo suesuega.

 

Na auina atu fo’i e Leoleo le Tama ma lona atali’i na aafia i le Ofisa o Leoleo i Fagatogo mo le faatalatalanoaina o le faalavelave na tula’i mai.

 

A o le i auina atu Tufa’aga i le Ofisa o Leoleo i Fagatogo, na siaki e Leoleo lona tino mo ni aupega poo ni fualaau faasaina. 

 

Na saili e Leoleo le tino o le ua molia ma maua ai se tama’i ato uliuli i le taga o lona ofu. I totonu o le tama’i ato uliuli na maua ai e Leoleo pepa iila e 4. O le 3 o nei pepa iila na maua i ai lau mamago o le laau faasaina o le mariuana, ae o le isi pepa iila e tasi na maua i ai vaega o le pauta pa’epa’e o le aisa.

 

Na taua e le Tama na aafia i lana faamatalaga i Leoleo e faapea, na la o ma lona atali’i e piki mai fualaau a lona to’alua o loo gasegase i le fale. Ina ua la taunuu i le Falema’i, sa ia faatonu lona atalii e faatali atu i totonu o le ta’avale ae sei alu e piki mai fualaau i le Fale Talavai.

 

Na taua e le Tama lea i Leoleo Suesue e faapea, e oo mai loa i le vaega e paka ai ta’avale, ae ona vaaia loa le tau o le po a Tufa’aga i le ulu a lona atalii, sosoo ai ma le una’i e Tufa’aga o lona atalii aga’i i le keli o le ta’avale.

 

Na sosoo lava le vaega na paka ai le ta’avale a le Tama ma lona atalii ma le vaega na paka ai le ta’avale a Tufa’aga. Na fesili e Leoleo le atali’i o le Tama na aafia i le mafua’aga na faaoolima ai Tufa’aga ia te ia. 

 

Na taua e le alii talavou i Leoleo Suesue e faapea, o ia sa taalo i lana telefoni i le va o le latou ta’avale ma le ta’avale a Tufa’aga. Na te le i iloa o loo i ai Tufa’aga i totonu o lana ta’avale. Sa i ai le taimi na ia faalagolago ai i le faitoto’a o le ta’avale a Tufa’aga, atoa ai ma lona taumafai e solo i ona lima vaega o le tioata o le ta’avale a Tufa’aga na pipi’i ai palapala.

 

Na taua e le tamaitiiti le faateia o ia ina ua tatala e Tufa’aga lana ta’avale ma savali mai i fafo ma ee leotele atu ia te ia, ma faatonu o ia e alu ese ma lana ta’avale. 

 

A o taumafai le tamaitiiti na aafia e tatala le faitoto’a o le la ta’avale ma lona Tama ma le faamoemoe e ulufale i totonu, na faateia o ia ina ua kola atu e Tufa’aga le ua o lona ofu sa fai sosoo ai loa ma le tau o lana po o lona ulu, faatoa tago ai loa Tufa’aga ma una’i o ia aga’i i le keli o le pikiapu.

 

A o le i fesiligia e Leoleo le susuga Tufa’aga, na muamua faailoa i ai ona aia tatau i lalo o le Tulafono. Na faailoa e Tufa’aga i Leoleo Suesue lona malamalama lelei i ona aia tatau i lalo o le Tulafono, ma ua ia sauni fo’i e talanoa e tusa ai o le faalavelave na tula’i mai.

 

Na taua e Tufa’aga lona le fiafia ina ua ia vaaia le taumafai o le tamaitiiti na ia faaoolima ai e tatala le faitoto’a o lana ta’avale. E le i iloa e le tamaitiiti na aafia  o loo i ai o ia i totonu o le ta’avale. Na oso a’e ona masalosaloga, o loo taumafai le tamaitiiti talavou lenei e osofa’i lana ta’avlae, o lea na oso ai loa i fafo ma lana ta’avale ma valaau atu i le tamaitiiti e alu ese ma lana taavale.

 

E tusa ai ma le faamatalaga a Tufa’aga i Leoleo, sa palauvale atu le tamaitiiti na aafia ia te ia, o lea na ia faaoolima ai loa e ala i lona po ina o lona ulu ma toe una’i lona tino aga’i i le keli o le pikiapu.

 

E fetaui le mae’a ona ia faaoolima i le tamaitiiti na aafia ae ona vaaia loa le fotua’i atu o se Tama ia te ia, ma fesiligia o ia i le mafua’aga na ia faaoolima ai i lona atali’i. A o talanoa Tufa’aga ma le Tama o le tamaitiiti na aafia, na ta’utino Tufa’aga, sa ia faaoolima i le Tama o le tamaitiiti na aafia e ala i lona tu’i ina o lona gutu ma pau ai i lalo le Tama na aafia.

 

Ina ua fesiligia e Leoleo Suesue ia Tufa’aga e tusa ai o fualaau faasaina na maua i le taga o lona ofu, na taua e le ua molia, o fualaau faasaina na aumai i se tasi o ana uo e fa’aaoga e maua ai lona malosi i le taimi e fa’atino ai galuega i lana ma’umaga.

 

TALEPE FALE I TAFETA

 

Na teena e le alii ua mollia lona aafia i le faalavelave lea na osofa’i ai e tagata se fale i Tafeta. Na taua e le ua molia e faapea, o ia e nofo i Ottoville, pe faapefea ona aafia i le gaoiina o se fale i Tafeta.

 

O le masina na te’a nei na tula’i ai Tufa’aga i luma o le Fa’amasinoga Faaitumalo. 

 

E 2 tagi ua faaulu e le malo ma faasaga ia te ia.

 

I le tagi muamua, ua molia ai e le malo ia Tufa’aga i le moliaga e tasi o le gaoi atoa ai ma le moliaga e tasi o talepe fale i le tulaga 2, o le vaega C lea o solitulafono mamafa.

 

I le tagi lona 2, o loo tu’uaia ai e le malo ia Tufa’aga i le moliaga e tasi o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o vaega o le pauta faasaina o le mariuana, o ni solitulafono mamafa e mafai ona faasala ai se tasi mai le 10 e oo atu i le 10 tausaga, pe faasala i le salatupe e oo atu i le $20,000; o lo o tu’uaia fo’i le ua molia i le moliaga o le faaoolima i le tulaga tolu, faapea ai ma le moliaga e tasi o le faia o gaioiga e ono lamatia ai soifua o nau laiti, o le vaega A lea o solitulafono mama.