Pago Pago, AMERIKA SAMOA

O le ali’i talavou e 25 tausaga le matua lea na pu’e faapagota e Leoleo i le masina na te’a nei, ina ua masalomia lona aafia i le solitulafono lea na latou talepeina ai se fale i le 2 masina ua tuana’i ae ave faagaoi le tele o meatotino sa i totonu o le fale, ua molia nei i lona le usitaia o tulafono tau i fualaau faasaina, ina maua e Leoleo vaega o le pauta faasaina o le aisa i le taga o lona ofu i le taimi na pu’e faapagota ai o ia.

O le masina na te’a nei na tula’i ai le susuga a Naasoa Iosia i luma o le afioga i le ali’i Fa’amasino ia Elvis P. Patea.

O le ali’i loia sili lagolago ia Robert Morrison III na tula’i mo le malo, ae o le ali’i loia fautua lagolago ia Ryan Anderson na tula’i mo le susuga a Iosia.

O moliaga ua faila fa’asaga i le susuga a Iosia e aofia ai le moliaga o le umia faasolitulafono o vaega o le pauta faasaina o le aisa, o se solitulafono e mafai ona faasala ai se tasi i le Toese mo le umi mai le 5 e oo atu i le 10 tausaga, pe faasala i le salatupe e le silia i le $20,000, poo le faasala foi i faasalaga uma ia e 2.

O lo o molia fo’i o ia i le moliaga o le gaoi ma le talepe fale i le tulaga lua, o le vaega C lea o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, pe fa’asala fo’i i le salatupe e le silia i le $5,000, poo le fa’asala fo’i i faasalaga uma ia e lua.

E $15,000 le vaega tupe lea ua fa’atulaga e totogi ona fa’atoa mafai lea ona tatala le ali’i ua molia i tua mai le Toese i Tafuna.

Afai ae mafai ona tatala o ia i tua, ua fautuaina o ia e le Fa’amasinoga e aua ne’i ona toe taumafai e faafesoota’i molimau a le malo i soo se auala, faasa ona toe tu i le nofoaga na tula’i mai ai le fa’alavelave, ma ia avea o ia ma tagatanu’u e tausisi i tulafono a le malo. E le mafai ona ia tuua le atunuu i soo se taimi sei vagana se faatonuga mai le Fa’amasinoga, ma ia feso’ota’i vava lalata ma lana loia i soo se taimi e valaau ai lana mataupu.

O le vaiaso fou lea ua fa’atulaga e faia ai le ulua’i iloiloga o lenei mataupu, e iloilo ai e le Fa’amasinoga mau a le malo, pe lava ma totoe e lagolago ai le latou tagi ua fa’aulu fa’asaga i le ua molia.

TAGI A LE MALO

O lo o taua i le tagi a le malo e fa’apea, o le aso 21 o Fepuari i le amataga o le tausaga nei na talosagaina ai e se Tina le fesoasoani a le Ofisa o Leoleo i Tafuna, ina ua ia maitauina le fale a lona Pule i se vaega i Tafuna, ua talepe ma ave faagaoi e tagata le tele o meatotino sa i totonu. Na taua e le Tina lea i Leoleo e fa’apea, sa ia savali i vaega uma o le fale ma ia iloa ai le tele o meatotino ua faaleagaina, ae o isi meatotino e foliga mai ua gaoia ma aveesea.

E to’atele Leoleo na aga’i atu e tali i le valaau, lea na maua ai le avanoa latou te molimauina ai fo’i mea sa faaletonu i totonu o le fale, e aofia ai ma le sefe na maua i lalo o le auvai ua uma ona talepe ma faaleaga.

Na saili e Leoleo le itu sa aga’i atu i ai le auala na asa mai e le tagata sa masalomia lona faatinoina o lenei solitulafono, ma o lea auala, e tau tonu lava i tua o le fale o le susuga a Iosia, e le mamao ma le nofoaga e i ai le fale na osofaia ma faaleaga.

Na fesiligia e Leoleo le Tina sa ia viliina le Ofisa mo se fesoasoani, faapea ai ma isi tagata faigaluega sa latou i ai, mo le tuuina atu o ni fa’amatalaga e uiga i lenei mataupu.

Na taua e le Tina na ia logoina Leoleo e fa’apea, i le 2 aso talu ai ae lei tulai mai le faalavelave na faatonu ai o ia e lona Pule faatasi ai ma isi Tina faigaluega, latou te o e siaki lona fale i Tafeta ina ia mautinoa o loo loka uma faitoto’a ma ia ki uma moli o le fale.

Na aga’i atu le Tina lea ma isi tama’ita’i faigaluega ma latou faatinoina le faatonuga. E le gata na loka uma faitoto’a o le fale ae sa ki fo’i moli e tusa ai o le fa’atonuga a le tama’ita’i Pule.

I le taeao o le aso na sosoo ai, na toe aga’i atu ai le aufaigaluega e siaki le fale a le latou Pule poo lelei mea uma, peita’i na fa’ateia i latou ina ua taunu’u atu, e le gata ua malepe le isi faitoto’a ae ua tape fo’i e le tagata moli uma o le fale sa fa’aola i le po atoa.

Na ta’amilo le aufaigaluega i tulimanu uma e fa o le fale e siaki mea uma ua faaletonu, ma latou molimauina ai le tele o vaega o le fale ua faaleagaina, tele fo’i mea totino ua masalomia le ave faagaoi, atoa ai ma le sefe na maua o loo taatia i lalo o laau.

Ina ua mae’a ona fesiligia e Leoleo sui o le aufaigaluega e tusa ai o lenei mataupu, sa latou taumafai ai loa e saili nisi molimau e mafai ai ona fesoasoani i le latou suesuega. O se tasi o molimau na mafai ona fesiligia e Leoleo, o se tama’ita’i sa ia manatu e ofo atu lana fesoasoani e tusa ai o ni fa’amatalaga o loo ia iloa e faatatau i lenei mataupu.

Na taua e le tama’ita’i lea i Leoleo e fa’apea, pe tusa o le itula e 2:45 i le vaveao o le aso na sosoo ma le po na tula’i mai ai le fa’alavelave, sa ia vaaia ai se ali’i o savali atu i le vaega o loo i ai le fale na a’afia. Sa ia fesiligia lea ali’i poo fea e alu i ai, ae na tali o ia, na alu atu e saili se paipa o loo ola e feinu ai le latou aiga, ona o loo pe uma paipa i le latou nu’u.

E lei iloa e le ali’i lea na talanoa ma le tama’ita’i lea, sa mafai e le tama’ita’i lea ona pu’e lona ata i lana telefoni. O lea ali’i, o ia tonu lea o loo molia i lenei mataupu.

Na matamata Leoleo i le ata o le ua molia ma latou iloa ai, o ia lea sa molia fo’i i nisi o mataupu tau talepe fale ma le gaoi i ni masina ua tuana’i atu.

Na maua le avanoa o Leoleo e fesiligia ai le Pule o le fale e tusa ai o lenei mataupu. Na taua e le Tama’ita’i Pule i Leoleo e fa’apea, i le po o le aso 10 o Iulai ao pisi ai e tapena ana ato mo le malaga ese atu i Apia, na faafuase’i ai ona fiu e su’e le ki o lana ta’avale sa ia tuuina i luma o le afi o le ta’avale ao taumafai e la’u mai ana ato pa’u mai totonu o le fale e aga’i atu i totonu o le ta’avale.

Na toe alu i totonu o le fale e su’e ai le ki o le ta’avale peita’i e lei maua lava, o lea na ia vili ai loa i lana aufaigaluega e aumai le sipea ki o le ta’avale. Sa ia faatonuina fo’i le aufaigaluega e loka uma faitoto’a o le fale ma ki molimau, ona o lea ua ia masalosalo i le ono mafai lea e se tagata ona osofa’i le fale, e fa’aaoga ai le ki lea ua leiloa.

E tusa ai ma le ripoti o meatotino na gaoia na mafai ona tuuina atu i Leoleo, e silia i le $40,000 le tau aofa’i o meatotino na gaoia pe afai ae fa’atupeina.

O mea na gaoia e aofia ai filifili auro, o mama auro, o tautaliga auro, o telefoni, laptop, computers, atoa ai ma pepa aoga mo le aiga o le tama’ita’i Pule.

O se ali’i talavou e malamalama lelei i le ali’i ua molia na ia alu ma faailoa i Leoleo nisi o faamatalaga e uiga i lenei mataupu.

Na taua e le ali’i lea i Leoleo e fa’apea, sa ia vaaia le susuga a Iosia ma le isi ali’i o amo atu a laua ato faa fafa lapopo’a lava ma le la faamatalaga, o loo tau saili nisi e faatau ai a laua filifili auro ma mama auro na maua mai i le isi ulugali’i. 

Na alu fo’i Iosia ma fa’afesuia’i nisi o oloa na gaoia i fualaau fa’asaina mai se tasi o ali’i. Na maua e Leoleo nisi o filifili auro ma tautaliga auro na masalomia na gaoia mai le fale o le tama’ita’i Pule, ma mafai ai ona toe faafo’i uma atu nei meatotino i le Pule o le fale.

Ina ua fesiligia e Leoleo ia Iosia e tusa ai o lenei mataupu, sa ia ioeina ai i Leoleo lona osofaia o le fale na aafia ae ave faagaoi oloa sa i ai.

A o le i auina atu Iosia i le Ofisa o Leoleo i Tafuna ma suesuega, na saili e Leoleo lona tino mo ni aupega. I totonu o le taga o le ofuvae a Iosia sa laei i lea aso, na maua ai e Leoleo se pepa iila o loo i ai vaega o le pauta faasaina o le aisa.

Ina ua fesiligia e Leoleo ia Iosia e faatatau i le pepa na maua ai vaega o le pauta faasaina, sa ia taua e faapea, o le pepa na ia maua i luga o le alatele.