Ads by Google Ads by Google

Pu’e faapagota i le Faaoolima ae maua ai fualaau fa’asaina


[ata: foa'i]
ausage@samoanews.com

Pago Pago, AMERIKA SAMOA

 

Ua faaopoopo nei e le malo isi moliaga faasaga i se ali’i e 45 tausaga le matua mai Pago Pago, ina ua pu’e faapagota o ia ona o tu’uaiga i lona faaoolima i se isi tagata ae maua ai e Leoleo fualaau fa’asaina i totonu o le ato faafafa sa fealua’i ma ia.

 

O le vaiaso na te’a nei na tula’i ai le susuga a Dave Vasa i luma o le Fa’amasinoga Faaitumalo mo lana ulua’i iloiloga. O le alii Loia Fautua ia Michael White na tulai mo le ua molia, ae o le alii loia sili laglago ia Robert Morrison III na tula’i mo le itu a le malo.

 

E 3 tagi eseese ua faila e le malo fa’asaga ia Vasa. I le tagi muamua, o lo o tu’uaia ai le ua molia i moliaga mamafa e 2 e aofia ai le faaoolima i le tulaga mua faapea ai ma le taumafai e ave faamalosi se tagata, o le vaega D lea o solitulafono mamafa, faapea ai ma le moliaga mama e tasi o lona faia lea o ni gaioiga e save’u ai le nonofo filemu o tagata lautele.

 

I le tagi lona 2, ua molia ai e le malo le susuga a Vasa i le moliaga o le umia faasolitulafono o vaega o le pauta fa’asaina o le aisa; faapea ai ma le umia faasolitulafono o vaega o le laau fa’asaina o le maruana; o ni solitulafono mamafa e mafai ona fa’asala ai se tasi i le toese mo le umi e le itiiti ifo i le 5 tausaga ae le sili atu i le 10 tausaga, pe faasala foi i le salatupe e le itiiti ifo i le $5,000 ae le sili atu i le $20,000.

 

Ma le tagi lona 3, ua molia ai le ua molia i le moliaga e tasi o le gaoi, faapea ai ma le moliaga e tasi o le talepe fale i le tulaga muamua, o le vaega C lea o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, pe fa’asala foi i le salatupe e le silia i le $5,000, poo le fa’asala fo’i i fa’asalaga uma ia e lua.

 

E $25,000 le tupe lea ua fa’atulagae le Fa’amasinoga e totogi ona fa’atoa mafai lea ona tatala Vaafa’i i tua mai le toese i Tafuna. 

 

Afai ae mafai ona tatala o ia i tua, ua poloaina o ia ina ia auai i soo se taimi e valaau ai lana mataupu, fesoota’i vava lalata ma lana loia, ma ia tuuina atu fo’i lona tusi folau e taofi e le malo, se’i vagana ua mae’a taualumaga o lana mataupu ona fa’atoa mafai lea ona toe tu’u atu lona tusi folau ia te ia.

 

E le mafai ona ia tuua le atunuu i soo se auala, pe taumafai fo’i e sola faamalosi ese, e le mafai fo’i ona ia taumafai i soo se auala e faafesoota’i ai molimau a le malo e aofia ai ma i latou o lo o a’afia i lenei mataupu.

 

E pei ona taua e le malo i le latou tagi e fa’apea, ina ua mae’a ona pu’e faapagota e Leoleo ia Vasa ona o le faalavelave lea na tulai mai i Pago Pago i le po o le aso 10 o Fepuari na te’a ne na maua ai fo’i e Leoleo fualaau fa’asaina ia te ia. 

 

A o faagasolo le fesiligia e Leoleo o Vasa e tusa ai o fualaau faasaina sa maua ia te ia, na ta’utino ai loa le ua molia, o ia fo’i lea na aafia i le faalavelave lea na osofa’i ma talepe ai e ni tagata se fale o se aiga i Satala i le po o le aso 28 o Tesema 2020 ma ave faagaoi le tele o oloa sa i ai i totonu o le fale.

 

TAGI MUAMUA A LE MALO

 

E pei ona taua e le malo i le latou tagi e faapea, o le po o le aso 10 o Fepuari na te’a nei na maua ai e le Ofisa Autu a Leoleo i Fagatogo se telefoni mai se Tina e 37 tausaga le matua, i lona fia maua lea o se fesoasoani, ona o se ali’i sa avea ma ana uo, sa ia faaoolima ia te ia e ala i lona ta tu’i o ona foliga ma ta kiki lona papatua ina ua pau i lalo, sosoo ai loa ma lona tu’u o se tama’i naifi i lona ua ma folafola le fasioti o ia ma lona aiga.

 

E to’atele Leoleo na aga’i atu e tali i le valaau, ma maua ai le avanoa latou te fesiligia ai le Tina na aafia i lenei mataupu.

 

Na taua e le Tina na aafia e faapea, pe tusa o le itula e 10 i le po o le aso na tula’i mai ai le fa’alavelave, na aga’i atu ai Vasa ma talosaga atu ia te ia, pe mafai ona la eva te isi i lona fale mo sina taimi ona toe alu ai lea o ia. Na talia e le Tina talavou le talosaga a Vasa ma fai ai loa le la evaga i lona fale e aofia ai ma nai fagupia sa inu i lea po.

 

Pe tusa o le itula e 11:00 i le po lava lea, na mana’o ai loa Vasa la te aga’i ma le Tina lea i totonu o le fale, peita’i sa musu le Tina ma fai ia Vasa ua tatau loa ona alu, ua lagona fo’i lona fia moe ma ua fia alu i totonu o lona fale e malolo, peita’i na tauanau pea e Vaafa’i le na aafia la te aga’i i totonu o le fale e faauma ai le la tafaoga, ae sa musu pea lava le na a’afia.

 

Na faateia le Tina na a’afia ina ua faafuase’i ona tu’i e le ua molia o ia ma palasi ai i lalo, ma tau lona ulu i le pito o le sima sa la nofonofo ai, ma aafia ai lona ulu i se manu’a tuga. E le i toe faatali le ua molia ae ua oso atu loa ma toso faatata mai le ua molia i luga, ae tuu ai le tama’i naifi i lona ua, ma taumafai e toso faamalosi o ia i totonu o le fale. Na kiki fo’i e le ua molia le papatua o le Tina ma folafola i ai le fasioti o ia.

 

Na tauivi le ua molia ma le Tina talavou na aafia, e ala i lona taumafai o le Tina na aafia e una’i ese o ia, ae sa taumafai pea le ua molia e toso faamalosi o ia i totonu o le fale, seia oo ina ee i luga le Tina na aafia ma faamamulu ai loa e le ua molia le na aafia ae alu i le atoa.

 

Na maua atu e Leoleo le ua molia o lo o inu mai i tafatafa o se tasi o faleoloa i totonu lava o le nuu o Pago Pago. O le taimi lava na iloa mai ai e le ua molia le ta’avale Leoleo ua aga’i atu, o le taimi fo’i lea na ia tia’i ese ai se ato faafafa lanu uliuli sa faafafa i lona papatua. 

 

Na pu’e faapagota e Leoleo le ua molia atoa ai ma le mafai fo’i lea ona ave faatasi atu ai ma le ato faafafa na ia tia’i esea, ma aga’i atu loa i le Ofisa o Leoleo i Fagatogo mo suesuega.

 

Ina ua saili e Leoleo totonu o le ato faafafa, sa maua ai ni tama’i taga pepa iila se lua. O le isi pepa iila o lo o i ai vaega o le pauta paepae o le aisa, ae o le isi pepa iila sa i ai vaega o le lau mamago o le mariuana. Na faia se suega faapitoa i fualaau fa’asaina sa maua ma faamaonia ai, o vaega ia o fualaau fa’asaina.

 

Ina ua fesiligia e Leoleo le ua molia, sa ia ioeina ai lona faaoolima i le Tina na aafia, e mafua mai i lona ita ina ua musu le na aafia la te aga’i i totonu o le fale e matamata le TV.

 

Na ta’utino Vasa i Leoleo e fa’apea, e le gata sa ia tu’iina le gutu o le Tina na aafia, ae sa ia tuuina fo’i se tama’i naifi i lona ua, atoa ai ma lona taumafai e toso faamalosi o ia i totonu o le fale, ina ia mafai ai ona la o e matamata le TV ma faaauau ai le la evaga.

 

I le mataupu e fa’atatau i le fale o se tasi o aiga i totonu o le afioaga lava o Pago Pago, lea na osofaia e ni isi i le masina o Tesema o le tausaga na te’a nei, na ta’utino le ua molia, o ia ma ni ali’i se to’alua na latou osofaia lea fale ae ave faagaoi ni isi o meatotino sa i totonu.

 

O ni isi o nei meatotino na gaoia e aofia ai telefoni feavea’i; lavalava; pea seevae; masini laptop e 2, faapea ai ma se tinoitupe.

 

O ni isi o oloa na gaoia e pei ona taua e Vasa, na ave e faatau mai ai fualaau faasaina mai se alii i Vaitogi, ae o isi oloa sa latou fa’aaogaina lava mo i latou lava.

 

E talitonu le Samoa News o lo o taumafai pea le malo e saili alii e toalua na fesoasoani ia Vasa i le osofaia o le fale o le aiga na aafia i Pago Pago.

 

O le tausaga e 2017 na ta’usala ai e le Faamasinoga Faaitumalo le susuga a Vasa i le moliaga o le taumafai e talepe se fale o se aiga faapea ai ma le faaoolima. O ia moliaga na mafua mai i le faalavelave lea na ia taumafai ai e ulufale faamalosi i le fale o se tamaitai sa avea muamua ma ana uo teine ina ua musu le tamaitai e faataga o ia e ulufale i totonu. 

 

Ina ua tatala e le tamaitai lea le faitoto’a ia Vasa, na faaoolima ai loa Vasa ia te ia ma manu’a ai ona foliga. O le tausaga e 2019 na mae’a ai le nofovaavaaia e 2 tausaga a Vasa.