Pago Pago, AMERIKA SAMOA

Ua faaopoopo e le malo isi moliaga mamafa faasaga i le ali’i e 40 tausaga le matua mai Ottoville lea na pu’e faapagota e Leoleo i le masina na te’a nei ona o tu’uaiga i lona fa’aaoga lea o se tamai naifi e faaoo ai manu’a tuga i se isi ali’i ae maua atu ai ma fualaau faasaina ia te ia. 

O le amataga o le masina na te’a nei na tula’i ai le susuga a Saumani Tulaga Jr i luma o le Fa’amasinoga Faaitumalo mo lana ulua’i iloiloga.

O moliaga ua tu’uaia ai e le malo le ua molia e aofia ai lona umia faasolitulafono o vaega o le pauta faasaina o le aisa, o se solitulafoo mamafa e mafai ona faasala ai se tasi i le Toese mai le 5 e oo atui le 10 tausaga, pe faasala foi i le salatupe e oo atu i le $20,000, poo le faasala fo’i i faasalaga uma ia e lua; faapea ai ma isi moliaga e aofia ai le faaoolima i le tulaga 2 ma le talepe fale i le tulaga lua, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, poo le faasala foi i faasalaga uma ia e lua; atoa ai ma moliaga mama e 2 o le faatupu vevesi i nofoaga faitele, faapea ai ma le fa’aaoga faasolitulafono o se aupega mata’utia.

Ua toe taofia nei Tulaga Jr i le toese i Tafuna e aunoa ma se tupe ua fa’atulaga e tatala ai o ia i tua. 

E ui na talosaga lana loia fautua i le Fa’amasinoga mo se avanoa e fa’atulaga ai se tupe e tatala ai le ua molia i tua, peita’i e talitonu le Fa’amasinoga, e le tatau ona tatalaina i tua le ua molia, ona o le tulaga matuia o le gaoiga e pei ona tu’uaia ai o ia.

Na taua e le loia fautua o lo o tula’i mo le ua molia i lana talosaga e fa’apea, e na o Tulaga Jr lava e faigaluega e tausi ai lona aiga, o ia fo’i o lo o maua mai ai le tupe e fesoasoani ai i le faatupeina o talavai a lona Tama matua.

E ui fo’i i le tagi a le malo fa’asaga i le ua molia, ae na taua e le loia fautua o loo tula’i mo le ua molia e fa’apea, e leai se isi na maliu poo se isi na manu’a tuga, se’i vagana ai lava nai manu’a laiti na aafia ai le tino o le ali’i na a’afia, e mafua mai ina ua fa’aaoga e Tulaga Jr le lau o le sapelu e sasa ai lona papatua.

Na matua tete’e malosi le loia a le malo i le talosaga ina ia fa’atulaga se tupe e tatala ai le ua molia i tua. Na taua e le loia a le malo e fa’apea, o le gaioiga sa faia e le ua molia e matua sili lava ona matuia. O le itu e laki ai, e leai se isi na maliu i le agaese sa ia umia ma fa’aaoga e faatino ai le solitulafono.

Na talosaga le loia a le malo i le fa’amasinoga ina ia faaauau pea ona taofia le ua molia i le Toese e aunoa ma se tupe e tatala ai i tua. I lona talitonuga, e sili atu le taofia o le ua molia i totonu o le falepuipui e mautinoa ai lona saogalemu, nai lo le tatala mai i tua ae toe tula’i mai ai se isi faalavelave e sili atu ona matuia i le lumana’i.

Na lagolagoina e le Fa’amasinoga le faafinauga a le malo ma faatumauina ai loa le taofia pea o le ua molia i le toese e aunoa ma se tupe e tatala ai o ia i tua.

O nisi o itu na silasila toto’a i ai le Fa’amasinoga, e le gata o le saogalemu o Tulaga Jr ae o le tausia fo’i o le saogalemu o tagata lautele ma le toe aafia i se isi gaioiga e sili atu ona matuia a le ua molia.

O le vaiaso fou lea ua faatulaga e faia ai le ulua’i iloiloga o le mataupu a le ua molia i luma o le Fa’amasinoga, lea fo’i laa maua ai ma le avanoa o le malo e folasia ai a latou molimau.

TAGI A LE MALO

E pei ona taua e le malo i le latou tagi e fa’apea, o le afiafi po o le aso 12 o Me na te’a nei, na faafesoota’i ai e se Tina le Ofisa o Leoleo i Tafuna mo se fesoasoani, e fa’atatau i se faalavelave na manu’a ai se isi ali’i i luma o le Faleoloa o le Kim’s Mart, e mafua mai ina ua fa’aaoga e se isi ali’i se tamai naifi e faaoo ai manu’a i le ali’i na a’afia.

E lei umi se taimi na taulimaina ai e le Ofisa o Leoleo le telefoni ae taunu’u loa se vaesga o Leoleo i luma tonu o le Faleoloa na tula’i mai ai le fa’alavelave, ma latou maiauina ai le tumutumu o tagata i luma o le faleoloa, faapea ai ma se ali’i o lo o manu’a ona foliga ma lona tino.

Na vave gaioiga a Leoleo e ala i le aoina mai lea o fa’amatalaga mai tagata sa i ai i le taimi o le fa’alavelave, ae o le taimi fo’i lea o lo o galulue ai sui o le EMS i le togafitiina o le ali’i na manu’a, seia oo lava ina auina atu o ia i le Falema’i i Faga’alu mo togafitiga.

Na maua le avanoa e fesiligia ai e Leoleo le Tina na ia faafesoota’iina le Ofisa o Leoleo mo se fesoasoani, i ana fa’amatalaga e tusa ai o le fa’alavelave sa tula’i mai. Na taua e le Tina lona molimauina o le taimi na ta tu’i ai e le ua molia foliga o le ali’i na a’afia, atoa ai ma lona fa’aaoga o se tamai naifi e tui ai lona papatua.

Na taua e le molimau e fa’apea, o ia sa i totonu o le Faleoloa faatasi ai ma le ali’i na a’afia. Ina ua mae’a ona totogi le fa’atau a le ali’i na a’afia, sa ia agai mai i loa i fafo o le faleoloa, ae aga’i atu o ia ua totogi lana fa’atau.

E fetaui lona ulufafo mai i le Faleoloa, ae ona faalogoina loa tagata o loo feei solo ma tauvalaau, “Vaai se isi i lavea!” Sa ia faliu atu i le isi itu o le vaega e paka ai ta’avale i luma o le Faleoloa, ma ia iloa atu ai se ali’i o loo ia tatu’i foliga o le isi ali’i, ae o loo uu i lona lima se tamai naifi umi.

Ina ua uma ona ta tu’i e le ali’i ua molia le tagata na manu’a ma palasi ai i lalo, sa ia vaaia loa le tago o le alii ua molia i le tamai naifi ma tui ai le papatua o le ali’i na manu’a ao taatia o ia i luga o le sima.

Sa ia vaaia se ali’i na aga’i mai i le pito i tua o le faleoloa ma le fa’amoemoe e fia aga’i atu i totonu e fai lana faatau, ae na avea le faalavelave ma itu na taumafai ai loa le ali’i lenei e fesoasoani i le tagata ua manu’a. Na taua e le molimau i Leoleo e fa’apea, ina ua iloa atu e le ua molia le aga’i atu o le ali’i lea e fesoasoani, sa tu’u ai loa lona faaoolima i le ali’i ua manu’a ae ua ia savali mai e faafetaui le ali’i lea ua aga’i atu ia te ia.

Na sola ese le ali’i lea na tau aga’i atu e fesoasoani ina ua ia iloa atu le tamai naifi o lo o uu mai i lima o le alii ua molia. 

O le taimi lava fo’i lea na taunu’u atu ai loa ma ni ali’i se to’alua i luma o le Faleoloa, ma la faatonuina ai loa le ua molia e alu ese ma luma o le Faleoloa. Na vaaia le savali ese atu o le ua molia i le isi itu ma aga’i atu ai lava i lona fale, lea e le mamao mai le vaega o lo o i ai le nofoaga na tula’i mai ai le fa’alavelave.

Ina ua mae’a ona fesiligia e Leoleo ia molimau e uiga i lenei fa’alavelave, na latou aga’i atu ai loa i le fale a le ua molia ma le fa’amoemoe e pu’e faapagota mai o ia. Ina ua latou taunu’u i le fale, sa latou vaaia ai le ua molia o loo saofa’i mai i tafatafa o lona Tina. 

Na umi se taimi o taumafai Leoleo e fa’atonu le ua molia e alu atu i fafo ma le fale se’i o latou talanoa. Mulimuli ane, na i’u ai loa ina fa’aaoga e Leoleo le malosi e pu’e faapagota ai le ua molia ma loka ai ona lima.

Na saili e Leoleo le tino o le ua molia ma maua i ai se pepa iila o loo i ai vaega o le fualaau faasaina o le aisa. 

Ina ua fesiligia le ua molia i le mafua’aga o lona faia o lenei gaioiga, sa ia taua ai e fa’apea, o ia na alu i le Faleoloa e fa’atau, ae fa’afuase’i ai ona tula’i mai le fa’alavelave e pei ona ia faaoolima ai i le ali’i na manu’a. Sa ia taua fo’i e fa’apea, o lona le fiafia i le ali’i ua aafia na mafua ai ona ia faatinoina le solitulafono.

Ina ua fesiligia e Leoleo le ua molia i le pepa iila na maua i le taga o lona ofu o loo i ai vaega o fualaau faasaina, na tali le ua molia, o le pepa na ia maua i luma o le faleoloa.