Pago Pago - AMERIKA SAMOA

O le amataga o le vaiaso sa fa’aleoina ai e le loia tutoatasi ia Aaron Warren, i luma o afioga Senatoa, ia le tulaga ua o’o iai lana su’esu’ega, i le faigamalo a Lemanu-Laapui, e tusa ai ma le fa’aaogaina o le $36 miliona, e aunoa ma se fa’atagana.

Ae na muai saunoa Warren, ona o le natura o lenei mataupu, o se su’esu’ega fa’alilolilo, o le a le ta tele i tua sana faamatalaga, se’ia vagana ua tapunia nei iloiloga, tau o ia ma afioga i Senatoa.  Ae sa ia tu’u atu pea i le faitalia a le Senate.

Sa saunoa le afioga i le Senatoa ia Togiola T.A. Tulafono, le nofo malamalama o le Senate i le natura o lenei mataupu ma ia fa’ailoa atu ia Warren, o le a gata a latou iloiloga i mataupu faigofie.

Na faamalamalama mai e Togiola, o lea o le a malolo le Senate ae o lo’o fia fa’alogologo afioga i Senatoa, i le tulaga ua o’o iai le su’esu’ega i lenei mataupu.

 Ae ua mae’a ona fa’ao’oina atu e  Warren i le Peresetene o le Senate, le afioga i le Senatoa ia Tuaolo Manaia Fruean, i le aso 10 o Iulai, ia se ripoti e tolu itulau, lea na fa’ailoa atu ai le to’ai amata o ana suesuega.  Ma sa lisi ai e Warren ia sitepu ua mae’a ona ia la’asia, talu ona filifilia o ia ia Mati e faatinoina lenei su’esu’ega.

Sa ta’ua foi e Wareen lona galue so’otau’au ma le ofisa a le Peresetene o le Senate, le ofisa a le Loia Sili faapea le Ofisa Su’etusi a le Teritori, mo le iloiloina o fa’amaumauga ma tala faasolopito, faapea lisosi o lo’o mafai ona fa’aaogaina mo lenei su’esu’ega.

Ae i lana ripoti i le aso Gafua, sa fa’aalia ai e Warren le fa’amae’aina o ulua’i fa’atalanoaga ma le iloiloina o lenei mataupu.  Ma ua saunia nei o ia e aga’i i luma i le iloiloina o fa’amaumauga ma fa’ataunu’u su’esu’ega a molimau.  O le a mafai ona fesoasoani ia te ia, e faia ai se fa’ai’uga i leisi la’asaga.

Na ta’ua foi e le loia tutoatasi, o lo’o iai sona talitonuga, o le a mafai ona manino atili lenei mataupu ma la’asaga o le a soso’o ai, i leisi 90 aso o i luma.

Sa fesiligia e le afioga i le Senatoa ia Poumele Pete Anoa’i Poumele ia Warren, e tusa ai ma lona soifua faigaluega.

Na fa’aalia mai e Warren, ua silia ma le 20 tausaga talu ona avea o ia ma loia.  O le taimi mulimuli lava sa ia taulimaina se mataupu fa’alesolitulafono (criminal), o le taimi na iai i Micronesia, i le 2015.  Lea sa ia galulue faatasi ai ma le FBI faapea le ofisa a le Loia Sili i Guam, e molia se ulua’i mataupu i lea atunu’u, na a’afia ai tagata sa o latou ave fa’anana ai ni tagata i atunu’u i fafo.

O lo’o galue nei Warren i le ofisa tuai a Barry Rose i Nu’uuli.  Ma o le tele lava o mataupu o lo’o latou taulimaina, o mataupu faapisinisi, ae e iai nisi o taimi e latou te tauaveina ai mataupu a le malo, pe a talosagaina e le malo le latou fesoasoani.

Sa fa’aalia foi e Warren, ua atoa le lima tausaga talu ona ia fa’amautu i totonu o Amerika Samoa.

Ina ua o’o atu Warren i luma o le Senate ia Iulai, sa ia ta’ua ai le le’i totogia o ana pili ae peitai, e le i aofia lea mataupu i le iloiloga i le aso Gafua.

Ua talosagaina nei e Tuaolo ia le alii loia tutoatasi ina ia toe fa’ao’oina atu seisi ripoti i le tulaga o ana su’esu’ega, i le amataga o le masina o Tesema.

(E fia fa’ailoa atu e le Samoa News, o le $36 miliona lea sa ta’ua e le faigamalo i totonu o tala o le tupe 2024, o tupe totoe mai.  Ae peitai, i totonu o faamaumauga o le tupe mo le tausaga tupe 2025, e le o iai le $36 miliona lea i le vaega o lo’o ta’ua ai tupe totoe, mai tausaga tupe o le 2024, 2023 po o le 2022.)