Pago Pago - AMERIKA SAMOA

O le taeao o le aso 21 o Aperila, 2025, na fa’afeso’ota’i ai e se tamaitai faipisinisi ia le Ofisa a Leoleo i Tafuna, ona o lana ta’avale ua gaoia.

E tusa ai ma fa’amaumauga a le fa’amasinoga, na fa’amatala e le tamaitai e ana le ta’avale, na gaoia lana taavale, a’o paka i luma o se faleoloa.  Ma na fa’ato’a sau mai i le taulaga, na alu e fa’amae’a pepa mo le koneteina o lona faleoloa, ma i lona toe fo’i mai, sa ia afe ai i luma o se faleoloa.  

Na oso i fafo le tamaitai mai lana ta’avale ma alu i toton o le faleoloa, ae o lo’o ola lava lana ta’avale.  Ae sa ia lokaina uma faitoto’a o le ta’avale.

Ma ina ua ia toe fo’i mai i fafo, na ia le va’ai ai i lana ta’avale.  O iina na ia vala’au ai loa i le ofisa a leoleo.

Sa faapea loa ona faasalalauina e le ofisa a leoleo, i leoleo uma i luga o le alatele ia le numera o le laisene a le taavale ma foliga o le taavale, ina ia mafai ona o latou nofo uta ai pe a va’aia i luga o le alatele.

O le pe a a le 8:36 i lea lava taeao, sa maua ai e le tamaitai faipinisi se vala’au mai i lona to’alua, e uiga i le la ta’avale, o lo’o va’aia o agai atu i sasa’e i luma o le stadium.  Sa faapea ona fa’ao’oina atu e le tamaitai faipinisi ia lea faamatalaga i le ofisa a leoleo, ma faapea ona agai atu ai se ta’avale leoleo i lea eria e taofi le taavale.

Na fa’amanuiaina taumafaiga a leoleo, ma pueina ai loa le tamaitai o Tausisi’i Aiomalaga Vaimili ma le ta’avale a le tamaitai faipinisi, ma aveina atu ai e leoleo ia Tausisi’i i lo latou ofisa mo le fa’atalanoaina.

Ma i le fa’atalanoaga o Tausisi’i na ia ta’ua ai e faapea, sa ia mauaina le ta’avale i luga o le auala, o lo’o ola ma o lo’o matala le faitoto’a i le itu a le aveta’avale.  Ae ina ua fesiligia o ia e leoleo pe aisea na ia gaoia ai le taavale, sa musu le tamaitai e tali mai.  Ae na ia fa’amaonia lona aveina o le taavale ma lona mautinoa, e le o sana meatotino.

Sa faapea foi ona ta’ua e le na molia, ia lona mauaina o se ato i totonu o le taavale, na iai se vaegatupe tele.

Na faapea ona lokaina Tausisi’i ma molia i le moliaga o le ‘Tampering’, o se vaega ‘A’ i solitulafono mama, e mafai ona nofosala ai i le falepuipui, e o’o atu I le tasi tausaga, po o se sala tupe e $1,000; po o faasalaga uma e lua.