Pago Pago - AMERIKA SAMOA

E tusa ai ma fa’amaumauga a le faamasinoga, o le aoauli o le aso 2 o Mati, 2025, na vala’au atu ai e tamaitai i le Ofisa a Leoleo i Fagatogo ma ripotia le fa’amalosia o ia e ni alii se to’alua, ae pu’eina i se masini pu’e ata (video).

O se taimi mulimuli ane na ave faapagotaina ai e leoleo ia Salefo’i Tu’ua-Fiaalii ma se alii e suafa ia Verrzanogiovanni Va’atofu po o Vani, ae e na’o Tuua-Fiaalii na molia i le tulafono.

O ona moliaga na aofia ai le faia o amioga fa’a Sotoma, o se vaega ‘B’ i solitulafono mamafa, lea e mafai ona nofosala ai i le falepuipui, e o’o atu i tausaga e sefululima.

Ma le moliaga o le Fa’amalosi Teine, o se avega ‘B’ i solitulafono mamafa, e mafai ona nofosala ai i le falepuipui, e o’o atu i tausaga e sefululima.

E leai se vaegatupe na fa’atulagaina e mafai ona tatalaina ai le na molia, mai i le falepuipui, e fa’atalitali ai lona faamasinoga.

E tusa ai ma le faamatalaga a le tamaitai na a’afia i leoleo, ina ua matapogia o ia mai i lona fa’asuaava, sa faapea ona ave’esea e Vani ma Tu’ua-Fiaalii ia ona la’ei ma o lo’o maua fa’amaoniga o ana faamatalaga i ata sa pu’eina e nei alii, i a la telefoni.

E taunu’u atu leoleo i le nofoaga na tupu ai le fa’alavelave, o lo’o ‘e’e se tamaitai, agai i le fale o lona tuaoi, lea na tu tu mai ai ni alii se to’alua.

Sa fa’ailoa ifo e le tamaitai i leoleo, o ia lea na tupu ai le fa’alavelave ma ia tu’uina atu i leoleo ia le telefoni a Vani, lea na pu’eina le taimi sa fa’amalosia ai o ia e Tuua Fiaalii, ae o le taimi lena ua na le iloa se mea ona o lona fa’asuaava.

Ina ua su’esu’eina e leoleo ia le telefoni a Vani, sa maua ai le ata o Tu’ua-Fiaali’i, o lo’o fa’amalosia le tamaitai na a’afia ae o le taimi lea, ua le iloa e le tamaitai se mea ona o le fa’asuaava.

Sa fa’apea ona ave fa’apagotaina e leoleo ia Vani ma Tuua-Fiaalii ma na lagonaina e leoleo le malosi o le manogi pia o le alii o Tuua-Fiaalii.

I le fa’amatalaga a le tamaitai na a’afia, na moe o ia i le 11:00 o lea taeao ina ua mae’a se latou taumafataga ma nisi o tagata e latou te nonofo faatasi.  Ae ina ua te’i ane i luga, sa ia va’aia Vani o lo’o pu’eina se ata vitio o ia, a’o fealua’i Tu’ua-Fiaalii i totonu o le fale.

Sa ta’ua e le tamaitai na a’afia, na moe o ia o lo’o la’ei ona ofu faigaluega ae ala mai i luga, ua na’o lona ofutino ae ua leai sona ofuvae.  E le gata i lea, na moe o ia i totonu o le umukuka, ae ala ifo i luga, ua moe i le fale a Vani, ae na te le manatua pe na fa’afefea ona o’o i le fale a Vani.

Na ia faamatalaina foi lona tu i luga ma u’u mai lona ofuvae ma savali i lona potu moe.  Ma ia valaau atu ia Vani e ave atu lana telefoni lea na ia mauaina ai ata vitio o ia, ae o lo’o taoto i ona luga ia Tuua-Fiaalii.

O iina na ia vala’au ai loa i le 911 mo se fesoasoani.

Ina ua fa’atalanoaina e leoleo ia Vani, na ia faamatalaina se latou inuga pia sa faia, ae ina ua la pasi atu i le umukuka ma Tuua-Fiaalii, na o la va’aia ai le tamaitai na a’afia, o lo’o moe mai luga o le foloa.  

Sa amata loa ona ia pu’eina le ata o Tuua-Fiaalii a’o ia ave’eseina la’ei o le tamaitai na a’afia, ma amata ona fa’amalosia o ia.  Ina ua mae’a, sa toe si’i e Tuua-Fialii ia le tamaitai na a’afia, i totonu o leisi potu ma fa’aauau ona ia faia amioga mataga i le tamaitai na a’afia, ae o le taimi lena, o lo’o moe lava le tamaitai na a’afia.

Na ta’ua foi e Vani lona fa’aauau pea ona pu’eina ata vitio o le tamaitai na a’afia, a’o moe.  Ina ua te’i ifo i luga le tamaitai na a’afia ma maua o ia (Vani) o lo’o pu’eata, lea na fa’atonuina ai o ia e le tamaitai na a’afia, e tu’u atu lana telefoni ma i’u ai ina valaau e le tamaitai na a’afia ia leoleo.

Ina ua mae’a ona fa’atalanoaina e leoleo ia Vani, sa faapea ona soso’o ai m Tu’ua-Fiaali’i.  Na fesiligia muamua o ia e leoleo po o iai ni ana ata vitio o le fa’alavelave na tupu.  Sa tali Tuua-Fiaalii, ioe ma ia tu’uina atu i leoleo lana telefoni.

Ina ua matamata ai leoleo sa molimauina ai le taimi o faiaiga ai Tuua-Fiaalii ma le tamaitai na a’afia.  E le’i umi ona su’esu’eina e leoleo ia Tuua-Fiaalii, ae musu le alii e toe tali ni fesili.

Na lokaina uma ia Vani ma Tuua-Fiaalii i le to’ese e faatalitali ai o la iloiloga i luma o le Fa’amasinoga Fa’aleitumalo.