Pago Pago, AMERIKA SAMOA

O lo o faaauau pea feutanaiga a le Task Force ma sui o vaega eseese a le setete o Hawaii mo le faia o gaioiga uma ina ia mafai ai ona toe faafo’i mai le mamalu o le atunu’u o lo o poloka i Hawaii ma isi vaega o le malo tele o Amerika.

O le iloiloga lea na faataunuu i le vaiaso nei i luma o le Komiti o le Soifua Maloloina a le Maota o Sui, na molimau ai nisi o sui o le Task Force a le malo o loo galulue mo le faia o gaioiga e puipuia ai le atunu’u mai le gasegase o le coronavirus. 

O sui o le Task Force a le Kovana na molimau e aofia ai le Loia Sili ia Mitzie Jessop Taase; Faumuina J. Faumuina; Sandra King-Young; Dr John Tufa ma Dr. Saipale Fuimaono. O le iloiloga na ta’ita’ia lea e le afioga i le alii faipule ia Vesi Talalelei Fautanu Jr o le Taitai o le Komiti o le Soifua Maloloina a le maota o sui.

O lenei iloiloga na valaauina ina ua teena e le Task Force le talosaga a le Komiti a le maota o sui mo se isi va’alele a auina atu ai i fafo gasegase mo togafitiga, ae maua ai fo’i ma le avanoa e la’u mai ai le to’atele o tagata o le atunu’u o loo poloka i fafo.

Na faailoa e Vesi i le taimi o le iloiloga e faapea, e le tete’e le Komiti a le Maota o Sui i le fuafuaga a le Kovana e puipuia le atunuu mai le ono aafia i le siama o le faama’i oti, peita’i, e tatau fo’i ona galulue taitai o le malo e saili auala e mafai ai ona toe faafo’i mai le toatele o tagata o loo taofia i fafo.

Sa ia malamalama fo’i le Komiti, pe ua tapena le Task Force i so o se taimi e tula’i mai ai se fa’alavelave i Amerika Samoa.

Saunoa le sui o le Task Force ia Faumuina, o ia fo’i o le Pulesili o le Falema’i o le LBJ i Faga’alu e fa’apea, ua matua lava sauni le Falema’i e tali atu i soo se taimi e tula’i mai ai se fa’alavelave. Sa ia faamanino e faapea, o le Matagaluega o le Soifua Maloloina, o le latou tiute o le faalauiloa o auala mo puipuiga o tagata mai le fa’ama’i, ae o le  Falema’i, o le latou tiute o le faia lea o togafitiga pe afai ua aafia se tasi.

Ua lava ma totoe potu ma moega e taofia ai i latou e aafia i le fa’ama’i, pe afai ae oo mai le siama i Amerika Samoa, o le saunoaga lea a Faumuina. E oo foi i le Fale maliu, e 2 containers faaopoopo ua mae’a ona sauni mo le taliina o manaoga, pe afai e aafia le atunuu i le faama’i ma toatele nisi e maliliu ai. 

Ina ua fesiligia le Pule o le Ofisa o le Medicaid ia Sandra pe i ai se isi vaega tupe e mafai ona toe faatupe ai se isi malaga lona lua a le vaalele mo gasegase e auina atu i fafo mo togafitiga, na saunoa Sandra, e leai, ua le toe i ai se tupe mai le lotoifale e faafetaui ai tupe feterale pe a fa’aaoga.

Saunoa le ali’i foma’i ia Dr. Tufa e faapea, ele o i ai se fuafuaga mautu i le taimi nei e faatulaga se malaga lona lua a le va’alele e auina atu ai gasegase i fafo mo togafitiga ma auami ai le mamalu o le atunu’ o loo poloka i fafo. Sa ia faamanino taumafaiga ma talanoaga o loo faia i le taimi nei ma sui i Hawaii ina ia mautinoa e le aafia Amerika Samoa i le siama o le gasegase pe afai ae toe auina mai tagatanu’u o lo o taofia i fafo.

O le faafitauli e pei ona tula’i mai i le taimi nei, o le faatupulaia lea o tagata i Hawaii ua aafia i le faama’i, o le to’atele o i latou nei e aofia ai ma tagatanu’u mai atumotu o le Pasefika. Saunoa Dr. Tufa e faapea, o lo o faia feutanaiga ma nisi o teritori e pei o Palau ma CNMI i auala e toe faafo’i mai ai o tatou tagatanu’u .

E mafua ia talanoaga e pei ona saunoa Dr. Tufa, o teritori ua e 2 ua amata ona toe faafo’i a latou tagata. 

Pau le faafitauli e pei ona faailoa e le ali’i foma’i, e i le va o le to’a 6 i le to’a 7 tagatanu’u o teritori ia o lo o mafai ona auina atu i vaalele ua mae’a ona faatulaga e le malo, peita’i o Amerika Samoa, e i le va o le 60 i le 100 tagata o lo o fuafua e aumai i le malaga e tasi.

O le lu’itau tele o loo fetaia’i ma le Task Force i le taimi nei e pei ona saunoa Dr. Tufa, o le auala e faia ai tui mo i latou o le a malaga mai i le va’alele. O le faafitauli o lo o i ai, e i ai kamupani i Hawaii e mafai ona latou faia tui ma siaki mo tagata malaga, peita’i e faatapula’a i le 20 le aofa’i o tagata e mafai ona siaki i le taimi e tasi. O le faafitauli la lena mo taumafaiga a le Task Force e aumai le tusa ma le to’a 100 tagata i le malaga e tasi.

“O popolega pito sili ona faaeteeete i ai le Task Force, o le tulaga lea i le ono aafia o se tagata e malaga mai i le va’alele i le siama, ma faigofie ai loa ona pipisi atu ma aafia ai loa le atunu’u toa,” o le saunoaga lea a Dr. Tufa.

Ssaunoa le afioga i le alii faipule ia Gafatasi Afalava e faapea, ua silia i le 7 masina talu ona tapunia malaga a va’alele, ma ua to’atele naua tagata o le atunu’u o loo poloka i fafo ua viga i le fia malaga mai. 

“Afai tatou te vaavaai i isi malo, ua tele ina toe fa’afo’i uma a latou tagata i latou atunu’u, sei vagana ai lava lo tatou atunuu o loo poloka pea o tatou tagata i fafo e le i aumaia, ae o i latou nei o Tama ma Tina, o matua o fanau o loo faamuli atu iinei. O nisi fo’i o i latou nei a malaga i talavai, pe asiasi fo’i i fanau ma aoaoga a o lea ua poloka ai i fafo,” o le saunoaga lea a Gafatasi.

Na fautuaina e Gafatasi le Task Force ina ia ave sa latou fautuag ai le Kovana e fuafua se vaalele e aumai ai le atunuu o loo poloka i fafo. Afai fo’i e auina mai i latou, ia mautinoa e uia auala uma mo le puipuiga o le atunu’u ma ia mautinoa ua saogalemu i latou uma mai le faama’i a o le i oso le tagata i luga o le va’alele.

Na faamanino e Vesi i le Tasi Force e faapea, o lea o loo talanoa taitai o le malo ma le atunu’u e faatatau i lenei mataupu, e aunoa ma se suesuega ua faia pe toa fia sa’o lava le aofa’i o tagata o loo poloka i fafo, ae le iloa fo’i pe fia le aofa’i o tupe ua fa’aalu mo le tausiaina o i latou a o taofia ai i fafo.

Na taua e Vesi le to’atele o aiga o i latou nei ua valaau atu i lona Ofisa ma talosaga atu mo se fesoasoani.

“Ua taunu’u mai i le Fono Faitulafono le tagialao a i latou nei mo se avanoa e fo’i mai ai, ae paga lea, matou te faalagolago atu fo’i i la outou fautuaga,” o le saunoaga lea a Vesi.

Sa ia taua e faapea, e le o iloa pe fia se tupe ua fa’aalu e le tagata e to’atasi e tausi ai lona aumau i fafo. O nisi e i ai aiga ae o isi e leai ni aiga, lona uiga ua faamoemoe mai i fanau ma aiga i Amerika Samoa nei mo tupe e tausi ai le aumau i fafo. Sa ia taua fo’i e faapea, e le i fesiligia e le Komiti le Ofisa o Auaunaga ma Tautua Lautele pe i ai ni fanau ua taofia i lalo o le latou vaaiga ona ua leai ni matua.

Afai o lo o naunau le malo e faamalosia tulafono, e tatau fo’i la ona usitaia i soo se vaega fai i totonu o le atunu’u, ae le o le naunau e taofia vaalele taofia taaloga Bingo, ae fa’aauau pea le tumu tumu o tagata i faatosina o faiga palota e pei ona faagasolo i le taimi nei.

“O la outou tiute, ia outou fautua i le Kovana ma talosaga i ai mo se isi vaalele e auina mai ai o tatou tagata o lo o taofia i fafo,” o le saunoaga lea a Vesi.