Pago Pago, AMERIKA SAMOA

E le o mapu pea lava le Faamasinoga i le tau sailia lea o le Leoleo o le Toese na ia taofia sui e toalua mai le Ofisa Faanofovaavaaia na aga’i atu e faia se suega faasaga i le alii pagota ia Sierra Isaia o lo o tuli sona faasalaga faa falepuipui i le Toese i Tafuna i le taimi nei.

O le iloiloga lona tolu o le mataupu faasaga ia Isaia lea ua toe tolopo i le aso 7 o Aokuso, 2020, ma ua faamoemoe e molimau ai le alii sa galue o se Leoleo i le Toese i Tafuna e suafa ia Mila. 

E tusa ai o faamatalaga ua maua e le Faamasinoga Maualuga i le vaiaso na te’a nei, e le o toe galue Mila o se Leoleo mo le Toese i Tafuna, ona na faamavae o ia mai lana galuega i ni nai masina e le i mamao atu.

O lenei mataupu na toai i luma o le Faamasinoga Maualuga i le masina o Me na te’a nei, ina ua faila e sui o le Ofisa Faanofovaavaaia sa latou ripoti i luma o le Faamasinoga e faatatau i se faalavelave na tulai mai i le taeao o le aso 4 o Mati, 2020, lea na o atu ai sui e toalua o le Ofisa Faanofovaavaaia e faia suega a nisi o pagota poo latou faaaogaina fualaau faasaina.

E toa 8 pagota na faatulaga e faia i ai le suega i lea aso e aofia ai ma le alii pagota ia Isaia. Ae pei ona taua e sui a le Ofisa Faanofovaavaaia i le la ripoti e faapea, e na o Isaia lava e le i mafai ona faia i ai le suega i le aso lea, ona sa i ai se alii pagota na faalavelave i le galuega sa faatinoina. E le gata foi i lea, sa i ai le Leoleo o le Toese na musu e faataga alii Ofisa e toalua mai le Nofovaavaaia e asia le sela sa taofia ai Isaia.

O le maea ai ona faafofoga o le Faamasinoga i le molimau a le sui o le Ofisa Faanofovaavaaia i se iloiloga sa faatulaga ia Me o le tausaga nei, na faatulaga ai loa le iloiloga lona lua o lenei mataupu i le vaiaso na te’a nei, lea na valaau ai e le malo molimau e to’alua.

O ia molimau e aofia ai se tasi o Leoleo o le Toese, le susuga ia Li’a Milo ma le alii pagota ia Gabriel Tinai.

O le itu sa fia manino i ai le Faamasinoga, poo le susuga a Milo lea o loo taua na ia taofia sui e toalua o le Ofisa Faanofovaavaaia e aua nei ulufale atu i totonu o le sela o loo loka ai Isaia. 

Na taua e le alii Leoleo ia Milo i lana molimau e faapea, o ia sa tiute i ma se tasi o Leoleo i le vaega a le Bravo Unit i le taeao e pei ona fesiligia. Ae na faateia o ia ina ua ualesi atu le Leoleo Satini o loo taitai i le latou Sifi, e alu atu e momoli sui e toalua o le Ofisa Nofovaavaaia i luga o le Alpha Max mo le faatinoina o le la galuega.

Na manino i le molimau a le alii Leoleo ia Milo, o ia na momolia sui e toalua a le Ofisa Nofovaavaaia i luma o le Ofisa a le Alpha Max, ae ese isi Leoleo na la momolia sui e toalua o le Nofovaavaaia mole faaauauina o le la galuega.

E ui i le tele o fesili a le Loia a le malo ia Laura Garvey i le molimau i le mea na tupu i le taimi na alu atu ai e momoli sui o le Ofisa Nofovaavaaia i le Alpha Max, ae na tasi lava le tali a le alii Leoleo, o ia na gata mai lava i luma o le Ofisa i totonu o le Alpha Max, ae ese Leoleo na faaauauina le asiasiga a sui o le Nofovaavaaia.

Ina ua fesiligia ia Milo poo ai Leoleo e to’alua ia na faaauaua le galuega na ia amataina, ae na tali le molimau, ua galo ia te ia, ona ua silia ma le 4 masina talu ona maea le taimi na tulai mai ai lenei mataupu. E le gata i lea, ua silia foi i le 4 masina o poloka i Samoa i le maliu a lona Tama, ma ua galo foi ia te ia mea sa tutupu i le aso na tulai mai ai lenei mataupu.

O se tasi o vaega sa taua i le ripoti a sui e toalua o le Ofisa Nofovaavaaia, e i ai le pagota na nofo ma poloka le faitoto’a la te ulufale atu ai i le vaega e agai atu i le sela a Isaia. Ana leai le pagota lea na ia polokaina le la auala, atonu lava e mafai ona faatino le galuega e faia ai le suega ia Isaia.

Na fesili le loia a le malo ia Garvey i le molimau, pe faataga ni pagota ona i ai i le vaega tonu o loo i ai le faitoto’a i soo se taimi lava o le aso. Na tali le molimau, e leai, e le tatau ona i ai ni pagota e faalavelave i le faitoto’a e ulufale atu ai i le sela a Isaia. Na taua atili foi e le molimau e faapea, e le tatau ona uu e se pagota le ki e tatala ai le faitoto’a, sei vagana le Leoleo e tatau ona i ai le ki o le faitoto’a.

O le molimau lona lua na valaau e le malo, o le alii pagota ia Tinai, 32 tausaga le matua. 

Na fesili e le loia a le malo le molimau pe aisea na ia polokaina ai le faitoto’a e ulufale atu ai i le sela a Isaia i le aso na o atu ai sui e to’alua a le Ofisa Nofovaavaaia. Na tali le molimau, na te lei polokaina le faitoto’a e ulufale atu ai i le sela a Isaia i le aso lea, ae o le faafitauli na tulai mai, sa loka le faitoto’a, ae na fiu foi e tauanau le Leoleo e avatu le ki e tatala ai le faitoto’a ae sa musu le Leoleo.

Na fesili le Faamasino Sili ia Michael Kruse i le molimau, poo ai le igoa o le Leoleo na musu e avatu le ki e tatala ai le faitoto’a, ae na tali le molimau, “O le Leoleo e igoa ia Mila, ua fai si umi talu ona faamavae mai lana galuega i le Toese i Tafuna.

Na faamanino e Tinai i lana molimau e faapea, e lua nofoaga eseese i totonu o le Fale lea o loo loka ai i latou. O le Alpha Max, lea e loka ai laua ma Isaia, ma le Alpha B, le nofoaga lea o loo loka ai isi pagota.

I le aso e pei ona taua, sa matala le faitoto’a e ulufale atu ai i le Alpha B,o le mafua’aga foi lea o le feofeoa’i solo pagota i totonu o le fale i le taimi na asiasi atu ai sui o le Nofovaavaaia, ae sa loka le faitoto’a o le Alpha Max, o le mafua’aga foi lena na le mafai ai ona ulufale sui a le Nofovaavaaia e faataunuu le suega a Isaia.

O le maea ai ona faafofoga o le Faamasinoga i faamatalaga a molimau e toalua, na faia ai loa le faaiuga ina ia faatulaga le isi iloiloga, ae tuuina atu se poloaiga i le alii Leoleo ia Mila ina ia oo atu e molimau i lea iloiloga.

E 80 masina lea o lo o tuli e Isaia i le Toese i Tafuna, tusa lea e 6 tausaga, ina ua ta’usala o ia i moliaga mamafa e 2 o lona umia faasolitulafono lea o vaega o fualaau fa’asaina o le aisa.

O le moliaga muamua na tula’i mai i le aso 26 o Aokuso 2017 ina ua maua e Leoleo fualaau faasaina ia Isaia ina ua taofia lana ta’avale. Na tatala Isaia i tua e faatali ai le faaiuga o lana mataupu. 

Lima masina mulimuli ane ai, na toe loka ai fo’i e Leoleo ia Isaia ina ua taofia lana ta’avale i le aso 11 o Tesema 2017 ae maua ai fo’i fualaau faasaina.

E 20 masina lea ua faasala ai Isaia mo le mataupu muamua na tula’i mai ia Aokuso, ae 5 tausaga lea ua faasala ai o ia i le mataupu na tulai mai i le masina o Tesema, ona maua ai lea o le faasalaga atoa e 80 masina poo le 6 tausaga.

Na poloaina e le Faamasinoga ia Isaia ina ia faia se suega i lona tino i soo se taimi e faatonu ai o ia e le Ofisa Nofovaavaaia poo se Leoleo a le malo.