"Afai tatou te ola, tatou te ola mo le Ali'i, afai tatou te oti, tatou te oti mo le Ali'i. O lenei pe oti pe ola i tatou, o tagata o le Ali'i lava i tatou!" Roma 12:11.

O le mau lea na si'i mai e le fanau tama a'oga i Fagaitua, e molimauina ai le latou mafutaga ma le atali'i o Melaiga L. Kome o le afio'aga o Tula, lea na alu atu e fa'asao mai ona uso laiti sa ta'a'e'ele i le sami ua tau malemo, ae leiloa atu ai o ia e o'o mai i le aso.

O le sauniga mamalu sa faia i le Laumua i Fagaitua High, ina ia taualoa ai se tasi o fanau a'oga, ua misia mai le mafutaga ma ua fa'ia ese mai le fuifui. Na matua maligi loimata, talie ma toe fa'amanatu uma e le fanau a'oga le taimi a'o mafuta, taimi lelei ma taimi fo'i ua le taugalemu i le mafutaga, ae o mea ia sa faigata ai ona fa'agalo, ma ua gausia loto ma tutulu ai loimata o le fa'anoanoa o le mafutaga pele ma mamae, ua le toe i ai.

O lea sauniga sa fa'atautaia lava i le Faletaalo o le A'oga Maualuga i Fagaitua, ma sa i ai uma le fanau a'oga i o latou nofoaga e tusa o latou vasega, le itu fo'i o Faia'oga ae maise tautua lautele ma le pulega ma le aufaipese siufofoga malie a le A'oga Maualuga sa latou usuina vi'iga o le sauniga.

O le susuga le Faife'au sa ia tatalo e amatalia le sauniga  Rev. Feagaiga Misi a'o le fofoga lava o le polokalama fa'asolo o le susuga lea i le Pule A'oga Suaese P. Ta'ase.

O le ulua'i molimau lava o le tama'ita'i faia'oga sa avea ma Faufautua i le vasega talu ona amata a'oga Meilagi mai le vasega iva se'ia mae'a i lenei tausaga. O ia lea o Mrs Lulu Hunter Pulu, ma sa iloga ona fa'aalia e lenei tina le faigata ona galo ia te ia o Melaiga ona o se tasi na matua iloga ona aumai so'o ia te ia i le fa'alogogata.

"E ese tele uiga fa'aalia o lenei tama ia te a'u, a sau ia te a'u e ataata, ae o lo'o tuli mai e vala'au ona matua se'i fa'atulaga se mea e fai i ai leaga o lo'o pisa, pe faalogogata i le faia'oga. A fai atu i ai, Aisea ea ali'i Melaiga e te fa'alogogata ai, e na'o le ata mai lava ae matua leai lava se tali. O lea ua alu fa'apea, ae ua faigata ai ona galo ia te a'u lava ia, lea ituaiga o tamaititi. E le o se tasi e te va'aia ai se loto fa'ali'i, e leai e malu lava ana aga, ae le mailoa fo'i le mea e fagata ai i le potu a'oga."

O nisi o tamaita'i aoga sa iloga ona tele taimi o Melaiga e latou te mafuta ai ae sa a'o'oga fa'atasi fo'i mai Matatula, sa ia fa'aalia fo'i uiga fai tuafafine tele o lenei ali'i ia te ia ma nai ona tei. "O le faigata ona galo o Melagi ma ona uiga, ona o se tasi e puipuimalu ia i matou o teine. E fa'amoemoeina lava e a'u Melagi i le matou autalavou, i matou mea e fa'atino mo le Ekalesia aua e lelei tele lana tusi ata, o le aufaipese, o le matou nu'u fo'i i fa'alavelave e fai a aiga, ua fa'apena fo'i ma le olaga i le a'oga iinei i Fagaitua. Ou te fa'amoemoe ia te ie e momolia lava a'u i le fale ona o a'u o le teine mai Tula i Alao lea ou te nofo ai. O lea la ua sola faapenei, ae ua ou misia ai lona fai tuafafine tele ia te a'u, ou te alofa tele ia te oe Melaiga, fa'afetai mo mea uma sa e faia mo a'u."

I ana uo tama sa i ai, e i ai mea sa pi'opa i le mafuta ma Melaiga, ae le'i fa'apea na fa'aletonu fo'i le tali a Melaiga i lana uo lea. O le tausaga a'oga lenei, lea sa la'ua fetaui ai, ae le o se mea tele, ma ua i ai le maka lava e tasi i le faila o Melaiga, ua toe uliuli ai lana amio i lenei tausaga a'oga. O se suiga tele lea i le lipoti o Melaiga talu ona a'oga mai.

Na tula'i ma fai lana molimau, e ui i se na mea e tasi, ae le avea ai lona alofa ia Melaiga, o le aso na logotala ai ua leai se tasi, ua toe fo'i mai lea fa'aletonu e fasioti i ona lagona, ma ua ia mana'o lava se'i toe maua mai o ia, se'i toe fa'ailoa atu, e moni lava lona alofa fa'aleuo ia te ia.

I le molimau a le Au Kuka, sa tula'i ai le ta'ita'i ma ia molimau i le amio lelei na'ua o Melaiga i le fale'ai pe a alu atu e tausami.

"E savali lelei i le laina, e na'o ona foliga ataata e va'aia i taimi uma, e le misia lava sa aiga e tasi, ae matua eseese nei uiga e fa'aalia e ia i le fale'ai ma le potu a'oga e pei o le molimau a le Faufautua o lana vasega. Masalo ona o le faiaso i le tama'ita'i faia'oga, a'o a'u e fefe ai o ia aua na a'oga mai fo'i i Matatula, a'o ou kuka ai."

Peita'i na faliu o ia mo se latou fa'aaloalo mo le tina o Melaiga, aua o lea tina e faigaluega fa'atasi i latou i le Polokalama o Mea'ai a le fanau a'oga. O lea la e galue le tina i Aua Elementary, ae a lave se tama'ilima e lagona e le tino atoa, e tatau ona matou faatino le alofa lea. O le latou teutusi ma le pale matagofie sa molita'i atu i matua o Melaiga Kome.

I se tasi fo'i o faia'oga mai le afioaga o Masefau, o se tasi e i ai lana vasega e ave Melaiga, sa ia molimau i le lotonu'u ma uiga tausa'afia o Melaiga i lona potu a'oga. "O ma'ua e fetaui lava i le faiga o tala ma 'au Kirikiti, e sau fo'i ia i lana 'au o le Fetulele, ae ou finau atu fo'i leaga o le Mosiula lea e sau mai Masefau. Faigata fo'i leaga o lo'o i ai le Pule Aoga i le Laumua nei, o lo'o sau ma le Seaula. O uiga nei e le fa'agalo gofie, ae o le mea sili o lo tatou fiafia e molimauina le Melaiga sa tatou mafuta i aso e tele. Tofa Melaiga, e le galo oe i ou uiga tausa'afia. Peita'i sa ou tusia sa'u pese, aua e lelei le leo, e usu i le taimi nei, tau ina ia lauga le pese mo i tatou uma e fa'amau ai uiga o Meilaga ia i tatou.”

"Ua malele le Manulagi, Ae fao le manu aluga, Tatou te le fai loto i le fingalo o le Atua, Fa'i le pula fa'i fo'i le moto, I lana pule fai to'atasi." Peau e, o le sami se'i sali mai Melaiga po'o fea o i ai, Fa'afoi mai o ia i o'u lima,  Ua mavaevae ai papa, I lau pele ua malaga, ia tafe toto ou ala!"

To'atasi lava se tasi ali'i talavou, sa tula'i ma molimau ma ia ta'utino, "O a'u ma Melagi e le tele ni taimi sa mafuta ai, pe fa'auouo ai e leai, e iloa atu lava o ia i le isi itu o le vasega, e iloa fo'i o le tama mai Tula, ae tele ina le feso'ota'i tele. Peita'i, ina ua va'ai i le facebook ma iloa ai o ia lea ua sola fa'asulusulu fa'apenei, na faigata o'u lagona ma e ta'u atu ma le fa'amaoni, na ou fa'ato'a to'otuli lea ma fai atu sa'u tatalo i le Atua, e alofa mai, toe aumai a'o le tino fo'i ia maua, se'i toe va'ai tasi i ai, ma fai atu i ai sina tala, e fa'ailoa atu ai lo'u alofa fa'auso ia te ia. O la'u tala moni lava fo'i lenei, ou te le manatua se aso na ou tatalo ai i le Atua, ae o lea ua ou tatalo mo matua o se tasi sa ou le so'otau'au i ai a'o ola, aua ua ou lagona le faigata o lo ua o'o nei i le latou aiga!"

O le pese fo'i na sami ai ia molimau e matagofie ona lagona, e fa'aosofia ai fa'amafanafanaga i le agaga o e ua fa'anoanoa.

Sa auai matua o Melaiga i lenei sauniga mamalu, fa'apea fo'i le Faipule Pan ma se ali'i e to'atasi sa ia fatusina se pese matagofie ma usuina ua salalau nei i le Facebook, ae a'oga o ia i Nuuuli VocTech, mo Melaiga L. Kome.