Pago Pago - AMERIKA SAMOA

O le sauniga mamalu o le tu’ua ai o le Malo e le afioga le Alo o Salamasina, Senatoa Satele Galu Satele o lo’o se’ei i le nofoa o le itumalo Tualatai, a le Maota Maualuga o le Fono Faitulafono, sa fa’atautaia lea e le Fono Faitulafono i le taeao ananafi i le Gov. Rex Lee Auditorium i Utulei.

Sa auai fa’atasi i ai le mamalu o Maota e Lua o le Fono Faiatulafono, i le afioga le Peresetene o le Senate Tuaolo E. Fruean ma le afioga le Fofoga Fetalai o le Maota o Sui, Savali Talavou Ale ma o la’ua faletua;  ae maise fo’i o le pa’ia maualuga o le faigamalo, le afioga le Kovana Sili Lemanu P.S Mauga ma le afioga le Sui Kovana Talauega Eleasalo V. Ale ma o la’ua faletua; le afioga le Faipule o Amerika Samoa i le Konekeresi Uifa’atali Aumua Amata fa’apea le mamalu o afioga i senetoa ma faipule. 

I le itu o le aiga o le afioga le Alo o Salamasani sa auai atu ona faleao, i pa’ia lasi o Aiga ae maise le afio’aga i Vailoa ma le pa’ia o le Itumalo, sa masi’i atu fo’i fofoga tofia o aiga, afio’aga ma le itumalo, o e sa fa’aaupito i ai le tautua a le afioga le Senatoa i lenei nofoaiga.

Na masi’i ane fo’i le vasega i matua fa’aleagaga o lana afioga i Ekalesia sa tautua ai o ia a’o soifua.

O le vaega o fa’aaloaloga fa’apitoa mo le afioga le Senatoa sa fa’atalitalia mai lona Sa i lona taunuu atu i le Maota mo le sauniga mamalu, sa fa’afeaoa lea e le Matagaluega o le Puipuiga o Saogalemu Lautele, ma sa latou tautuaina fo’i lona Sa e ulufale atu ai i le Fale Laumei. 

O le susuga le Fa’afeagaiga Taulagi a le Maota Maualuga Rev. Kleef Muao sa avea ma fofoga o le Polokalama fa’asolo o le sauniga. O ia sa ia tapena mo le sauniga atoa i le upu fa’amalosi mai le amataga, ma fa’asolo mai ai le sauniga i ona vaega patino.

O vi’iga o le Atua sa saunia fa’apitoa lea e le aufaigaluega siufofoga malu ma le malie a le fono Faitulafono.

O le ulua’i avanoa o lenei sauniga sa tuuina lea i le afioga le Kovana Sili mo lana saunoaga fa’apitoa o se molimau fo’i i le tautua tuavae a lenei tama o le atunuu. Sa ia fa’ailoa lana molimau i sana saunoaga sa fofogaina, “E ui ona o le taeao lenei o se taeao o le loimata maligi ma le faanoanoa, aua o se taeao o fa’amavaega ma se e pele i le to’atele o le pa’ia o aiga, itumalo ma le afio’aga, ae maise ai lava le fanau, ae o lo ua avea lenei taeao, ma se toe taimi e molita’i atu ai se molimau e tusa o le tama ua tu’ua le nofoa sa ia se’ei ai ma tautua lona aiga, lona itumalo ma lona afioaga. Ua tu’ua fo’i e ia lona nofoa i le mafutaga ma lana ekalesia ae maise i le li’o sili ona latalata ia te ia i lona aiga.”

“O se tama e saunoa sa’o i ona manatu e fa’aalia ai le mea moni. E le tele fo’i ni saunoaga e tulei i ai, ae ogaoga ona manatu pe a fa’aalia, aua e le alo fo’i ona manatu. E le o se tasi e finauvale, ae finau i le mea sa’o.”

“O ana tautua sa ia nanau e fa’atino, o le a fai lea ma ala o lana tautua e tumau pea ma i tatou. E le fia lalamua i ni mea e fai, ae iloga lana sapaia o mea lelei e ao ina fa’atino. O se tasi e fiafia i le agaga moni o le Fa’asamoa ma ana agaifanua, e naunau o ia i le gagana ma le ola Fa’asamoa o le talimalo lelei. E fiafia i le siomaga matagofie ma le mama.” 

Ina ua mae’a le saunoaga ma le molimau a le afioga le Kovana Sili sa tuuina loa le avanoa i le fofogaina mai o le Iugafono malilie fa’atasi a Maota e lua o le Fono Faitulafono e taualoa ai le soifua tautua o le afioga le Alo o Salamasina i lona aiga, afio’aga, itumalo ma lona malo.

O lea avanoa sa tuuina lea i le Failautusi o le Senate. O lona soifua mai i ona matua o le afioga Satele Teutusi Satele ma lona tina o Sooletala Satele ia Iulai 29, 1942. O ia lea o le uii o le fanau.

Na avea o ia ma tagata faigaluega a lona malo ina ua maea fa’au’u mai le Kolisi Tuufa’atasi a Amerika Samoa  ma galue ai i le Ofisa o Oloa a le tatou Malo. Soso’o lea ma le avea ma Pule Sili o le Ofisa o Tiute a le tatou Malo. O le tausaga 2017 na mua’i ulufale ai i le Fono Faitulafono e avea ma Senatoa o lona Itumalo, peita’i o lona toe nofoia nei o le Nofoa o le itumalo mo le nofoaiga lona 37 ai lenei ua le mae’a, ae ua amia o ia e malolo mai lona matai. 

I lana tautua i le Maota Maualuga sa avea ai o ia ma Sui Taitaifono i le Komiti o le Enetia, Uila ma le Suavai Taumafa. O lo’o ua lisia fo’i ma isi Komiti sa avea o ia ma sui totino i le Maota Maualuga.

I lana tautua i lana Ekalesia Fa’apotopotoga Kerisiano i Vailoatai ua mautu ai lona tofi Tiakono. Peita’i o le isi ana ekalesia o le Ekalesia a Iesu i Pago Pago, sa avea ai o ia ma Taitaipese mo le tele o tausaga.

E lua ekalesia sa tautua ai o ia i lona soifuaga, o le EFKAS i Vailoatai lea ua toe fo’i i ai o ia ina ua tusilima lona aiga Sa Satele e na te tauavea le suafa Satele mo le aiga.

I le taimi lea sa usuina lemu mai le vi’i o Vailoatai e le aufaipese a le Fono ae o lo’o vala’auina se sui o aiga e oo ane e taua’ao i ai le Iugafono Malilie Fa’atasi a le Fono Faitulafono.

O le afioga le Augafa’apae o le Aiga Sa Satele, le afioga Leilua Leutu Soliai sa tula’i e avea ma sui o aiga e talia lea iugafono mamalu.

O le molimau i le soifua galue o Satele sa tuuina lea ia Tuaolo ma ia saunoa fo’i e tusa o le lagia o le tele o malaefono o le atunuu, aua o le aso o le aso o Tupu.

“Ua lagina Malaetele, aua o Satele lea sa usu i le alo o Sotoa mai le Manu’atele, fa’ae’e le gafa o Satele Teutusi. O Satele lava fo’i lea sa usu i le afafine o Teleso lele ua fa’aeaea ai i le aso le Augafa’apae o Aiga, Leilua Leutu Soliai, lea sa tula’i mai e talia Iugafono mamalu a le fono faiatulafono, Ua lagia ai fo’i lena o Gagamoe.”

“E mafai fo’i ona fa’apea ua lagia Lupelele le mea e mautu i ai le Punefu o le Motu, aua ua maea silafia e le to’atele le usuga i le alo e fa’asino ia Tuana’itau lea e maua suli o Tapumanaia Galu ma nai ona tuafafine.”

“Afai la ae ou fa’apea o le aso o Tupu le aso, ua tatau ai, e le so’ona filia fo’i la le na, aua ua moni ai le upu i le fa’atafa o le gasegase o le ali’i na fai mai si ana fanau, ua na’o le fao fao lava. Ua le toe fa’atafa ua le toe mafai fuli, peita’i o nai toe momo’o o nai ona alo na fa’apea atu ai, “E se’i toe asu mai lava sina ipu vai se’i tali le galala.” Peita’i ua sau le avea’i, “E ua le toe sua le vai!”

“Le itumalo, afio’aga ma le fanau fa’apea le ekalesia, ioe ua le toe sua le vai, ua manava ana galuega. O sana malelega sa mafai ona tutumu ai vanu, ma soloia ai mauga maualuluga i mea e tutupu mai i totonu o le afio’aga ma le itumalo. Lea ua mae’a ma tuta lona Sa, e le toe malaga mamao e saili tofa ae ua fa’amatuu mea uma, e toe oso le la i le Itumalo filifili se tasi e fa’aauaua ou faiva i malo.”

“O le afioga le Matua Pulu Ae Ae Jr e masani tele ma fa’auo mamae ma lenei tama o le afioaga. O ia lea sa ou fai atu i ai, “O le fiafia ia o Satele Galu e teuteu la’au toto. E pei o sana taleni lea tulaga. Ua foliga mai o se taule’ale’a e fa’afogaina lauao o taulele’a. e o atu o felefele ma aulefu ae toe o mai ua mae’a fa’afuga ua aulelei ma manaia i le va’ai. O le isi mea sa matauina i le tama lenei, e fiafia i le siosiomaga matagofie ma le mama.”

“Ia i lau afioga Satele, avea lo’u leo fa’atauva’a e molita’i atu ai o sa matou fa’amavaega. Afai fo’i ae muamua atu Soliai poo Togiola, ia logo ane ia Alo ma le vaega lena ua mautu atu, o lo’o matou alolofa atu. E tatou o atu uma lava i lena ala ua e muamua atu i ai.”

“Ia manuia lau malaga!” -  upu fa’a’iu ia a Tuaolo. 

Na saunia le pese matagofie e le aufaipese “E! Ua maliliu Toa” ona soso’o lea ma le Lauga, o se upu fa’amalosi i le a’ai o fingalo ua ootia ona o le tama pele ua tu’ua le mafutaga. Sa saunia lava lea e Kleefi Muao.

O le autu o le lauga sa maua lea i le 1Tupu 9:26-28; O le tusi na fa’amauina ai le tapenaga a le Tupu o Solomona i ona va’a folau e la’u mai le anoanoa’i o le ma’ataua mo le fausaga o le malumalu o le Atua. O nisi va’a e fuafua ina ia avea ma va’a tau. Ae o le tele o va’a sa fausia lelei, ina ia folau atu ma la’u mai uma mea e fa’agaoioi ai le gauega o le Malumalu o le Atua.

“O le va’a lea o lo’o fa’atusalia lea i le Tama ua malolo nei. O ia sa fai ma se va’a e saunia mai galuega lelei uma mo le lelei o le nuu, sa le fa’avaivai pe fausia ina ia fa’aleagaina gofie nei va’a uma, ae ua iloga le anagata ma le malosi o le fausaga ina ia mautiinoa e alu ma toe fo’i mai ma uta e pei ona moomia ai.”

“O le a lava le fita o le vasa lea, e le fo’i ai le va’a e faimalaga lava. O le fesili pe a uma ona fau se vaa, O se va’a ea e aoga? Lea ua fa’amatalatala aoga o lenei tama i lona nuu, lona aiga ae maise o lona itumalo, fa’afetai i le Atua mo se meaalofa sili ona aoga sa fa’aaogaina ma maua ai manuia e lona nuu, itumalo ma aiga.”

Ina ua mae’a le sauniga mamalu sa mafuli loa le fono faitulafono i le latou aiga fiafia ma fa’aaloaloga sa latou tapena mo le toe mafutaga ma le afioga le Senatoa, le afioga le Alo o Salamasina, Satele Galu T. Satele.

E toe molita’i lava lona Sa e lagomau o ia i lona oliolisaga tumau i lona afio’aga ma aiga i Vailoatai.