Ads by Google Ads by Google

SAUNIGA TALOSIA AI TAOFIGA O LE ‘PULE I LE OLA’ - FA’ATAUTAIA DOH


[ata: foa'i]

Pago Pago, AMERIKA SAMOA

 

O le aso Sa na fa’atautaia ai e le Matagaluega o le Soifua Maloloina le sauniga e tulivaeina ai e le atunuu i le Atua, le fa’afitauli o le “Pule i le Soifua” lea ua to’atele i latou talavou ua maliliu ai. Na tofu vaega le vasega o Ekalesia tetele i le atunuu ma sao e fa’atino i lea sauniga e tolu itula o fa’atautaia.

 

Na ta’ita’ia le sauniga e le Peresetene o le Seminare mo Faife’au i Kanana Fou, Rev. Moerli J. Niuatoa i le EFKAS i Kanan Fou.

 

Sa amatalia le sauniga i le vala’au fa’apitoa e tapua’i fa’atauanau i le Atua mo se vaifofo i le fa’afitauli o le Pule i le Ola. 

 

O le afioga le Fofoga Fetalai o le Maota o Sui, Savali Talavou Ale, na fai ma sui o le Malo na te fa’apa’i malu mai i le mamalu ua aofia, ae a le fa’amoemoe o le Matagaluega o le Soifua Maloloina, ina ia saili se vaifofo o lea solitulafono.

 

O le fe’au fa’apitoa sa saunoa i ai le Faife’au Metotisi mai Nuuuli, Rev. Sailia’i Tuma’ai. O ia lea sa ia taumafai e fa’ailoa mai le eseesega o nei vaitau ma le taimi a’o talavou mai matua, ma ua faigata ai ona suia e matua le ala e fa’atonu ai le fanau talavou, ae ua avea lea ma mafuaga e manatu ai nisi o le fanau ua le alolofa matua, pe ua so’ona faia fa’apologa i latou.

 

“I lo matou vaitau, e te le talia se upu a matua e fa’atonu mai e vave le alu e fai le feau po’o le a le mamafa po’o le a le faigata. A tuai o le amo e fa’alava le papatua, a leai o le ‘ala e toso ai le no’o, ae o le fusipa’u pe a maua taitaia e le toe mamulu, o fa’alavalava o le taua, e leai ma se toe fa’apea ane o le tama po’o le tina, “E talofa e, si a’u tama! E leai e toe alu lava oe e tau fofo nai ou manu’anu’a pe a uma na fai fe’au. E le tau tuu maia se taimi e toe fa’alelei ai ni mea ua fa’aletonu, e su’e lava e oe le taimi e maua ai se to’omaga, ae le o matua e aumaia ia oe na mea.”

 

“Afai la o oe lea e na’o le nofonofo ma mea fa’alogo i taliga ma tata topetope ou tamailima i ki o lau telefoni po’o lau laptop po’o lau ipad ma isi mea uma fa’apena? E fa’apefea ona e fa’avasegaina le ituaiga olaga lena mo oe, pe afai e faia e ou matua ia te oe lena ituaiga fa’atonu ma a’oa’i?”

 

“O le vaitau lenei, ua pulea e le aia tatau. Ua fa’alogoina le leo o le faitio o fanau i matua pe a fa’atonu atu i le mea e ao ina fai. Ua feu taliga ua le toe fa’alogo. Ua moni ai lava le Tusi Pa’ia, ua fai taliga ae ua le lagona! Lea ua fa’alogo atu ua fai mai ua mamafatu mea i le mafaufau, ua tumu le ulu. Ao a ni mea o tumu ai le ulu o le talavou fa’ato’a tuputupu mai? Ua na’o mea e le aoga ua tumu ai.”

 

“O fa’aupuga sese ma mea e le taua ua avea ma au fa’amuamua. O le tali o na mea mamafa o le talanoa mai! E faigofie lava le tali o na mea e mamafa i lagona o le talavou, aua e le’i taitai lona iloa i le olaga, e na’o mea le aoga e fa’afaupu’e i loto ma agaga, ae o le talanoa mai e mama ai uma ma toe fa’afouina ai ou lagona.”

 

“O ala na sa a’oa’o ma a’oa’i ai i matou, afai ua oo atu ai se fa’atonu fa’apena i nisi o outou talavou, ona ua leai lava se isi ala ua manatu matua sa fa’atonu mai ai fo’i i latou a’o talavou e matou matua.”

 

 

“Peita’i i lenei vaitaimi ua taumafai ia tuumamaina le fa’atautaiga o mea uma, ua ese ala ua fa’ailoa mai e ao ina tima’ia ma fa’atonu ai fanau. Ua fa’atonu ina ia talanoa mai pe a i ai ni mea mamafa i o latou mafaufau, aua e tatau lava ona ola feso’ota’i outou ma matua. O a mea e mamafa i le mafaufau o outou le fanau, a outou fetufa’i ai ma outou matua, e sologa lelei mea uma, e maua ai e outou le ola fefa’asoa’i. Ua fautua mai fo’i le Tusi Pa’ia e ala ia Paulo, “ Le au uso e, ia outou fefa’amafanafana’i i le alofa.”

 

“Afai e te le o talitonu o le ola o le meaalofa sili ua tuuina mai e le Atua mo le tagata, ua tatau nei lava, oe o lo’o fa’alogo mai, ona e iloa lelei, e moni ma fa’amaoni lena tala. O ia na aumaia le ola, e le o sau ola, e te le pule fo’i i le ola. A e oti fo’i e alu lava le manava ola a le Atua ae tu’ua lou tino i le palapala, e toe fo’i i le palapala na fausia mai ai.”

 

“Outou o le lumana’i o le atunuu ma Aiga ae maise o Ekalesia, aua e te fa’amuta ou manuia mai le Atua lea e te aoga ai i lou aiga, nai ou matua ma le lautele o lau ekalesia, lou nu’u ma lou malo. O i tatou uma ta’ito’atasi ua tofusia ma le meaalofa taua mai le Atua, e fai ai sou sao i lou aiga, ma lou siomaga o le atunuu ma lau ekalesia.”

 

“Lea ua e momotu lea afaafa loloa o manuia, pe a faia lea solitulafono matuia i luma o lou Atua. Toe fetala’i lou mafaufau. E te le oti ai pe a musu se teine ia te oe ina ia avea ma au ava. Ua maua le isi avanoa e toe saili ai se isi tausala e sili atu. O fa’afitauli nei ua iloga mai na mafua ai ona una’ia nisi o talavou e fa’atino lea sese.”

 

O le Lauga na tapena i ai Rev. Niuatoa i lana autu o le Lauga, “Ou te ola A’u, o le mea lea e Ola ai fo’i Oe.”

 

“O le faamoemoe o le Atua e ona le Ola, ia e ola! O ana polokalama uma ua fa’atulaga mo oe le tagata ola, e faia mo oe a’o e ola, e te saili ai le toe ala i le ola e fa’avavau. E leai sau pule i le Ola ua e ola ai.”

 

“Ua sosopo lou fia pule i le Ola a le Atua, ona o lou fa’amaualuga? Ona o lou le iloa? Ona o lou manatu e tauta’ua ai lou alu, poo lou manatu ua pau lea o se mea e te filemu ai?”

 

“Ua le o lena le tali i se mea e tasi i lou ola i le olaga nei, ma lou ola taumafai ia ulu atu i le ola e fa’avavau. Ua sasi fa’asoloatoa lau fa’ai’uga i lena mataupu. Afai e te taumafai e talanoa ma se isi, lou faifeau pe afai ua faigata ona e talanoa i ou matua, e fotua’i mai malama, e suluia fo’i lou loto e le malamalama o le Atua ma suia ai ou lagona.”

 

“Afai o oe ua masani ma le amioleaga, e tele fo’i tiga e te uia nai lo le tagata o taumafai ia amio lelei. E ola fiafia lava le tagata amio lelei ma le faia e nisi o latou tala, ae o oe e te fia tama leaga ma e fai ma ta’i o mea sese, e tele tala a nisi e fai ia oe ma le inoino la lea ma le ta’uvalea ai aiga, ua atili ai ona fa’afaupu’e mea tiga i lou tagata, ma e manatu ai e te saili i le oti se mapusaga. Ae te le oti ai lava i ni tala, e le mamafa fo’i ia te oe ni fa’amatalaga pe afai e te masani lava oe ma le amiolelei.”

 

O le vasega o polokalama fa’atino eseese na tapena i ai Ekaslesia e lima na fa’asolo mo le vaega mulimuli o le sauniga. Na muamua ai tutula’i le ekalesia A Iesu Keriso o le Au Pa’ia o Aso e Gata Ai ma faia latou vi’iga e lua na tapena, ma sa matagofie lava i le fa’afofoga.

 

Na soso’o lea ma le Ekalesia Metotisi mai Nuuuli lea sa latou fa’atinoa polokalama e fa’ailoa mai ai aafiaga e tigaina ai ma o’otia loto o talavou pe a oo ina fa’asalalauina fa’alaua’itele e nisi o latou tala i luga o so’otaga tau initeneti ma tala fa’asalalau.

 

O le isi polokalama sa maimoaina o le a’afiaga e o’o i lagona o se tamaitai talavou pe a o’o ina ma’itaga a’o talavou le soifua po’o a’oga foi, ae le’i iloa e ona matua ma lona aiga. O le fa’atinoga lona tolu, le talavou ua otegia ona o le amio le pulea, ma ua avea ma faimasasa i ona matua, ona a’afia lea o ona lagona ona ua maasiasi i ana uo ma tagata lautele.

 

O le fa’atinoga a le Ekalesia Fa’apotopotoga Kerisiano i Samoa sa latou pepese ai ma fa’atino nisi o latou fa’aevagelia e fa’atatau i le pule i le soifua.

 

O le sao fo’i o le AOG na fa’atino lea i fa’atinoga e leai se leo ma ua iloga le matagofie fo’i ona fa’ailoa mai o nei a’afiaga ae fuafua lava e oe ni fa’aupuga e tusa o taga o lo’o faia e le fanau talavou.

 

O le fa’atinoga mulimuli na fa’atautaia lea e le EFKAS i Matuu ma Faganeanea. 

 

O le fa’afetai na fofogaina e le fa’atonu o le Matagaluega o le Soifua Maloloina Motusa Tuileama Nua. Sa ia fa’afetaia autalavou uma, ae maise o vasega i fa’afeagaiga sa latou auai ma tofu sao mo le sauniga mamalu, fa’apea fo’i le auvala’aulia fa’apitoa sa auai mo lea sauniga i lona atoaga.