Pago Pago - AMERIKA SAMOA

O se tala fiafia mo tama ma tina matutua i luga atu o le ta’i 60 tausasga, faapea i latou ua po le vaai ma iai mana’oga faapitoa o le tino.  

Ua maua mai nei se fa’amaoniga i le Matagaluega mo Auaunaga Lautele (DHSS) mai i le Matagaluega o Faatoaga ma Taumafa Maloloina a le malo tele (USDA FNS), ma ua taliaina ai se talosaga ina ia si’itia le limiti o tupe maua a se tagata ina ia agava’a mo penefiti a le ASNAP, mai i le $1,869 i le $2,306, e amata atu ia Oketopa 1, 2024.

O lenei siitaga, o le a mafai ona agava’a ai le to’atele o le mamalu o le atunu’u, e latou te mauaina penefiti o pepa taumafa po o nisi o auaunaga a le ASNAP.

Sa fa’alauiloa mai e le Faatonusili a le DHSS, le susuga ia Muavaefa’atasi John E. Suisala, o le a mafai loa ona tu’uina atu se fesoasoani mo tama ma tina matutua e silia ma le 60 tausaga, faapea i latou ua po le va’ai ma i latou e iai mana’oga faapitoa e $2,306 pe lalo ifo foi, a latou tupe maua, po o i latou e $4,250 a latou alagamanuia, pe lalo ifo foi.

O i latou ua agava’a mo nei auaunaga, e aofia ai i latou;

• Nesionale a le Iunaite Setete, Sitisene o le Iunaite Setete po o se tagata nofo mau (legal resident) a Amerika Samoa, o lo’o umia ID (AA, CA, BA, P2, P4, P5 po o le P6) ma se fa’amaoniga ua atoa le lima tausaga soso’o o aumau i totonu o le teritori, mo i latou e umia ID Amerika Samoa lea o lo’o fa’afou i tausaga ta’itasi.
• E tatau ona fa’ao’o atu kopi o pepa fanau, po o tusi folau, pepa ole Numera Saogalemu, ID mo tagata nofo mau (non-US Nationals and Citizens).  O se pepa mai i le falemai e fa’ailoa mai ai gasegase, ma le Ofisa o le Soifua Maloloina po o le Ofisa o le Saogalemu, mo i latou e i lalo ifo ma le 60 tausaga le matua.
• Pepa faamaumau o tulaga tau tupe – 2 kopi o ulu siaki (check stubs) lata mai, faamaoniga o penefiti mai i le Ofisa Saogalemu, Ofisa Litaea, po o penefiti militeri; faatasi ai ma kopi o tusi tupe, fa’amatalaga o tupe maua mo i latou e iai a latou lava pisinisi, ma fa’amaoniga o ni isi tupe maua.

O so’o se tasi e ausia agava’a e pei ona tu’uina atu i luga, o le a mafai ona pasia mo le mauaina o penefiti faalemasina, i le tausaga atoa.  O nei penefiti e $94, $109, $127, $147 po o le $177, e fuafua lava i luga o tupe maua.

A iai nisi fesili, e mafai ona valaau pe asiasi atu foi i le ofisa a le ASNAP, numera telefoni 633-7720 po o le 633-7451.