Ads by Google Ads by Google

Siitia tulaga Tusi Folau Samoa i faatulagaga o tusi folau a le lalolagi


Afioga i le Palemia o le malo o Samoa, Fiame Naomi Mataafa. [ata: Samoa Gov’t Facebook]

Pago Pago, AMERIKA SAMOA — O taua o le Tusi Folau Samoa ma lona laasia o isi aiaiga mana’omia, ua mafai ai nei ona e ulufale atu i isi atunuu faava o malo, feoai ma pepa o faamaonia, ma puipuia ai le saogalemu o lē ana le tusi folau i lalo o faiga paaga vavalalata faava o malo.

Ua iloa atili Samoa i le lalolagi, ina ua ofi atu nei le maualuga o le taua, amanaia ma le aoga o le Tusi Folau Samoa i faalagamaea o atunuu o le tau puleaga, e maualuluga o latou tamaoaiga.

I se ripoti faailoa faalauaitele a se tasi o faalapotopotoga tumaoti o le lalolagi e mata’ituina le aoga, amanaia, ma le maualuga o tulaga o Tusi Folau o atunuu eseese i le lalolagi, (Henley Index Most Powerful Passports 2023), o se taimi muamua lea ua tula’i mai ai le maualuga o le TUSI FOLAU SAMOA i le tulaga 33, mai le 195 o atunuu o le lalolagi o loo faamauina i lea ripoti i le tausaga nei 2023.

O le togiina o nei taiala, o loo fuafua i le:

1. Tele o atunuu o le lalolagi e le manaomia ai se visa ulufale (free entry visa)

2. Visa e manaomia i le taimi faatoa taunuu ai (visa on arrival)

3. Visa e mafai ona talosaga i luga o le initeneti ma maua i totonu o le tolu aso (online visa approval in three days) 4. ma visa e mafai ona faaoga ai polokalama faaupega tafa i lagi e faamaonia ai (App online visa approval)

5. E aofia ai ma le mama (light weight), faigofie ona feavea’i le tusi folau, faatusatusa i nisi atunuu e fai sina mamafa, ma lautele tele latou tusi folau.

I lea ripoti, o loo faamauina ai e;

1) 80 atunuu o le lalolagi na suesueina (survey) ma faamaonia, e le manaomai ai se apalai ina o se visa i lou umia ai o se tusi folau Samoa

2) 128 le fua faatatau o le aoga ma le taua o le Tusi Folau Samoa i atunuu o le tau puleaga (mobility scope)

3) Tulaga 33 le Tusi Folau Samoa, i le laina o atunuu malolosi o le lalolagi (Passport Power Rank)

4) 64% atunuu o le lalolagi ua lealea atu i ai le Tusi Folau Samoa (World Reach), e tusa ma lea ripoti.

Ua maitauina, o le atunuu o Iapani (Japan) o loo tula’i mai i le tulaga muamua, ae o le mitamitaga o le Samoa, ona o le tulaga lelei ma le maualuga o le aoga tele o le Tusi Folau Samoa ua i ai nei.

Na saunoa ai le tina ia Easter Iupati o Falelauniu e faapea, “O se tualaga e faafetaia ai taumafaiga a le Afioga i le Minisita, le afioga i le Tamaitai Palemia ma le matagaluega o le Va i Fafo a Samoa, ona o nisi o latou manulauti i faiga faafeagaiga, paaga, ma sootaga vavalalata faava o malo, ua aliae ai lenei mitamitaga fou, ua iloa ai le agiagia i luga o le aoga, amanaia ma le tulaga maualuga ua i ai le tusi folau Samoa”.