Ads by Google Ads by Google

Silia i le to’a 700 tagata ua aafia i le KOVITI-19


[ata: foa'i]
ausage@samoanews.com

Pago Pago - AMERIKA SAMOA

 

Talu mai le aso Gafua na te’a nei, Mati 14th, 2022, e to’a 718 i latou ua faamaonia i suega sa faia le aafia i le faama’i o le KOVITI-19. 

 

O se ripoti lea na tuuina mai e le Matagaluega o le Soifua Maloloina, i le mae’a ai lea o suega sa faagasolo i nofoaga eseese e 4 i totonu o le atunu’u, lea e aofia ai Falema’i Faaitumalo i Amouli; Tafuna ma Leone, faapea ai ma le Falema’i o le LBJ i Faga’alu.

 

E pei ona taua i le ripoti, mai suega e 823 sa faatinoina i nofoaga eseese nei e 4, o le to’a 163 o i latou nei na faamaonia le aafia i le fa’ama’i, ma suia mai ai loa le numera mai le 527 sa i ai i le Aso Sa, Mati 13th, i le 718 e pei ona i ai nei.

 

E to’a 3 o lo o taofia pea i le Falema’i o le LBJ i le vaega faapitoa e taofia ma togafitia ai i latou ua aafia i le gasegase o le KOVITI-19 i le taimi nei, ae o le isi to’a 3 ua te’a i tua ina ua mae’a ona faia i ai togafitiga ma faamaonia ai le toe fo’i o lo latou malosi i le tulaga atoatoa sa i ai.

 

Mai le to’a 718 o le atunuu ua faamaonia le aafia i le faama’i, e 65 i latou ua toe faafo’i e le Atua lo latou malosi ma ua toe fo’i i le tulaga manuia sa i ai, ina ua mae’a a latou suega tai 3 ma faamaonia ai le lelei atoatoa o lo latou soifua maloloina.

 

E pei ona faaalia e le Soifua Maloloina, o lea faatoa oo Amerika Samoa i le laasaga muamua o le pipisi ai o le faama’i i le atunu’u, ma o lo o faamalosia pea tagata uma ina ia tausisia ta’iala ma faatonuga ua mae’a ona tuuiuna mai mo le saogalemu atoa ai ma le malu puipuia o tagata uma. 

 

O i latou uma o lo o faamaonia ua aafia, e fautuaina le nonofo i totonu o latou maota ma laota mo le umi e 14 aso e aunoa ma le feoa’i. Ua fautuaina e le malo aiga taitasi uma ina ia i ai se sapalai mo mea uma e faaaoga e le aiga mo le umi e 2 vaiaso pe sili atu fo’i, ina ia mafai ai ona tausia ai le aiga mo le 2 vaiaso a o taofia ai i latou uma mai le feoa’i atu i fafo.

 

Ua fautuaina malosi foi le atunuu ina ia faia tui puipuia o le faama’i e aofia ai ma le tui lona 3 o le boostoer shot. 

 

O lo o faagasolo pea le faia o tui mo le mamalu o le atunuu i nofoaga masani. O lo o faagasolo pea fo’i le faia o suega mo soo se tasi e fia silafia poo aafia pe leai i le faama’i. Telefoni i le 219 mo nofoaga fa’atulaga, pe o le Facebook a le DoH. 

 

TEUTEUGA I AUALA E TALI ATU AI I LE KOVITI

 

E pei ona manino i le saunoaga a le Taitaifono o le Task Force, le afioga i le Lutena Kovana ia Talauega Eleasalo Ale, i se fonotaga ma le Au Faasalalau i le aso Gafua o le vaiaso nei, le ese o le auala lea ua aga’i atu i ai le malo mo le taulimaina lea o le faama’i.

 

I le 2 tausaga talu ai, sa faaaoga e le malo lanu eseese e pei o le lanu samasama, lanu moana ma le lanu mumu e faailoa mai ai le tulaga ua i ai le faama’i i le atunu’u.

 

Ae talu mai le taimi na pipisi ai le faama’i i totonu o le atunuu i le masina o Fepuari na te’a nei, ua manatu ai le malo e le toe faaaogaina lanu eseese e faailoa mai ai le tulaga ua i ai le faama’i, ae o le a faaaoga laasaga eseese, e fuafua lava i le tetele o le pipisi o le faama’i ma le tau leai o se pipisi o le faama’i.

 

O le taimi nei e pei ona faamanatu mai pea e le Task Force ma Taitai o le malo i le atunu’u, e le o i ai se soifua ua ma’imau i le faama’i talu mai ona aafia Amerika Samoa i le fa’ama’i.

 

TIUTE FAATINO A PISINISI

 

Ua fautuaina malosi fo’i e le Taitaifono a le Task Force Taitai o Pisinisi tua ina ia galulue faatasi ma le malo e faatino auala uma e puipuia ai le pipisi o le faama’i atoa ai ma le saogalemu o tagata faigaluega i nofoaga eseese.

 

Ua fautuaina le tatau lea ona faia tui tai 3 a soo se tagata faigaluega, ma ia mautinoa e faia a latou suega e faamaonia ai lo latou le aafia mai le faama’i. Afai fo’i e i ai se tagata faigaluega e faamaonia le aafia i le faama’i, e tatau ona fautuaina lena tagata faigaluega ina ia nofo i le fale mo le 14 aso ina ia mautinoa e malu puipuia ma saogalemu isi tagata faigaluega.

 

TEUTEUGA MO PISINISI

 

Ua faalauiloa aloaia mai fo’i e le Loia Sili, susuga Fainu’ulelei Falefatu Ala’ilima Utu teuteuga laiti mo pisinisi atoa ai ma nisi o galuega a le malo, ina ia manino i ai le faafofoga a le atunu’u.

 

O teuteuga laiti e aofia ai le suia o le taimi e tapunia ai pisinisi mai le 5:00a.m i le taeao e oo mai i le itula e 6:00pm i le afiafi sa i ai, i le taimi fou ua i ai nei, o le tatala i le 5:00 i le vaveao ae tapuni i le itula e 8:00 i le po.

 

Ua i ai foi le fuafuaga a le malo mo le amata lea ona tatala nisi o auaunaga a matagaluega ma ofisa o le malo, ina ia mafai ona aga’i atu le atunu’u e fa’aaoga tautua nei ma auaunaga taua o loo latou mana’omia.

 

E le o tagata faigaluega uma a le malo e maua le avanoa e galulue ma toe fo’i atu ai i galuega, sei vagana ai galuega faapitoa e moomia ona faatino. Ua fautuaina fo’i tagata faigaluega a le malo ina ia faafofoga i faatonuga ma ta’iala e tuuina atu o latou Faatonusili ina ia mulimulita’i i ai.

 

Ua fautuaina fo’i Faatonusili o matagaluega eseese a le malo ina ia silafia e le atunuu atoa ai ma tagata faigaluega le auala fou ua faatino ai galuega, ina ia mautinoa e faataua pea tulaga i le puipuiga ma le saogalemu o tagata uma.

 

O isi teuteuga laiti e pei ona faailoa e le Loia Sili, e aofia ai tuu faatasiga ma mafutaga tetele. 

 

O lo o tumau pea le tapunia o ni mafutaga poo ni faatasiga tumutumu i le taimi nei, sei vagana ai mafutaga e le sili atu i le to’a 10 tagata e tatau ona i ai. Mo soo se faatasiga faitele e faia faia i fafo o le fale, ia le silia i le to’a 20 le aofa’i o tagata e tatau ona i ai.

 

O loo tumau pea ta’iala fou mo sauniga o maliu ma falelauasiga, i le na o le to’a 10 i latou e mafai ona auai.

 

O lo o tatala pea le avanoa i pisinisi o pasi ma taxi la’u pasese e tatala ai mo le 24 itula, ina ia mafai ai ona maua le avanoa e nai aiga lima vaivai toe leai ni auala e faaaoga ai lea auaunaga pe afai e manaomia i le leva o le po.

 

O loo tatala faasolo atoa fo’i Pamu Kesi mo le faaaogaina e le atunu’u i soo se taimi e moomia ai.

 

O loo fautuaina malosi mai foi e le Task Force le atunuu ina ia nonofo i totonu o aiga ma ia faaitiitia le soona feoa’i. Afai e moomia le faia o se faatau, ia malaga le Tama poo le Tina e fai le fa’atau i se faleoloa, ae nonofo pea le fanau ina nei aafia i le faama’i.

 

O loo fautuaina foi le atunuu atoa ina ia faaaoga le tali fofoga i soo se taimi e feoa’i ai i le taulaga, ma ia faaaoga le nonofo valavala i soo se taimi e aga’i atu i fale e tumu tumu ai tagata.

 

O le saogalemu o soo se tasi o le itu pito sili lea ona taua ma laualuga i le Task Force i le taimi nei.