Ads by Google Ads by Google

Le solomuli Alefosio ma lana tagi e faasaga i le malo o Amerika Samoa


[ata: foa'i]

Pago Pago - AMERIKA SAMOA

O le aso 26 o Aperila, 2024, na taunuu atu ai i luma o le Faamasinoga Faaitumalo a le Iunaite Setete, i Honolulu, Hawaii, ia se tagi a le susuga ia Leauma Ben Alefosio, e faasaga i le malo o Amerika Samoa (ASG).

Ae o le aso 7 o Me, na faatonuina ai e le alii faamasino sinia o faamasinoga faaitumalo a le Iunaite Setete, ia Derrick K. Wilson, ia Alefosio, ina ia faao’oina atu sana finauga, i le mafuaaga e tatau ai ona iloiloina e le faamasinoga i Hawaii, lana mataupu.

O le tagi a Alefosio lea ua taoto nei i luma o le faamasinoga i Honolulu, o le tagi lava e tasi lea sa ia fa’ao’oina atu i luma o le ALJ (Administrative Law Judge) a Amerika Samoa, i le aso 14 o Me, 2021.  Lea o lo’o taofi mau Alefosio, e le’i faia iai se faaiuga.

Ua fa’alauiloa mai e Alefosio, ua mafua lana apili lea ua o’o atu nei i luma o le faamasinoga a le Iunaite Setete i Honolulu, ona o sana apili sa faaulu i le ALJ ia Aukuso 14, 2023, ae peitai, valu (8) masina mulimuli ane, e le’i faia lava iai se faaiuga.

I sana imeli sa fa’ao’oina mai i le Samoa News, na ta’ua ai e Alefosio o le a ia tali atu e pei ona faatonuina ai o ia e le alii faamasino ia Watson.  

Ua mafua lenei fa’atonuga mai i le alii faamasino a le malo tele, ona o Alefosio sa galue i Amerika Samoa ma sa faate’aina o ia mai i lana galuega i Amerika Samoa ma sa ia uia foi ala o le tulafono i faamasinoga a Amerika Samoa, ma o lea e talitonu ai le alii faamasino a le Iunaite Setete, e le alagatatau ona taulimaina lenei mataupu, e le faamasinoga i Hawaii.

E le gata i lea, ua taofi le alii faamasino a le Iunaite Setete, o le faamasinoga a Amerika Samoa, e le o se faamasinoga feterale, po o se vaega foi a faamasinoga feterale, o lea e le o iai se malosiaga i faamasinoga a Amerika Samoa, e fa’ase’e atu ai lenei  mataupu i fa’amasinoga a le malo tele.

O le aso 28 o lenei masina lea e fa’agata ai ona fa’auluina le finauga a Alefosio, i lenei tulaga.

Na mafua le tagi a Alefosio, ina ua fa’ate’aina o ia mai i lana galuega i totonu o le Ofisa o Loia mo le mamalu lautele (OPD) ia Me 3, 2021.

Ae o le aso 5 o Me o lea lava tausaga, na ia lu’itauina ai lenei faaiuga i le Ofisa o Tagata Faigaluega a le malo (DHR), ona sa iai se talitonuga ia Alefosio, e le o tonu ma sa’o le fa’ate’aina o ia mai i lana galuega.

Ma na ta’ua foi i totonu o le tusi fa’ate’a a Alefosio, le leai o se aia tatau a Alefosio, e na te lu’itauina ai le faaiuga, o le fa’ate’aina o ia mai i lana galuega.

Ae le gata i lea, sa ta’ua foi i le tusi fa’ate’a a Alefosio, ua mafua ona fa’ate’aina o ia, ona o le tulaga faaletonu o le faatinoina o ona tiute faigaluega, e pei ona faatonuina faafia ai o ia, e le sa fa’auluulu i le latou ofisa loia (Public Defender).

O lo’o finau Alefosio, e leai ni su’esu’ega po o ni iloiloga sa faataunu’uina, e faatatau i le auala sa ia faatinoina ai le galuega, po o se tusi fautua po o se tusi lapata’i foi, e faamaonia ai le mafuaaga o le fa’ate’aina o ia.

E le gata i lea, o lo’o ua finau Alefosio, o tusitusiga a le alii loia ia Michael White (lea na avea ma ‘Public Defender’ ma o ia foi lea sa fautuaina le faate’aina o Alefosio), e fa’atatau ia te ia (Alefosio) e le moni ma faamaoni. 

Na fa’aulu e Alefosio ia le tele o tusi mai i ni isi o ana pule mai i galuega sa galue muamua ai, faapea faiaoga ma polofesa sa a’oa’oina o ia, ma o lo’o fa’aalia ai le tele o le ‘ese’esega o nei tusitusiga ma le tusitusiga mai ia White, e tusa ai ma le galue a Alefosio.

(O le susuga ia Michael White, sa fa’amavae mai i le avea ma ‘Public Defender’ a Amerika Samoa, ia Iulai 2022 ma ua malaga atu nei o ia i atunu’u i fafo.)