Ads by Google Ads by Google

Suega lona lua faia i le taeao nei mo le Koviti-19 mo le aumalga mai Hawai’i


Fa’atonusili o le Matagaluega o le Soifua Maloloina, Motusa Tuileama Nua, i le feiloaiga ma le vaega tusitala ma le au fa’asalalau i le aso Lua o le vaiaso lenei. [ata: FS]

Pago Pago, AMERIKA SAMOA

 

I se feiloaiga ma le vaega tusitala ma le au fa’asalalau i le aso Lua o le vaiaso lenei, sa fa’ailoa ai e le Matagaluega o le Soifua Maloloina e fa’apea, ua ma’ea ona faia le suega lona lua o le Koviti-19 mo i latou e 259 sa malaga mai i le faigamalaga a le Hawaiian Airlines i le aso 13 o Septema. 

 

O i latou nei o lo’o nofo va’avaia i le Tradewinds Hotel ma le Sadies by the Sea. Ma o le suega lona lua o lo’o soloega lelei pea, ma e leai se isi ua fa’amaonia e pesia i le Koviti-19. 

 

Ua fa’amoemoe le Matagaluega o le Soifua Maloloina o le suega lona tolu e faia i le taeao nei, ma ua fa’atualga o le aso 26 o Setema, o le a tatala ai i latou nei mai le nofoaga va’avaia ina ia auai ma o latou aiga. 

 

Mai le malaga a le Hawaiian Airlines ia Setema 13, e to’atasi le tagata malaga sa fa’amonia ua maua i le Koviti-19 ina ua ma’ea le seuga sa faia ia Setema 16. O lea tagata malaga o lo’o taofia pea i se tasi o nofoaga va’avaia a le malo i Tafuna, ma e na o ia o lo’o i ai. 

 

Ma o lo’o malosi pea lea tagata malaga e leai se fiva ma auga o le fa’ama’i, ae pau le tulaga ua i ai, e le mafai ona manogi mea taumafa ma ose tasi lea o auga o i latou e maua e pesia i le virusi, ae ua ma’ea ona faia tui puipuia. 

 

Sa fa’ailoa foi e le Matagaluega o le Soifua Maloloina e fa’aauauina pea ona va’avaia i latou uma nei pe a tatala mai tua i nofoaga nofo vaavaia. E tatau ona tumau i latou i o latou aiga mo aso e lua ma e nofo ese mai tagata o lona aiga. 

 

Ua i ai foi tulaga e vaaia ai e le matagaluega i latou uma nei ina ia tausisi i tulafono fa’atulaga mo le puipuiga o le atunu’u lautele. 

 

I le tulaga lata mai i malaga a va’alele i le va o Samoa e lua, sa fa’ailoa e le fa’atonusili o le Matagaluega o le Soifua Maloloina ia Motusa Tuileama Nua e fa’apea ua fa’amonia e le Komiti o le Koviti-19 a le malo o Amerika Samoa le toe amataina o malaga i aso Lulu ma aso Faraile o vaiaso ta’itasi.

 

O le aso Faraile o le vaiaso ua te’a, sa fa’alauiloa ai e le afioga i le Lutena Kovana ia Talauega Eleasalo Ale, le taofia o malaga mo Samoa mo se taimi le tumau ona o se tagata malaga mai Hawaii ua fa’amonia i le koviti-19. 

 

O le malaga i le va o Samoa e lua i le aso Faraile nei, ua tolopo mo le vaiaso fou, ona o tulaga tapunia o Samoa, ae faia tui puipuia o lea atunu’u.

 

Mo le malaga fa’atulagaina i le aso 27 o Setema a le Hawaiian Airlines mai Honolulu o lo’o fa’auau pea lea faigamalaga. Ae o isi malaga mo lenei tausaga, ose mataupu lenei e faia i ai se fa’aiuga a le komiti o le Koviti-19. 

 

O le tali lea a Motusa ina ua fesiligia e le vaega tusitala ma le au fa’asalalau i le tulaga o malaga mai Hawaii. 

 

Ua ma’ea ona fa’atulaga e le Komiti o le Koviti-19 aso mo malaga a le Hawaiian Airlines e ta’i lua malaga i le masina o Oketopa, Novema ma Tesema.