Ads by Google Ads by Google

Suesue e le Fa’amasinoga pe faamaonia le molimau a le Ofisa Loia Fautua


[ata: SN]
ausage@samoanews.com

Ua taoto atu nei le mataupu a le susuga ia Sonny “MU” Kelemete e su’esu’e e le Fa’amasinoga Maualuga, pe fa’amaonia ripoti mai le Ofisa o le Loia Fautua mo Tagata Lautele, e fa’atatau i le mafua’aga na ala ai ona le oo atu Kelemete i luma o le Fa’amasinoga i lana iloiloga sa fa’atulaga mo le vaiaso nei.

 

O le susuga i le ali’i Loia Fautua Lagolago ia Rob McNeill na tulai mo Kelemete, ae o le tama’ita’i loia sili lagolago ia Christy Dunn na fai ma sui o le malo.

 

O le vaiaso nei na toe fa’atulaga ai le isi iloiloga faapitoa a Kelemete i luma o le afioga i le Fa’aasino Sili ia Michael Kruse, ona o se talosaga na fa’aulu e le malo, mo le taumafai lava e fa’amautu tulaga uma ‘ao lumana’i ai le fa’amasinoga autu a Kelemete i le vaiaso fou.

 

E le i auai Kelemete i luma o le fa’amasinoga ina ua valaau lana mataupu, o le mafua’aga lea na fesili ai loa Kruse poo fea o i ai le ua molia. Saunoa Kruse e fa’apea, o se tasi o tuutuga o lo o tatala ai Kelemete i tua ina ua mae’a ona ia totogi le $30,000, ia auai i soo se taimi e valaau ai lana mataupu, ma ia fesoota’i vavalalata ma lana loia fautua.

 

Ina us fesili Kruse, se tali Dunn e fa’apea, ua ia maua tala o lo o taumafai pea le Ofisa o le Loia Fautua e tau saili poo fea o i ai Kelemete.

 

O le itu o lo o popole ai le malo, o lea ua sauni le latou molimau mai Hawaii e malaga mai i le atunu’u i le vaiaso fou e molimau i le fa’amasinoga autu a Kelemete, peita’i o loo atugalu le malo ina ne’i ma’imau le taimi e totogi ai le pasese o lea molimau e malaga mai ai, ae emo ane le ata e leai se fa’amasinoga e fa’ataunu’uina, ona o lea e tau saili poo fea o i ai le ua molia.

 

Na taua atili fo’i e Dunn e fa’apea, o le molimau o lo o fuafua e malaga mai i le atunu’u i le vaiaso fou, e faigaluega i le Ofisa e Suesue ai Fualaau Faasaina ma a’upega a le Feterale, o ia tonu fo’i lea sa gafa ma le suesueina o fualaau fa’asaina o lo o tu’uaia Kelemete sa ia umia.

 

Na faamanino e McNeill e fa’apea, ua mafai ona latou fesoota’i ma Kelemete i le telefoni, ma o lo o i ai o ia i le Falema’i i lana Foma’i, mo le tau faamautuina o nisi o pepa fa’atumu, ina ia aloaia ai loa le avea o ia ma tagata e a’afia i le gasegase o le fa’amama o le toto.

 

Na fesili Kruse ia McNeill poo ai le igoa o le foma’i a Kelemete, ae na tali le ali’i loia, na te le iloa le igoa o le foma’i.

 

“O fea la o i ai Kelemete i le taimi lenei, o i ai i le falema’i pe leai,” o le fesili fiamalamaa lea a Kruse.

 

Ae na tali McNeill, “O lo o i ai o ia i lana foma’i i le taimi nei, mo le fa’atumuina o pepa e fa’atatau i lona gasegase.”

 

A o fa’agasolo le iloiloga, sa maitauina e Kruse le taumafai o le sui o le Ofisa o le Loia Fautua o lo o alala atu i le pito i tua e talanoa atu ia McNeill. O le mafua’aga lea na valaau atu ai loa Kruse i le sui lea, le susuga ia Eddie Fruean, e alu atu i luga o le nofoa molimau se’i fa’atauto o ia, ae ta’u atu i le fa’amasinoga poo fea o i ai Kelemete.

 

Na taua e Fruean i luga o le nofoa molimau ina ua mae’a ona fa’ataoto o ia, sa la talanoa ma Kelemete i le aso Lua i luga o le telefoni, a o lei oo i le aso Lulu o le iloiloga, ma faailoa atu ai loa e Kelemete ia te ia le tulaga o lo o i ai lona gasegase.

 

E tusa ai o le saunoaga a Fruean, o Kelemete o loo i ai o ia i lana foma’i, o lo o faatumu pepa mo le avea o ia ma tagata e a’afia i le gasegase o le faamama o le toto.

 

Na taua atili e Fruean e fa’apea, e matua tuga lava le aafiaga o Kelemete i le gasegase o le suka, o le mafua’aga lena ua ala ai ona alu e vaai lana foma’i.

 

Na fesili Kruse ia Fruean poo ai le igoa o le foma’i a Kelemete, ae na tali le molimau, na te le iloaina.

 

Na toe fesili Kruse ia Fruean pe na te iloaina o ai e ana la ta’avale lea na avatu e fa’amaonia ai le tatalaina i tua o Kelemete, na toe tali fo’i le molimau, na te le iloaina.

 

A o fa’agasolo le iloiloga, sa talosagaina ai loa e McNeill le fa’amasinoga, ina ia aua ne’i fa’ataunu’uina le fa’amasinoga autu a Kelemete ua fa’atulaga mo le vaiaso fou, ae sili pe a tolopo atu i le aso 5 o Aokuso.

 

I le mae’a ai ona fa’afofoga o le fa’amasinoga i fa’amatalaga uma e uiga i lenei mataupu, na ia tuuina mai ai loa ni poloaiga se lua e uiga i le mataupu a Kelemete.

 

O le poloaiga muamua, ua talia e le fa’amasinoga le talosaga a McNeill e toe tolopo le fa’amasinoga autu seia aulia le aso 5 o Aokuso. Saunoa Kruse e fa’apea, e leai se aoga e fa’ataunu’u ai le fa’amasinoga autu i le vaiaso fou, ma tigaina le malo feterale e totogi le pasese o le molimau e malaga mai ai i le atunu’u, ae emo ane le ata e le maua Kelemete.

 

O le poloaiga lona lua, ua fa’atonuina e le fa’amasinoga le ali’i Masela ina ia alu e saili mai le Falema’i i Faga’alu, pe fa’amaonia ripoti sa i ai Kelemete i le falema’i ona o lona gasegase. E fia iloa e le fa’amasinoga poo ai le foma’i na siakia Kelemete, ae pe moni fo’i ripoti i le tulaga matuia o lona gasegase.

 

Na faamanino e Kruse e fa’apea, afai e maua ane e le faamaonia ripoti ua tuuina atu, o le a tuuina atu loa e le fa’amasinoga se poloaiga e toe taofia ai i le toese i Tafuna le susuga a Kelemete.

 

Na faamanino atili e Kruse i loia a itu e lua le tulaga matuia o lo o tu’uaia ai e le malo Kelemete i lona umia fa’asolitulafono o vaega o fualaau fa’asaina o le aisa.

 

O ia tu’uaiga e pei ona saunoa Kruse, na alia’e mai i le masina o Setema o le tausaga e 2017, ina ua taofia e se vaega o Leoleo fa’a a’upegaina a le Vaega e Suesueina Fualaau Faasaina a le Ofisa o Leoleo le ta’avale a Kelemete i luga o le alatele, ona o tu’uaiga i le leotele o le mafa o lana ta’avale.

 

Ae ina ua su’e e Leoleo le tino o le ua molia, na tu’uaia le maua i ai o ni taga pepa iila se 9 o lo o i ai vaega o le pauta oona o le aisa. Sa maua ai fo’i ma se tinoitupe e $90.

 

Na faia e Leoleo se suega i pauta sa maua ma fa’amaonia ai, o vaega ia o le pauta fa’asaina o le aisa.