Pago Pago - AMERIKA SAMOA

I la latou iloiloga i le aso Tofi o le vaiaso ua mavae, sa fa’aleoina ai e afioga Senatoa o le Komiti o Galuega Lautele, lo latou le fiafia i le taimi fa’aaluina e fa’amae’aina ai galuega mo le fale fono fou, faapea ma tupe fa’aopoopo ua fa’aaluina.

Sa auai atu i lea iloiloga ia le Faatonusili o le Matagaluega o Galuega Lautele (DPW) ia Faleosina Voigt, o le Faatonusili o le ofisa o fa’atauga a le malo (Procurement), ia Ti’alemasunu Mikaele Etuale fa’apea ia Mark Lively le tusiata o le galuega ma o ia lea o lo o fa’atonutonuina le galuega o le fale fono.

I lana saunoaga amata, sa folasia ai e le Taitaifono o le komiti, le afioga i le Senatoa ia Satele Lili’o, ia tulaga o lo o manaomia mai i nei molimau.  Sa ia ta’ua le autu o le iloiloga, o le fa’alauiloa o le tulaga ua iai le galuega o le fale fono, fa’amautu le aso tonu o le a mae’a ai le galuega ma mafuaaga moni ua tuai ai ona fa’amae’aina le galuega.

Sa saunoa Satele, o lenei galuega sa tatau ona fa’amaeaina ia Oketopa 2023 i le taimi tonu lea na fa’amanatuina ai le Iupeli Siliva a le Fono.  Ona toe fa’ailoa mai lea le fa’amae’aina o le galuega ia Aperila 2024.  Ae o lea ua toe ta’u mai o le a fa’amae’aina i se mea o Iuni po o le amataga o Iulai o le tausaga nei.

Sa ta’ua foi e Satele, i sona malamalama’aga, o galuega tetele faapenei, e iai lona aso e fa’amae’aina ai, ma faasalaga pe afai e o’o atu i lea aso, e le i mae’a le galuega.

Na saunoa le sui taitaifono, le afioga i le Senatoa ia Utu Sila Poasa, e tusa ai ma le uluai konakarate o lenei galuega, e 480 aso e faamae’aina ai, ae o lea ua siliga aso o le galuega.  Sa ia fesiligia po o iai se vaega i totonu o le konakarate, e mafai ona fa’avave ai le galuega, ona e foliga mai o lo o pisi le konakarate i ni isi poloketi ae ua le amanaia lenei galuega taua.

Sa saunoa Utu, o nisi taimi e latou te usu atu ai i le taeao, e latou te vaaia le na o le to’atolu pe to’afa tagata faigaluega i le galuega.  Ma sa ia fa’aalia e faapea, o le latou popolega autu pe latou te nofoia se fale fono fou ae e le i mae’a tauaofiaga a le fono faitulafono mo lenei tausaga.

Sa ia fa’ailoa mai foi le le amanaia e ofisa o le malo o lo o a’afia i lenei poloketi ma lo latou le mataituina o galuega o lo o faia, ma u’una’i malosi le konakarate ina ia fa’avavevave le fa’amae’aina o le galuega. 

Sa ta’ua foi e Utu, na amata mai le galuega, e $10 miliona ae o lea ua o’o atu lea fuainumera i le $26,470 miliona.

I lana saunoaga fa’asaga i le pule o le Ofisa o Faatauga a le malo (Procurement), le susuga Ti’alemasunu Mikaele Etuale, na saunoa ai le afioga Utu, e le o lava lana galuega o faia e fofoina ai lenei fa’afitauli ma le tu’u tia’i atu i le fa’atonusili o le DPW.

Na faamanatu mai e Ti’alemasunu i afioga Senatoa, o ia fa’ato’a tulai mai i lona tofiga fa’aletaitai ia Ianuari 2021, ma e le i iai o ia ina ua amata ona faia tauofoga mo lenei galuega, ma le filifiliga o le konakarate e faia le galuega, le Paramount Builders, faatasi ai ma le taimi na faatonuina ai e le DPW ia le amataga o le galuega ia Setema 3, 2019 lea na fa’amatu’u mai ai le aso e tatau ona fa’amaeaina ai le galuega, o Setema 3, 2021.

Sa ioeina e Ti’alemasunu ia le finagalo fa’aalia a Utu, i le umi tele o lenei galuega, ae sa ia toe fa’amanatu mai foi, o se tasi o mafua’aga ona o le taimi lea na taofia ai galuega ona o le Koviti-19, lea pei ona sa saunoa ai le tamaitai faatonusili ia Faleosina.

Sa faamanino foi e Ti’alemasunu e faapea, na mafua ona ta’atia le konakarate mo le tausaga atoa, ona o se talosaga mo le suiga o le aso e faamae’aina ai le galuega.

Na fa’ailoa mai e le pule o le Procurement e faapea, e tusa ai ma a latou fa’amaumauga, e o’o mai i le vaiaso ua mavae, ua valu suiga ua faia mo lenei galuega – o le tolu o nei suiga, e toe tu’u ai i tua le aso e fa’amae’aina ai le galuega, ae o leisi lima, e mo tupe totogi mo nisi faaopoopoga i le galuega.

O le talosaga mulimuli lea na fa’aulu mai mo lenei galuega, o le suia lea o le aso e fa’amae’aina ai le galuega, ia Tesema 31, 2024.

Sa faamanino e Ti’alemasunu, o le latou matafaioi e ‘ese mai i le matafaioi a le DPW, o latou (Procurement) e ma’oti lava le latou tiute i tupe e totogi ai konakarate ma meatotino o lo o manaomia mo le galuega.

I se fa’amalamalamaga mai i le Faatonusili o le DPW, ia Faleosina Voigt, sa ia ta’ua ai e faapea, e mae’a loa ona pasia ia se talosaga mo suiga i le galuega, ona o latou iloilo lea pe manaomia foi ona sui le aso e fa’amae’aina ai le galuega.

Na ta’ua e Voigt, o le aso fa’atulagaina mo le fa’amae’aina o le fale fono, o Iuni 28, 2024, ae o le aso e fa’amae’aina ai ofisa i totonu o le fale fono, o Tesema 31, 2024.  Ma e apalai ia sala i lenei poloketi pe afai e o’o atu ia Tesema 31, 2024, e le i mae’a le galuega.

Na fesiligia e le afioga i le Peresetene o le Senate, ia Tuaolo Manaia Fruean, po o iai nisi o vaega su’esu’e a le DPW o mataituina le galuega, ona i sona talitonuga e leai ni isi mai i le DPW o va’aia i le mea o fa’atino ai le galuega.

Sa ta’ua e Tuaolo, e na te fa’amaonia lea tulaga, ona o lipoti mai i lana fesoasoani faapitoa, o Jim McGuire, lea o lo o vaavaaia le fa’agasologa o le galuega i aso uma.

Sa tali mai le faletua ia Voigt, o le susuga ia Malo lea o lo o gafa ma le mataituina o le galuega, ae o nisi o taimi e le mafai ona lava mai Malo, ona sui tulaga mai lea o Ta’afua.  Sa ta’ua foi e Voigt, o lo o iai foi se sui o le kamupani a Mark Lively, o John Goeke, lea o lo o ia va’ava’aia le galuega.

Sa fa’aalia e Tuaolo, le fautuaina e le afioga Lolo Moliga, a’o avea ma kovana, ia fa’aese’ese tauofoga mo galuega e faia i ofisa a le maota fono, mai i le fale autu, ae o Voigt lea na fautuaina le tu’uina uma o galuega ia Paramount.  Sa saunoa foi Tuaolo, o masina uma lava e na te sainia ai siaki ta’i $8,000 mo le kamupani fau fale, ma na ia fesiligia ai Lively po o le a le uiga o lea tupe.  Sa tali Lively, o lona totogi lea mo le mataituina o le galuega.

O le susuga ia Lively, e faamautu i Honolulu ma e malaga mai i masina taitasi, ae o Goeke o lo o fai ma ona sui e vaavaaia lenei galuega.

Sa le i fa’a’alo’alo le saunoaga a le afioga i le Senatoa ia Malaepule Saite Moliga, i lona faapea mai, o ia e le kea pe le toe nofo i totonu o se ofisa a le fale fono.  Ae ia fa’amae’aina lenei galuega.  Sa saunoa le afioga i le Senatoa mai Manu’a, e le o kea Lively ma le konakarate i le aso e fa’amae’a ai lenei galuega, ona o la e maua latou tupe.

Ua talitonu le afioga Malaepule, ua le amanaia e le malo lenei galuega taua ma e na te le o va’ai foi i ni tagata su’esu’e a le malo i le galuega.  Sa ia saunoa afai ae fa’aauau ai faapea lenei galuega, e le fa’ate’ia o ia pe afai ae o’o atu le tupe totogi mo lenei galuega i le $50 miliona, i le taimi e mae’a ai.

Sa fa’aalia foi e le afioga i le Senatoa ia Magalei Logovi’i lona atugaluga i le to’alaiti o tagata faigaluega a le Paramount Builders lea o loo faatinoina le galuega i aso taitai, ma i sona talitonuga, o le mafua’aga lea ua fa’atuai ai le galuega.  Sa ia ta’ua le fale faamasinoga fou lea o lo o fausia i leisi itu auala, lea ua toeititi mae’a, ae fa’ato’a amata i le tausaga ua mavae.

Na saunoa Magalei, o taimi uma lava e pasi atu ai ma Fatu ma Futi, e na te va’aaia le silia ma le afa o le aufaigaluega a le Paramount le la e galulue i le fausia o le maota a le kovana, ae lea ua toeititi atoa le lima tausaga, e le i mae’a lava le fale fono.

Sa toe fa’atulagaina e le Taitaifono o le komiti le toe fa’aauauina o lenei iloiloga, mo seisi aso, ona o le utiuti o le taimi.

Sa tapaina e le afioga i le Senatoa ia Togiola Tulafono ia fa’amaumauga mo i latou o lo o fa’atautaia (construction management) lenei poloketi, ona i sana taga’i iai, o le konakarate amata o lo o ta’ua ai le faataunuuina o lenei galuega i le 24 masina, ae o le umi o le galuega, o le tele foi lea o tupe fa’aalu e totogi ai i latou o lo o fa’atautaia le galuega.

Sa fa’ai’uina e le taitaifono lenei iloiloga, e ala i lona fesiligia o Lively pe sa a’afia i nisi poloketi a le malo.  Na tali mai Lively, sa a’afia o ia i le fausiaina o le ofisa fou a le Ofisa o Aoga, faapea le warehouse a le School Lunch Program.

Na fia malamalama Satele pe ono iai se faafitauli e tulai mai i lea tulaga, ma pe o le mafuaaga lea o le tuai o le galuega i le fale fono.  Sa ia fautuaina Lively ina ia toe fo’i mai ma tali atoa ai ma fa’amaumauga, mo nei fesili pe a toe fa’aauauina iloiloga o lenei mataupu.

Sa fautuaina foi e Satele ia Lively ma Voigt ina ia iai i le nofoaga o faatino ai le galuega i aso uma ma taimi uma, seia mae’a le galuega.

Ina ua fesiligia e Satele ia Voigt po o le a le taimi mulimuli na iai i le nofoaga o faatino ai le galuega, sa tali Voigt, o le masina ua tuanai (Tesema).

Sa saunoa Satele i lo la iai faatasi ma McGuire i le nofoaga o faia ai le galuega i vaiaso uma ma e leai lava se suiga o la va’aia i le galuega, talu mai le masina o Tesema.

E le gata i lea, o nisi o ‘materials’ o le galuega, e fa’ato’a taunuu mai ia Oketopa.   Ma i sona talitonuga, e le mae’a le galuega i le tausaga nei.  Ma sa ia talosagaina le toe fo’i atu o nei molimau ma fa’ailoa atu le sese o ona manatu.