Ads by Google Ads by Google

Su’esu’e Leoleo fualaau fa’asaina maua meli Falema’i i Faga’alu


[ata: foa'i]
ausage@samoanews.com

Ua suesueina nei e le Vaega Faapitoa e Sailia Fualaau Fa’asaina a le Ofisa o Leoleo le mataupu lea na maua ai i le meli a le Falema’i i Faga’alu se vaega tele o le pauta fa’asaina o le aisa i le vaiaso na te’a nei.

 

Na fa’amaonia mai e se molimau faatuatuaina i le Samoa News, le galulue lea o ali’i Leoleo Su’esu’e i le suesueina o lenei mataupu, e aofia ai le fesiligia o ni isi o molimau mo le tau sailia lea o ni fa’amatalaga e feso’ota’i ma lenei mataupu.

 

Talu mai le taimi na taulimaina ai e le Ofisa o Leoleo lenei mataupu, e leai se tasi poo ni isi ua taofia pe masalomia fo’i i lenei mataupu.

 

Ae pei ona taua e se molimau fa’atuatuaina i le Samoa News e fa’apea, o le mataupu lenei na tofu atu i le Ofisa o Leoleo, ina ua faafesoota’i e le Pulesili o le Falema’i, afioga Faumuina John Faumuina le vaega o Leoleo mo se fesoasoani.

 

E pei ona taua e le molimau, e 7 ni afifi sa maua i ai vaega o le pauta oona o le aisa na avatu i le meli a le Falema’i. O le meli o vailaau a le Falema’i e le ui i le Ofisa o Tiute e pei ona masani ai soo se uta e ulufale mai i Amerika Samoa.

 

O le taimi na tufatufa atu ai e le Vaega e Pulea Oloa a le Falema’i meli mo Vaega eseese a le Falema’i, na mafua ai loa ona alia’e lenei mataupu, ina ua toe fa’afo’i atu e le Vaega o Tausima’i se afifi na avatu i le latou vaega, ina ua maua o vaega ia o fualaau fa’asaina.

 

Ina ua toe faafo’i le afifi lea e tasi i le Vaega e Pulea Oloa a le Falema’i, na logo ai loa le afioga a Faumuina e tusa ai o lenei mataupu.

 

O le fesili tele e pei ona tula’i mai i le taimi nei e pei ona taua e se molimau i le Samoa News, pe aisea e le sueina ai e le Ofisa o Tiute uta o meli a le Falema’i, e pei ona faia i isi uma uta o oloa ma soo se fa’amomoli e ulufale mai i Amerika Samoa.

 

E ui e le i maua se avanoa e tuuina mai ai se saunoaga a le afioga a Faumuina e uiga i lenei mataupu, peita’i na taua e se molimau fa’atuatuaina mai le Falema’i, o vaega o fualaau faasaina sa maua ua mae’a ona tuuina atu i aao o ali’i ma tama’ita’i Leoleo.

 

E talitonu le Samoa News, ua mae’a ona faia se suega i fualaau fa’asaina ma ua fa’amaonia ai, o vaega ia o le pauta oona o le aisa. O nei fo’i vaega o fualaau fa’asaina e silia i le $400,000 lo latou tau aofa’i pe afai ae fa’atauina atu i tua.