Apia - SAMOA

Ua faaulu nei e le tamaitai o Galumalemana Ronna Lee, lea na avea ma Peresetene o le Asosi Soka a Samoa ia saga tagi e fa’asaga i le Faalapotopotoga o le Soka (Football Federation Samoa – FFS), mo se vaegatupe e $390,000.

O le tagi a Galumalemana e faapea, o le fa’ate’ina o ia mai i lana galuega, o se solitulafono, i le mae’a ai o se la fetusia’iga ma le Peresetene ia Papalii Samuel Petaia.

E tusa ai ma le ripoti a le Samoa Observer, o lo’o ta’ua ai le avea o Galumalemana ma Faatonusili o le FFS, talu mai le masina o Fepuari, se’ia o’o mai i le taimi na fa’ate’ina ai o ia, e le Peresetene ia Papalii, i le masina o Iuni.

O le amataga o lenei vaiaso, sa o’o atu ai lenei mataupu i luma o le Faamasinoga Sili ma ua faatonuina e le faamasinoga ia le toe fa’aauauina o lenei mataupu, ae se’i tu’u atu se taimi e tali mai ai le FFS i tu’ua’iga a Galumalemana.

O Galumalemana, o le lona lua a’i lea o Faatonusili ua ave e le FFS i le faamasinoga ona o fa’ate’aga faalesolitulafono.  O lo’o fa’aauau foi le mataupu a le ulua’i Faatonusili, ia Autu Andy Ripley.

E tusa ai ma se faamatalaga a le itu tagi, ia Iuni 2024, sa fetusia’i ai ia le tagi ma le peresetene o le FFS, e saili mai ai se faamaninoga e tusa ai ma fa’amatalaga ua faia e fa’asaga ia Galumalemana e le Peresetene.

Ae na tali mai le Peresetene ma fautuaina Galumalemana, o le a ia faataunu’uina se iloiloga o le faatinoga o ona tiute.

I se taimi mulimuli ane, i le aso 25 o Iuni, 2024, na fa’amotuina ai e Papalii ia le konakarate a le Faatonusili.

E tusa ai ma le tusi a le Peresetene, o le mafua’aga o le fa’amutaina o le konakarate a le Faatonusili, ona o lana tali mai tauala mai i sana imeli i le aso 12 o Iuni, 2024, faapea ai ma uiga faaalia, na fa’ailoa mai ai le le mafai ona galulue faatasi o itu e lua, ina ia ausia le sini faamoemoe a le FFS.

Sa fa’aalia e Galumalemana lona le mautonu i mafua’aga ua folasia, ua mafua ai ona fa’ate’a o ia.  Ma ia taumafai ai e saili se avanoa e fono ai ma le Peresetene mo se faamanino le fa’ate’aina o ia, i luga o imeli ma tusitusiga.

Na finagalo ia Galumalemana i se avanoa e faamanino ma fa’amalamalama ai lona malamalama’aga ma lana itu, ae peitai, e le’i toe tali atu le FFS ma le Peresetene.

O le mea lea, e pei ona ta’ua i le ripoti a le Samoa Observer, le leai o seisi faaiuga, se’ia vagana o le uia o ala o le tulafono, ma sana tagi e $390,000, o lana tupe maua mo le tolu tausaga.

 O le susuga ia Alex Sua o lo’o avea ma loia a Galumalemana, ae o Mauga Precious Chang o lo’o tula’i mo le FFS.