Taia MV Manu’atele uafu i Ofu ona o matagi malolosi
Ua lipotia mai Ofu i Manu’a le fa’aleagaina o se vaega o le Uafu i Ofu, ina ua taia ai le “MV Manu’atele ll”.
Ua faailoa mai ua ta’e atoa le sima o le uafu ona o lea fa’aletonu ma sa i ai le fesoasoani na mafai ona maua mai ia i latou na i le uafu ina ia taumafai e taofia ai le toe fa’aleagaina atili o le Uafu fa’apea ma le va’a a le malo.
O lea fa’aletonu na tupu i le aso To’ona’i na te’a nei, ma sa mafua mai i le malolosi tele o matagi na o’o mai i le motu o le Manu’atele ona o le Afa o Tino, a’o aga’i ese atu ona ave mai le atu Samoa.
E i ai se vaega o le MV Manu’atele ua fa’aleagaina i lenei fa’alavelave, ae ua fa’ailoa mai e le o afaina tele lea mai le fa’ataunu’uina pea o ana malaga, ae tatau lava ona faaleleia.
E tusa ai ma lipoti mai Ofu, o nisi o le aufaigaluega a le Public Works, ASPA, ma le Port Administration. ma le Happy Trucking, o i latou na sa galulue fa’atasi mo le taumafaiga e sefe mai le Manu’atele mai le toe fa’aleagaina atili mai le toe taia so’o ai o le va’a i le uafu.
Sa i iai fo’i tagata lautele o le afio’aga ma latou fa’asaogalemuina mai nei aseta mai le toe fa’aleagaina atili o nei aseta a le malo.
O nisi o galuega ua fa’ailoa mai sa fa’ataunu’uina, e aofia ai le toe fa’amautu lelei o maea e noatia ai itu uma e lua o le Manu’atele ina ia le toe a’afia ai le Uafu. Ua iloga ai foi i lenei fa’aletonu, le malosi tele o matagi na a’afia ai motu o le Manuatele a’o aga’i atu le afa o Tino i sisifo.
O i latou mai le nu’u sa latou o ane ma le tele o sipea pa’u ta’avale ina ia taofiofi mai ai le va’a mai le taia i le Uafu, ae ua le maua lava ni pa’u na manaomia. I nei gaoioiga uma ma mea na tutupu, e le’i i ai ma se tasi na afaina ai ma na tu’ua fo’i e le Manu’atele lea uafu mo lana malaga masani i Ta’u ma fo’i atu ai i Tutuila e la’u atu ai le kesi ma le suau’u i le latou motu.